JEREMIA 10 - Bukuit Ne Tilil

Perberindap saaetap kanamonik

¹ Ogas ng'olyoot ne mwaiwok Kamuktaindet ne Toroor, ee kootap Israel.

² Mwaei Kamuktaindet ne Toroor kole, “Amat oneetkei ortinwegap pororyosyek, amoaragense agobo kaboorunoigap kipsengwet; amu aragendos pororyosyek, agobo chooto.

³ Amu tangoita pitonwegap piik, ebei age keetit eng' timiin, ak chobei komyee musogindet aiywet koboisyee aiywet.

⁴ Ki lelesonjine fedha ak thahabu; ki igiige kipchumarisyek si ma twagei.

⁵ Uu icheek tiiret ne kimue toriitik, che ma ng'alaaldos; kanyool keibot, amu ma imuuchi kobendat. Amoiywei icheek, amu ma imuuchi koyai kiy ne ya, amaimuuchi koyai kiy ne myee.”

⁶ Ma mi ne ogerge, ee Kamuktaindet ne Toroor; ii oo, ak ko oo kaineng'ung' eng' kamuktaet.

⁷ Ng'oo ne ma iywein, ee Laitoryatap pororyosyek? Nyoljinin toroornatet amu ma mi ne uu inyee eng' piik tugul che utaatiin che po pororyosyek, ak eng' pounatosyekwak tugul.

⁸ Ago uu icheek tugul tyong'ik ak ko abusotiin kaneetisyet ne kineeti kanamonik, ko uu ye kineeti ketin.

⁹ Miitei fedha che ki kitany kolebelitu che ki kiibune Tarsis, ak thahabu che punu Upas, nooto poisyetap musogindet ak po kitang'indetap thahabu; buluu ngoroikwak ak ko arusen ne piriir; poisyetap piik che ng'oomen chooto tugul.

¹⁰ Ago Kamuktaindet ne Toroor ko Kamuktaindet ne Toroor ne po iman; ineendet ko Kamuktaindet ne Toroor ne sabei, ak ko laitoryat ne po koigeny. Bbotani ng'wony amu nereegekyik, amaimuuchi komuita pororyosyek eng' nereegekyik.

¹¹ Mwachi anyun icheek ko uu ni ileenji, “Petos eng' ng'wony ak eng' kurereetap kipsengwet kamuktaik che ki ma koyaei kipsengwet ak ng'wony.

¹² Ki yai ng'wony eng' kamuktaennyi, ki igimit ng'wonyuni eng' utotyennyi, ak kiito kipsengwet eng' naennyi.

¹³ Ye twek, kobiit wasetapkei ne po peek eng' kipsengwet, ak kogoochi kibungweret kotogosta eng' ole poochin ng'wony. Yachin ropta kalyelosyek, imoong'u usoonet eng' ole ki kigonoree.

¹⁴ Kergeitu chiito age tugul ak tyondo ama tinyei naet. Ililani kitang'indet age tugul ne po thahabu eng' kanamwennyi ne ki kiwai. Amu lembeita kanamwennyi ne ki kitany, ama tinyei kabuset.

¹⁵ Puch chooto, poisyetap ng'aalseet; petos eng' peetuut ne ityin pirennywa.

¹⁶ Ma uu chuuto kebebertap Jakobo; amu po tai ineendet eng' tuguuk tugul. Israel ko pororyetap porotennyi: kainennyi ko Kamuktaindet ne Toroor ne po lugoosyek.”

Kimuti piik koba luuleet

¹⁷ Iyum eng' emet tuguuguk che po mung'aaret, ee inyee ne imenye irimeet.

¹⁸ Amu mwaei Kamuktaindet ne Toroor kole, Awirtoi piigap emoni peetuuni, ak anyaliil icheek, si kobiit kogas.

¹⁹ Pwo eng' anee, amu ng'wanindanyu! Ng'waan kaguotenennyu. Ago ki amwa ale, “Aragenennyu iman niito, ak kanyool amuita.”

²⁰ Kigeng'em emainnyu, ak kigeng'eti poroonikyuk tugul. Kigoba lagokyuk kometaa, Ama komi. Ma komi chii ne teekwo ak kondaiywo emainnyu angook.

²¹ Amu kigoigei mestoweek tyong'ik, amata koteepse `icheek Kamuktaindet ne Toroor. Amu nooro, ko mata konyoor anyun kaberuret, ak kagiyesta keechiirekwak tugul.

²² Ogaso! Kigasei ng'aleek kobwanei, ak kirgirenet ne oo komang'une emetap murot kaataam, si kobiit koyai nganasoogap Judah koek karaatya, ole menyei lelwek.

²³ Ee Kamuktaindet ne Toroor, angen ale, ma po uu chii ortinwekyik; amaindochin chii kabwaatutikyik.

²⁴ Ee Kamuktaindet ne Toroor, itigoono, ago eng' kirwooget; ma eng' nereegeguk, si meyaa aek puch.

²⁵ Rong'ji nereegeguk che ng'woneen pororyosyek che ma ingenin, ak ortinwek che maguurei kaineng'ung'; amu kigoam Jakobo, ee, kigoam ineendet kogees ak Ki kong'em meng'ootennywa.