JAKOBO 5 - Bukuit Ne Tilil

Kateunet agobo mogorek che inyaliilisye

¹ Ogas anyun, okweek mogoreek, oriirye ak oteeiye amu nyalwogikwok che pwonjinok.

² Kagonunio mogornatosyekwok, ak kigoam kuutik ngoroikwok.

³ Kagong'emogis thahabusyekwok ak fedhaisyekwok; ak tuun egu ng'emisyennywa paornateet eng' okweek, ak tuun amei poorwekwok ko uu maat. Kaogonorchigei mogornateet eng' peetuusyek che po let.

⁴ Ogeero, poldos melekwegap kiboitiinik che kigesei mbareenikwok, che ki onamdegei: ak ki kochut iitiigap Kiptaiyatap Lugoosyek riiregap icheek che kigesei.

⁵ Ki omeng'iisye eng' ng'wony eng' kabaibaetapkei, ne ki obaibaegei maguutikwok; ki obai mugulelwekwok eng' peetuutap eng'seet.

⁶ Ki orwookyi, ak ki obar chiitap imanda; ama kirindook.

Muitaet eng' nyalilda

⁷ Omuite anyun, che kitupche, kot koit nyonunetap Kiptaiyat. Ogeero, igeni chiitap ko po mbareet logoek che myachen che po ng'wony, ak komuitoi agobo chooto, kot konyoor ropta ne po tai ak ne po let.

⁸ Omuite anyun ak okweek; ogimiit mugulelwekwok: amu kagoneegitit nyonunetap Kiptaiyat.

⁹ Among'unyng'ung'jige okweegei, che kitupche, si ma kirwookwok: ogeero, tononi kirwoogindet eng' taitap kurgotik.

¹⁰ Tupchosyechu, obwaat maotik che ki ng'alaal eng' kainetap Kiptaiyat, koek karogutyetap nyalilda ak muitaet.

¹¹ Ogeero, kiguure che kimuita che poiboen: ki ogas agobo muitaetap Job, ak ki ogeer kiit ne ki yai Kiptaiyat eng' let, ole nyiitaat rireenet Kiptaiyat, ak koriiregei.

¹² Ago ne siirei tuguuk tugul, tupchosyekyuk, ko matoyosye kipsengwet, anan ko ng'wony, anan ko eng' kayasyoet age tugul: ago ingoek ee neng'wong', ee, ak ingoek achicha neng'wong', achicha; si mobutyi kirwooget.

¹³ Mi chii eng' okweek ne nyalili? Ingosa. Mi ne paibai? Ingotyen kalasunet.

¹⁴ Miitei ne myani eng' kwenung'wong'? Ingoguur poisyegap kaniset; ak kosa icheek agobo ineendet, koiilee mwaita eng' kainetap Kiptaiyat:

¹⁵ ak kosoop saaetap kayaneet ineendet ne myani, ak kong'eet `Kiptaiyat ineendet; ak ngot ko ki koyai tengekwogik, kenyochi kaat.

¹⁶ Ong'aang'jige anyun kachiliilutikwok okweegei, ak osachinigei okweegei, si kobiit kisaabok. Toretisyei miising' saaetap chiito ne po imanda ngo saa eng' kagiiletapkei.

¹⁷ Ki chiito Elijah ne uu acheek, ak ki sa ko ki ilgei kole si ma robon; ak ma robonji ng'wony eng' kenyiisyek somok ak arawek lo.

¹⁸ Ak ki sa kogeny; ak kigon kipsengwet ropta, ak ki ii ng'wony logoekyik.

¹⁹ Che kitupche, ngot komi chii eng' kwenung'wong' ne mastoi eng' imanda, ak kowal chii ineendet;

²⁰ ko ingonai kole ineendet ne walei kiptengekyot kobagaakta mastaetap ooreennyi kosaru saboondo eng' meet, ak kotuchei tengekwogik che chaang'.