JAKOBO 2 - Bukuit Ne Tilil

Kateunet agobo kalotunet

¹ Tupchosyekyuk, amonam kayaneetap Kiptaiyandennyo Jeso Kristo, Kiptaiyatap toroornatet, eng' tiytiyetap piik.

² Ngot konyo chii ole otuiyechini ne tinyei peteiyot ne po thahabu, ak ngoroik che korooron, ak konyo agine kibananiat ne tinyei ngoroik che yaacheen;

³ ak ogonyit ineendet ne ilaachi ngoroik che korooron, oleenji, “Tebee yu myee,” ak oleenji kibananiat, “Tonon eng' yo,” anan “Itebee ng'wony yu po keelyekyuk,”

⁴ koma obesyegei okweegei, ak oegu che irwoochi che tinyei kabwaatutik che yaacheen?

⁵ Ogaso, tupchosyekyuk ak ko chamanikyuk; tos ki ma lewen Kamuktaindet che ponondos eng' ng'wony koek mogoreek eng' kayaneet, ak koek che nyooru laitornatet ne ki koarorchi icheek che chamei ineendet?

⁶ Ago kaosas kibananiat. Tos ma inyalilok mogoreek, ak kochuutok obe kapkirwoogutik?

⁷ Machubei icheek kainet ne po teegisto ne kimwaitaenok?

⁸ Ago ngot osulde Ng'atuutyetap kaplaitoryat, ko uu ye mwaei siruutik kole, “Cham chiitap kokweng'ung' ko uu ye ichamdoige,” oyae ne myee;

⁹ ago ngot otiytiy piik, ko kaoyai tengekto ak korwokwok Ng'atuutyet kole oo pistoik.

¹⁰ Amu chiito age tugul ne riibei Ng'atuutyet komugul, ak kobut eng' ng'olyoot agenge, konamei kirwooget eng' tugul.

¹¹ Amu ineendet ne ki mwa kole, “Amoipkei,” ko ki mwa agine kole, “Amerumisye.” Nooto anyun, ngot ko meyai ibeetapkei, ak irumisyei, ko kaiegu pistoindetap ng'atuutyet.

¹² Omwa ak oyai ko uu piik che tuun kirwookyin eng' ng'atuutyetap katyaknateet.

¹³ Amu ma tinyei kirwooget rireenetapkei eng' ineendet ne ma iboor rireenetapkei: itorooregei rireenetapkei kogirindoi kirwooget.

Kayaneet ak poisyonik

¹⁴ Kelu nee, tupchosyekyuk, ngot kole chii tinyei kayaneet, ama tinyei poisyonik? Komuuchi kayanonooto kosar ineendet?

¹⁵ Ngot komi aach ngor ng'eetap kamenng'ung', anan ko chepto ne otupche, ama tinyei amitwogik peetuut age tugul,

¹⁶ ak koleenji icheek age eng' okweek, Oba eng' kaalyeet, ocheeng' lalang'indo ak piyendo, ama ogoochi icheek tuguuk che machei poorto; kotoreti nee?

¹⁷ Ko kiit ne uu agine kayaneet, ngot koma tinyei poisyonik, ko meat ineegei.

¹⁸ Ago imuuchi komwa chiito kole, “Itinye inyee kayaneet, atinye anee poisyonik.” Iboorwo kayaneng'ung' ne ma tinyei poisyonik, si aboorun poisyonikyuk eng' kayaneet.

¹⁹ Iyani ile agenge Kamuktaindet; iyae ne myee: iyani ak icheek oik, ak kobotandos.

²⁰ Ago imache inai, ee, inyee chiito ne ma ii kiy, ile, kayaneet ne ma tinyei poisyonik ko soon?

²¹ Ki ma kiityi imanda kwandanyo Abraham eng' poisyonik, ye kingo koito weeriinnyi Isak eng' kaptisisyet?

²² Igeere ile kibois kayaneet kobooto poisyonikyik, ak ki ek kayaneet ne ititaat eng' poisyonik,

²³ ak ki isulda siruutyet ne mwaei koleen, Ki iyan `Abraham Kamuktaindet, ak ki kiityi ineendet nooto koek imanda; ak ki kiguure ineendet chorweetap Kamuktaindet.

²⁴ Ogeere ole kiityin chii imanda eng' poisyonik, ma kiityin eng' kayaneet ineegei.

²⁵ Ak ko uu nooto, tos ki ma kiityi Rahab chepkugoniot imanda agine eng' poisyonik, amu kitaach che kiga kiyookto, ak koweekta icheek kobun ooreet age?

²⁶ Amu ko uu ye meat poorto ne ma tinyei kabuuset, ko uu nooto kayaneet ne ma tinyei poisyonik, meat agine.