JAKOBO 1 - Bukuit Ne Tilil

Kagateet

¹ Jakobo, otwogindetap Kamuktaindet ak ko po Kiptaiyat Jeso Kristo, asirchini ortinwek taman ak aeng' che po piik che ki koiyestat, agatok.

Kayanet ak Utaatyet

² Tupchosyekyuk, oiit ole poiboiyet kityo ye konyooru yoomsosyek che teerchiin;

³ ongen ole ibu muitaet tyemetap kayaneng'wong'.

⁴ Ak ingoek muitaet ne tinyei poisyet ne ititaat, si kobiit oegu che ititaatiin ak ko nyiitootiin, che ma rartaat eng' kiy.

⁵ Ago ngot kobetyi chii age tugul eng' okweek utaatyet, ko ingosoom Kamuktaindet, ne igoochin tugul eng' aiyebindo ama kere kong'; ak kigoochin ineendet.

⁶ Ago ingosoom eng' kayaneet, amat kosage: amu ineendet ne sage ko kergei ak mildaetapkei ne po nyanjet ne mildoi usoonet koba komosi ak komosi.

⁷ Amat kobwaat chiichooto kole sichei kiy eng' Kiptaiyat,

⁸ chiitap kabwaatutik aeng', ne ma tononot eng' ortinwekyik tugul.

Nyeraatyet ak mogornateet

⁹ Ago ingobaibait ne tupchet ne ko nyeraat, eng' katoroorennyi:

¹⁰ ak ingobaibait mogoryot, amu kagiming'in: amu siirtoi ineendet ko uu taapteetap susweek.

¹¹ Amu charu asiista kobooto usoonet ne peelei tuguuk, ak kobeel susweek koresyo; ak kobutyo taaptokwak, ak kobet karaaranindap itoondanywa. Petei ko uu nooto agine mogoryot eng' ortinwekyik.

Yoomseet

¹² Paibai chiito ne muitoi eng' yoomseet: amu ye kagoterteer, kotaachei kuutweet ne po saboondo, ne ki iarorchi Kiptaiyat icheek che chamei ineendet.

¹³ Amat komwa chii ye kagiyoom kole kayooma Kamuktaindet. Amu ma yoomei Kamuktaindet yaityet, ama yoomei `ineendet chii age tugul.

¹⁴ Ago kiyoomei chii tugul, ye imuti magennyi ne ya, ak kichuuti,

¹⁵ ak ye kagomanach mageet ne ya, koii tengekto; ak ye kagoeet tengekto, koii meet.

¹⁶ Amat ongegenaak, chamanikyuk che kitupche.

¹⁷ Kagoitoet age tugul ne myee ak konunotyot age tugul ne ititaat ko po parak, choorugei eng' Kwanda ne po lapkeiyosyek, ne ma mi eng' ineendet kiit ne walaksei, anan ko urwet ne punu waletapkei.

¹⁸ Ki isichech eng' magennyi eng' ng'olyootap imanit, si kobiit keegu che tongoanigap yautikyik.

Kegas ak keyai

¹⁹ Ongen ng'olyoondoni, chamanikyuk che kitupche. Ago ingochepchebit chii age tugul kogas, amaek ne sip kong'alaali, ama sip konereechi:

²⁰ amu ma yaei nereegegap chii imandap Kamuktaindet.

²¹ Eng' nooto anyun omete simdo tugul ak chaang'indap yaitwogik, otaach eng' mutyonet ng'olyoot ne ki kimin, ne imuuchi kosar saboonwekwok.

²² Ago oegu che yaei ng'olyoot, amat oegu che kasei kityo, ogenegei okweegei.

²³ Amu ngot koek chii age tugul kasindetap ng'olyoot, ama ne yaei, ko uu chiito ne keerei togeennyi eng' kioit:

²⁴ amu keeregei, ak kwo, ak koutye eng' yooto kole ka chiito ne uu nee.

²⁵ Ago ineendet ne isyachi ng'atuutyet ne ititaat, ne po katyaknateet, ak koteptoi, amaek kasindet ne utye, ago yaindet ne poisyei, kiberuuri chiichito eng' poisyennyi.

²⁶ Ngo leen chii tinyei atebeet ne uu ne po kayanik, ama riibei ng'elyeptanyi ak koberberi muguleldanyi, ko puch kayaneetap chiichooto.

²⁷ Kayaneet ne tiliil ne ma tinyei murwoonindo eng' taitap Kamuktaindet Kwanda, ko ni: kowendi kogeerei che ma tinyei sigiikwak ak mosoogik eng' nyalildanywa, ak koriipkei ineendet eng' ng'wony koek ne ma tinyei tisya.