ISAIAH 9 - Bukuit Ne Tilil

Nyoonei Laitoryat ne poune imanda

¹ Ago ma mi mesundeito eng' emet ne ki tinyei pichiindo. Eng' peetuusyek che po tai, ko ki ipchi sasisyet emetap Zebulun ak emetap Naphtali, ago kiitoroor eng' peetuusyek che po let, ooreetap nyanjet, Jordan pitoniin, Galilaya ne po pororyosyek.

² Piik che kibendote mesundeito ko kogogeer lapkeiyet ne oo; icheek che ki menyei emetap urwetap meet ko nguno kogoluuchi lapkeiyet.

³ Ki ites pororyet, ki ites poiboiyennywa; poiboitu icheek eng' taing'ung' ko uu poiboiyet ne po kesisyet, ko uu piik che poiboitu ye pchei parunenik.

⁴ Amu koiiri chogitap lautyennyi, ak kirokto ne po tigikyennyi, ak kirokto ne po usiindennyi, ko uu eng' peetuusyegap Midian.

⁵ Amu kibeelei kweonik tugul che po chiitap lugeet eng' wasetapkei, ak ngoroik che ki isegei korotiik, egu tugul che laldos.

⁶ Amu kagisikwech lakweet, kagigoonech weeriit; ak ting'ee ineendet pounateet tigikyennyi. Kiguure kainennyi: “Kotigonindet ne po Kwong'uut, Kamuktaindet Ne po Kamuktaet, Kwanda ne po Koigeny, Pounindetap Kaalyeet.”

⁷ Pounatennyi ko tese tai agoi, ak kaalyeet koma mi ole igeesunegei Namei ng'echereet ne po laitornatetap Daudi ak laitornatennyi, si kogimit ak koboi eng' kirwooget ak imanda kobooch nguno agoi koigeny. Yaei kagiiletapkei ne po Kamuktaindet ne Toroor ne po lugoosyek niito.

⁸ Ki iyookyi `Kiptaiyat Jakobo ng'olyoot, ak kobutyi Israel.

⁹ Ak konai piik tugul, agot Ephraim ak che menyei Samaria, eng' menoteet ak eng' muguleldo ne ichaugei komwaei kole,

¹⁰ “Kagobutyo matubaruuk, ago kiteege koik che kiwaei; ki kiluul mogoonik, ago kigeere taragonik.”

¹¹ Ara anyun ing'eeti Kamuktaindet ne Toroor puunigap Rezin, kogirinda icheek, ak ko ki il puunikyik.

¹² Ing'eeti piigap Syria eng' tai, ak Philistiik eng' let; ak koam Israel eng' kutit ne iseng'eng'at. Nganda uu nooto, koma istogei nereegekyik, ago ta ko chuulaat eunnyi kora.

¹³ Nganda uu nooto koma weekyigei `piik ineendet ne kibir icheek, ama cheeng' Kamuktaindet ne Toroor ne po lugoosyek.

¹⁴ Tilei anyun Kamuktaindet ne Toroor metit ak katutyet eng' Israel, ebei temetap sosyoot ak mutwot peetuunak.

¹⁵ Metit ko poiyot ne konyitot; ak katutyet ko maotyot ne ineeti lembechek.

¹⁶ Amu ibeeti pichu icheeget che indochin ak keng'emei icheek che kindochin.

¹⁷ Maboiboitu Kamuktaindet ne Toroor eng' murenikwak, ama riiree chechwaak che ma tinyei sigiik ak mosoogikwak; amu ya age tugul ak ko yaindetap yaityet, ak komwaei kutit age tugul abusnateet. Nganda uu nooto, koma istogei nereegekyik, ago ta ko chuulaat eunnyi kora.

¹⁸ Amu lalei yaityet ko uu maat, igeesu katook che rutei piich ak che toorei piich: lalei eng' timiin ne oo, ak koiyen iyeto ne oo ne uu poolik che nyigiisen.

¹⁹ Ki kolal emet eng' nereegegap Kamuktaindet ne Toroor ne po lugoosyek, kagoigei piik kweenik che kilaali; ma riiree chii ng'eetap kamet.

²⁰ Wiriti age eng' komostap eutap tai, ak koamei rubeet; ak koam eng' komostap murot kaataam, ama piyang'dos icheek; amei chii age tugul panyeegap eunnyi.

²¹ Amei `Manasseh Ephraim, ak amei `Ephraim Manasseh; ak kogirindoi icheek tuwai Judah. Nganda uu nooto, koma istogei nereegekyik, ago ta ko chuulaat eunnyi kora.