ISAIAH 7 - Bukuit Ne Tilil

Isaiah ak Laitoryat Ahaz

¹ Eng' peetuusyegap Ahaz weeriitap Jotham, weeriitap Uzziah, laitoryatap Judah, kotogosta Rezin laitoryatap Syria, ak Pekah weeriitap Remaliah, laitoryatap Israel koba koleen kobookyi Jerusalem; ago ma imuuch koterteer.

² Ye kingo kas kootap Daudi keele kogonamgei Syria ak Ephraim ko ki potan muguleldo ne po Ahaz ak mugulelwegap piikyik ko uu ye itumdumi usoonet keetiigap timiin.

³ Ki mwachi anyun `Kamuktaindet ne Toroor Isaiah koleenji, ui anyun otuiye ak Ahaz, inyee ak Shear-jashup weeriing'ung', otuiyechi ole igeesunegei kererchetap tamboiyot ne po meto, ne mi ooreet ne oo ne po kooretap mwetindet,

⁴ ak ileenji ineendet, riipkei, ak isiis, ameiyweisye, anan kotanui muguleldang'ung', amu kegenganichu aeng' iyendos, amu nereegek che ng'woneen che po Rezin ak Syria, ak che po weeriitap Remaliah.

⁵ Amu kagochaamin Syria kobooto Ephraim ak weeriitap Remaliah, koleenjigei,

⁶ ongetogoste kebarge ak Judah, ak kinyalil ak keluuljige, si kinde nooto weeriitap Tabeel koek laitoryat,

⁷ kamwa ko uu ni Kiptaiyat Kamuktaindet ne Toroor, kole ma tononi niito, ama yaaksei.

⁸ Amu metitap Syria ko Damasko, ak metitap Damasko ko Rezin. (Ye tomo kogeskei kenyiisyek tamanwogik lo ak muut, ko tonaksei Ephraim si ma ko pororyet.)

⁹ Metitap Ephraim ko Samaria, ak metitap Samaria ko weeriitap Remaliah. Ngot ko moyan, koma koi ogimegitu.

Kaboorunet agobo Immanuel

¹⁰ Ki ng'alaalji `Kamuktaindet ne Toroor Ahaz kogeny koleenji,

¹¹ “Soom Kamuktaindet ne Toroor Kamuktaindeng'wong' kaboorunet; soom agot ngo miitei rireet, anan ngot komi parak miising'.”

¹² Ago ki mwa Ahaz kole, “Ma soome, amatyeme Kamuktaindet ne Toroor.”

¹³ Ak ki mwa Isaiah kole, “Ogas anyun, ee kootap Daudi! Tos kiit ne ming'in eng' okweek ogoochi piik kong'etyo, kot ogoochi Kamuktaindennyu kong'et agine?

¹⁴ Koonok anyun Kiptaiyat ineendet kaboorunet; ogeero, manachi pergeiyat, ak kosich weeriit, ak koguuree kainennyi Immanuel.

¹⁵ Amei ineendet mwaitap cheego ak kumyat, ye kagonai koeesyo yaityet, ak kolewen ne myee.

¹⁶ Amu kotom konai lakweet koeesyo ne ya, ak kolewen ne myee, kemetoi emet ne iweche laitorinikyik tuwai.

¹⁷ Ibun Kamuktaindet ne Toroor, kobooto piiguk, ak kootap kwandang'ung', peetuusyek che tomo kobiit, kobooch peetuut ne ki istoegei `Ephraim Judah; nooto laitoryatap Assyria.”

¹⁸ Ak eng' peetuunooto koititenji Kamuktaindet ne Toroor kalyang'ik che mi tabanwek che looen che po ainoosyegap Misiri, ak koititenji segemik che mi emetap Assyria.

¹⁹ Si kobwa, yeityo komuuny tugul eng' atebwosyek che ki koek surkwen, ak eng' ole ki kobetak eng' rwandosyek, ak eng' katok tugul, ak eng' ola tugul ole kiyagisye.

²⁰ Inemu metit Kamuktaindet ne Toroor eng' peetuunooto eng' rotweet ne ki alei, ne mi komoswegap aineet pitoniin, kobooto laitoryatap Assyria, inemu metit ak koroorigap keelyek, ak konem kogeny tamnet kogees.

²¹ Eng' peetuunooto, koyagi `chiito rooryat ak keechiirek aeng';

²² tuun amei ineendet mwaitap cheego amu tuun koonu icheeget cheego che chaang', amu tuun amei age tugul ne kang'et eng' emet, mwaitap cheego ak kumyat.

²³ Ak tuun piitu eng' peetuunooto katook che rutei piich ak che toorei piich eng' komosta age tugul, eng' ole ki mi keetiigap sabibuk eliphuut agenge che yamegei kamanuutyennyi ak fedhaisyek eliphuut.

²⁴ Wendi chiito olooto kotinyei kipchabonik ak kwanget, amu egu emonooto tugul katook che rutei piich ak che toorei piich.

²⁵ Moriikyini peetuunooto tuloonook tugul che mengeechen che ki kibat, amu oiywei katook che rutei piich ak che toorei piich, ago egu ole kiyage tuuga, ak ole tyechei keechiirek.