ISAIAH 6 - Bukuit Ne Tilil

Keguurei ak ki tiliili Isaiah

¹ Eng' kenyiit ne kimee Laitoryat Uzziah, ageer Kiptaiyat kotebee ng'echereetap laitornatet, kotoroor ak komi parak, ak ki nyi ngoryennyi Hekaluut.

² Ki tonondos seraphik eng' paragunnyi; ki tinyei age tugul kebebaik lo: kituge aeng' togeennyi, kotuge aeng' keelyekyik, ak kitirirene aeng'.

³ Ak kitwekyi `age age koleenji: “Tiliil, tiliil, tiliil, Kamuktaindet ne Toroor ne po lugoosyek; nyiitaat ng'wony komugul toroornatennyi.”

⁴ Ki itumdumgei lumeiywegap tugatugigap kurgeet amu tuugeetap ineendet ne kitwek, ak ki nyi koot iyeto.

⁵ Ki ale anyun, “Pwo eng' anee! Kaawong'uge, amu aa chii ne tinyei kutit ne ng'waan, ak ki meng'iisyei ak piik che ng'woneen kutusweek; amu kaageer Laitoryat, Kamuktaindet ne Toroor ne po lugoosyek.”

⁶ Kitirirenjo anyun age eng' seraphik, kotinyei ng'etetyot eng' eunnyi, ne ki inemune kanameiywot eng' kaptisisyet.

⁷ Ak kitwae kutinnyu, ak kole, “Keero, kagotwa kuting'ung' niito; kageisto tengektong'ung', ak kagiundo ng'oogistong'ung'.”

⁸ Ki agas kutitap Kiptaiyat koleen, “Ayookte ng'oo, ak ng'oo ne wendi agobo acheek?” Ki ale anyun, “Ami yu! Iyookto.”

⁹ Ak ki le, ui, ak imwachi pichu ileenji ogase iman, ago moguitosi; ak ogeere iman, ago monae.

¹⁰ Yai mugulelwegap pichu konyigiisitu, ak kotimogis itiikwak, ak kogerogis konyekwak, si ma keertoe konyekwak, ama kastoe itiikwak, anan koguiyo eng' mugulelwekwak, ak kowalogis, ak kisoop.

¹¹ Ki ateebee anyun, ale, “Ee Kiptaiyat, tyanitu?” Ak ki wol kole, “Agoi tuun koguber nganasook kot koma komi piik kooriik, ak koek emet kipkubere miising'

¹² ko kagouto `Kamuktaindet ne Toroor piik koba ole loo. Ak kochang'a emotinwek che kigemeto eng' emet.

¹³ Ak ngot kota komi kebeberta agenge eng' taman, keamei kogeny, keetit ne kiguure alayet anan keetit age ne uu tarakwet, che ng'etu musugikwak ye kageep.” Uu nooto musugyet, iyoteet ne tiliil ko tigitikyik.