ISAIAH 52 - Bukuit Ne Tilil

Nyooru Jerusalem toroornatet

¹ Ng'eet, ng'eet, ilaach kimnateng'ung', ee Zion; ilaach ngoroiguk che korooron, ee Jerusalem, nganaseet ne tiliil: amu kobooch nguno koma kobwanjinin che ma kimuratan ak che ma tiliileen.

² Lelekte temburyek; ng'eet, tebi ng'wony, ee Jerusalem: ityaach ratuutik che mi kaating'ung', ee cheptap Zion ne kigeluul.

³ Amu mwaei Kamuktaindet ne Toroor kole, ki kialdak puch; ak kityaachok ama eng' fedha.

⁴ Amu mwaei Kiptaiyat Kamuktaindet ne Toroor kole, ki choortagei piikyuk eng' tai koba Misiri koek toek eng' olooto: ak ki inyaliil icheek Assyrianindet puch.

⁵ Mwaei anyun Kamuktaindet ne Toroor kole, ayae nee eng' yu, amu ki kimut piikyuk puch? Iteitos icheek che pou, mwaei Kamuktaindet ne Toroor, ak kichubei kainennyu kotugul, peetuut komugul.

⁶ Nae anyun piikyuk kainennyu: naei anyun eng' peetuunooto kole anee ne ang'alaali; ogeero, anee.

⁷ Korooron ne tya eng' tuloonook, keelyegap ineendet ne ibu logoiywek che myach, ne mwaitoi kaalyeet, ne ibu logoiywek che myach che po myeeindo, ne mwaitoi yetunet; ne mwachin Zion koleenjin, Laitorani Kamuktaindeng'ung'!

⁸ Kutitap riibiguk! Waachei icheek, tyendos kibagenge; amu tuun keerei icheek togoch eng' togoch, ye weeksei Kamuktaindet ne Toroor konyonei Zion.

⁹ Oboiboitu, otyense tugul, okweek komoswek che kigemeto che po Jerusalem; amu kigogaigai `Kamuktaindet ne Toroor piikyik, ki kotyach Jerusalem.

¹⁰ Amu ki kobarta Kamuktaindet ne Toroor eunnyi ne tiliil eng' taitap pororyosyek tugul; ak keerei tabanwek tugul che po ng'wony yetunetap Kamuktaindennyo.

¹¹ Oba, oba, omande eng' olooto, amat otwaa kiy ne ma tiliil; omande eng' kwenunnyi; otiliiliitu, okweek che oibe tuguugap Kamuktaindet ne Toroor.

¹² Amu momandoi eng' kagirgiret, anan omwei: amu indoenok Kamuktaindet ne Toroor; ak letwok Kamuktaindetap Israel.

Nyalilda ak toroornatetap Otwogindet

¹³ Ogeero, poisyee otwogindennyu ng'omnateet, kieeti ak kitoroori, ak kotororit miising'.

¹⁴ Ko uu ye kikwong'enen che chaang', (ki king'em togeennyi kosiir ne po chii age tugul, ak ki king'em itoondanyi kosiir weeriigap piik,)

¹⁵ ibisi anyun pororyosyek che chaang'; namei kuut laitorinik amu ineendet: amu tuun keerei tuguuk che kitom kemwachi icheek, ak koguiyo tuguuk che kitom kogas.