ISAIAH 49 - Bukuit Ne Tilil

Otwogindetap Kamuktaindet ne Toroor

¹ Ogasa, ee ngeguusyek; ak oep iit, okweek pororyosyek che omi ole loo; kiguura Kamuktaindet ne Toroor kobooch ami moo; ki mwa kainennyu kobooch ami moetap kamennyu:

² ak ki koyai kutinnyu koigei rotwetap chok ne ng'atip, kiung'ena urwetap eunnyi; ki koyaa aek irumet ne ki kisit, kigoung'ena motyennyi:

³ ak ki leenjo, ii otwogindennyu; ee Israel, ne kitoroorena.

⁴ Ago ki amwa ale, Ki abirtegei puch, ki aboisyee kimnateennyu puch, ak eng' tangoita; ago iman, mi kirwoogennyu eng' Kamuktaindet ne Toroor, ak mi yaaktaennyu eng' Kamuktaindennyu.

⁵ Mwaei anyun Kamuktaindet ne Toroor ne kimimia kobooch ami moo aek otwogindennyi, si kobiit amutyi ineendet Jakobo kogeny, ak kiyumji Israel ineendet: (amu aa konyitot eng' taitap Kamuktaindet ne Toroor, ak kagoek Kamuktaindennyu kimnateennyu:)

⁶ ee, mwaei kole, kiy ne ming'in iegu otwogindennyu, si kobiit ing'eet pororyosyek che po Jakobo, ak iweech che ki kiriip che po Israel: agoonin kogeny iegu lapkeiyetap Pororyosyek, si kobiit iegu yetunennyu agoi ole poochin ng'wony.

⁷ Mwaei ko uu ni Kamuktaindet ne Toroor, katyagindetap Israel, ak ko Nenyi ne Tiliil, ineendet ne sasei piik, ineendet ne wechei pororyet, ne otwogindetap pounik: Tuun keerei laitorinik ak kong'eetyo; ak kogutung'so pounik; amu Kamuktaindet ne Toroor ne kiyani, Ineendet ne Tiliil ne po Israel, ne ki lewenin.

⁸ Mwaei Kamuktaindet ne Toroor kole, ki awolun eng' peetuut ne chamaksei, ak ki atoretiin eng' peetuutap yetunet: ak ariibin, ak agoonin iegu arorutyetap piik, si ilang'u emet, si igoochi kobore porotosyek che ki mi puch;

⁹ koleenjin icheek che ratotiin, Omande; ak koleenjin che mi mesundeito, Obartegei. Amisyoti eng' ortinwek, ak egu komoswek che torooreen ole churat, ole ki agete.

¹⁰ Ma kasei rubeet anan koam melelda; ama kobeelei icheek maat, anan kobir asiista: amu indochin icheek ineendet ne riiree, imuti kobun kong'igap peek.

¹¹ Ak ayae tuloonookyuk tugul koek ooreet, ak kotororitu ortinwekyuk che eecheen.

¹² Ogeero, punu chu ole loo: ak ogeero, punu chu murot kaataam ak cherongo; ak punu chu emetap Sinim.

¹³ Otyense, ee kipsengwet; ak oboiboitu, ee ng'wony; ak otyense, ee tuloonook; amu kagogaigai `Kamuktaindet ne Toroor piikyik, ak koriiree piikyik che ki kinyalil.

¹⁴ Ago ki mwa Zion kole, ki kometa Kamuktaindet ne Toroor, ak kigoutyeno Kiptaiyat.

¹⁵ Tos imuuchi kwondo koutye lakweennyi ne chuchuni, kot koma riiree weeriit ne kisichei? Ee, imuuchi chuuto koutye, ago mautyenen.

¹⁶ Keero, ki asirchin rubeitap eunekyuk; mi tainnyu kotugul irimoiguk.

¹⁷ Igirgiri lagoguk; mandaenen ng'emiguk, che yain iguber.

¹⁸ Ing'eet met ak igeer komoswek tugul: iyumigei chuuto tugul, ak kobwonjin. Mwaei Kamuktaindet ne Toroor kole, ko uu ye asabe, iman, ilaachi tuguuchooto tugul ko uu kiit ne po lelesta, ak igermenegei icheek, ko uu ye kermenigei murereet.

¹⁹ Amu mariigitu komosweguk che kigemeto, ak che ki koguber, ak emeng'ung' ne kigeng'em, iman mariigityin piik che menyei, ak kolooegitu icheek che kiluguin.

²⁰ Tuun igase komwaei lagoguk che isiche, ko kagobek alak, koleen, mariich olito eng' anee: istowage si kobiit ameng'iis.

²¹ Yeityo imwa eng' muguleldang'ung' ileen, Kisikwa ng'oo chuuto, amu ki kobegunena lagokyuk, ak ami aneege, ak kigeluula, ak aombenoti? Ak ng'oo ne ki igu chuuto? Keero, ki kibagaakta aneege; kimi ano chuuto?

²² Mwaei Kiptaiyat Kamuktaindet ne Toroor kole, ogeero, atokyini eunnyu pororyosyek, ak aboorchi piik songolyennyu: si koganap weeriiguk, ak kimut tiibiiguk eng' tigigoikwak.

²³ Ak koek laitorinik kwanisyeguk che iguin, ak koek osotigap laitorinik kametwogiguk che iguin: kutung'jinin icheek kot koit togoochikwak ng'wony, ak komel temburyek che mi keelyeguk; ak inai ile aa Kamuktaindet ne Toroor, ma ililandos icheek che igeno.

²⁴ Tos kirebe ne kiim tuguuk che kiluul, anan kityaachi luulenik che ki kiluul eng' imanda?

²⁵ Ago mwaei Kamuktaindet ne Toroor kole, kirebe che kiimeen luulenikwak, ak kityaachi tugul che ki kiluulei, che po che imuisei: amu kibortosi ak ineendet ne poryenen, ak asaru lagoguk.

²⁶ Ak abae icheek che usin poorwekwak; ak kobogityo eng' korotiikwak, ko uu ye pogiti chii eng' divaik che leelachen: si konai piik tugul kole, aa Kamuktaindet ne Toroor yetindeng'ung', ak ko katyagindeng'ung', Ineendet Ne po Kamuktaet ne po Jakobo.