ISAIAH 47 - Bukuit Ne Tilil

Kabutetap Babilon

¹ Choruge ak itebee temburyek, ee inyee ne ii chepto ne pergeiyat ne po Babilon; tebee ng'wony, ye ma mi ng'echereetap laitornatet, ee cheptap Kaldeik: amu ma keguurenen kogeny ne cheptalbisyo ak ko ng'arng'ar.

² Nam koitap pai, ak ing'aa peek: ng'aany meting'ung', ireegu ngoryeeng'ung' ne kooi, ng'aany keeldo, ak ilandae ainoosyek.

³ King'aanyin itebi aach ngor, ee, taagu teweernateng'ung': ayaaktoi mugetuut, amataache chii age tugul.

⁴ Katyagindennyo, kainennyi ko Kamuktaindet ne Toroor ne po lugoosyek, Ineendet ne Tiliil ne po Israel.

⁵ Tebi eng' siisek, ak iwe mesundeito, ee cheptap Kaldeik: amu ma keguurenen kogeny Chebyosetap laitornatosyek.

⁶ Ki anereekyi piikyuk, ki amurwon poortannyu, ak ki ande icheek eung'ung': ma iriiree agot kitigin; ki igesenji che ki koosegitu choging'ung' ne nyigiis miising'.

⁷ Ak ki imwa ile, Aegu chebyoset agoi; kot ko mata inde tuguuchuuto muguleldang'ung', amata ibwaat kagesunennywa.

⁸ Kas niito anyun, inyee ne ichame ureryosyek, ne imeng'iisyei, ameiiti kiy, ne imwae eng' muguleldang'ung' ile, Aneendet, ama mi age kobatena; matebye ko uu kwony ne ki kosiirtoe manong'otyot, ama pegunena lagok:

⁹ ago cheein tuguuchuuto aeng' peetuunak, pegu lagok, ak kobiit mosoknateet: pwonjinin ko nyiitootiin, agot ngo chaang' orgoinatosyeguk, ak ko ng'iisyat ng'oorsosyeguk.

¹⁰ Amu ki imang'u sogornateng'ung'; ki ile, Ma mi chii ne keera; ki komaasin utaatyeng'ung' ak naeng'ung': ak ki imwa eng' muguleldang'ung' ile, Aneendet, ma mi age kobatena.

¹¹ Nyonjinin anyun yaityet; memuuchi igirinde: ak ibutyinin pichiindo, memuuchi iiste: ak kochein ng'emisyet, ne mengen.

¹² Tonon anyun nguno itinye ng'oorsosyek, kobooto chaang'indap orgoinatosyeguk, che ki ibirtochigei kobooch ko ii ming'in; ngo tos imuuchi inyoorunee kelunet, ngo tos imuuchi iterteerisye.

¹³ Ki ing'eet eng' chaang'indap kirwoogutiguk: ingotononso anyun ng'amotigap kecheik, ak keerigap kecheik, ng'amotigap arawet age tugul, kosaruun eng' tuguuk che pwonjinin.

¹⁴ Keero, igeitu mobeek; peelei maat; masarugei eng' kimnateetap maat ne lalei; ma egu nesek che kiyue, ama egu maat ne kitebee tainnyi.

¹⁵ Uu nooto anyun tuguuk che ki ibirtochigei: ombenoti icheek che kiyaei mung'aaret kobooten, kobooch ko ii ming'in, wendi age tugul komostanyi: ma piitu ne saruun.