ISAIAH 40 - Bukuit Ne Tilil

Kagaigaet ne po piigap Kamuktaindet

¹ Ogaigai, ogaigai piikyuk, mwaei Kamuktaindeng'wong'.

² Ong'alaalji Jerusalem eng' kagaigaet, ak omwachi eng' kutit ne oo oleenji, kagogeskei poryennyi, kagenyochi kaat tengektanyi. Kagotaach eng' eutap Kamuktaindet ne Toroor pireet konyil aeng' agobo tengekwogikyik tugul.

³ Tuugeet ne kuursei koleen: “Ochopchi ooreetap Kamuktaindet ne Toroor eng' surkwen, olitiityi ooreet ne oo Kamuktaindennyo eng' ong'ateet.

⁴ Tuun kiloong'u atebweet age tugul, ak tuun kiripribi tulweet age tugul ne oo ak ne ming'in. Tuun kilititi che kunuuren, ak kichabai komoswek che sing'ortot.

⁵ Ak tuun king'aanyei toroornatetap Kamuktaindet ne Toroor, ak keerei piik tugul niito; mwaei Kamuktaindet ne Toroor niito.”

⁶ Mwaei tuugeet kole, “Waach!” Ale, “Awaakyi nee?” Susweek poorwek tugul, ak uu taaptook che po keeweet karaaranindanywa tugul.

⁷ Restos susweek ak kobetos taaptook, amu usyin kabuusetap Kamuktaindet ne Toroor. Susweek piik iman.

⁸ Restos susweek ak kobetos taaptook; ago tononi koigeny ng'olyootap Kamuktaindennyo.

⁹ Togoste tulweet ne kooi ee Zion, inyee ne imwatoi logoiywek che myach; waach miising' eng' kimnateet ee Jerusalem, inyee ne imwachini logoiywek che myach; waach, ameiywei; mwachi nganasoogap Judah ileenji, ogeer, Kamuktaindeng'wong'!

¹⁰ Ogeero, nyoonei Kiptaiyat Kamuktaindet ne Toroor ko uu ineendet ne kiim, ak kobounisyei eunnyi agobo ineendet; mi melektanyi kobooto ineendet, ak mi yaaktaennyi tainnyi.

¹¹ Paei keechiirekyik ko uu mestowot, iyumi eunnyi aaregap keechiir, ak komute tegeennyi, ak kondochi mutyo che aboen.

¹² Ng'oo ne kiger peek kogeer ole tee eng' rubeitanyi, ak kokwa kipsengwet eng' moriikyik, ak konai ole tee temburyegap ng'wony eng' karagendoet, ak korogendo tuloonook eng' ratilisyek, kobooto tuloonook che mengeechen eng' kiit ne kirogendoisye?

¹³ Ng'oo ne ki indochi Kabuusetap Kamuktaindet ne Toroor, anan ng'oo kaneetindennyi ne ki ineet ineendet?

¹⁴ Ki ng'alaal ak ng'oo, ak ki ineet ng'oo ineendet, ak koneet ineendet eng' ooreetap kirwooget, ak koneet naet, ak koboorchi ineendet ooreetap kaguiyet?

¹⁵ Ogeero, uu pororyosyek peek che kasaita konyil agenge eng' tereet, ak kiiti ko uu temburyek che tutigin che mi kiit ne kirogendoisye: ogeero, inemu ngeguusyek ko uu kiit ne ming'in miising'.

¹⁶ Ak mayamei kweenigap Lebanon kilaal, ama yamei tyong'igap olooto koek kagoochinet ne kibeelei.

¹⁷ Uu puch pororyosyek tugul eng' tainnyi; kiiti icheek keele uu puch eng' ineendet, ak tangoita.

¹⁸ Orogendoi ng'oo anyun Kamuktaindet? Anan nee kergeindo ne orogendoi ineendet?

¹⁹ Ichooti musogindet tuguuk si kobiit kowai kanamwet, ak koliige kitang'indetap thahabu kanamwonooto thahabu, ak kotang'ji sirimwegap fedha.

²⁰ Chiito ne panan miising' agobo kagoochinet ne uu nooto, ne kinamjin parak, koleweni keetit ne manunei; cheeng'jingei musogindet ne ng'oom si kolumda kanamwet ne kiwaei, ne ma king'ei.

²¹ Tos tomo onai? Tos tomo ogas? Tos tomo kemwaiwok kobooch taunet? Tos tomo oguiye kobooch ngap kelumda lumeiywegap ng'wony?

²² Ineendet ko ne tebee ole pooch yiemutyetap ng'wony, ak uu che menyei olooto, talamik; ne iitoi kipsengwet ko uu angeet, ak koiito kipsengwetisyechooto ko uu emait ne ki menyei:

²³ ineendet ne yaei cheptap laitoryat koek puch, ak ne yaei kirwoogigap ng'wony koek tangoita.

²⁴ Ki ma kemiine chooto, ee ki ma kegoolei chooto; ee ki ma nam ng'wony tigitikwak, si koguut ineendet icheek, ak koresyo, ak koip kipchurchuryet icheek ko uu mobeek.

²⁵ Orogendoa ng'oo anyun, kot kegergeitu ak ineendet? Mwaei Ineendet ne Tiliil.

²⁶ Onyal parak, ogeer ole ng'oo ne ki toi koyai chuuto, ne imutu lugeennywa kobee koitet: kuurei tugul eng' kainaikwak, eng' ooindap kamugennyi, ak kiim ineendet eng' kamuktaet, ma peet agot agenge.

²⁷ Amu nee si ile inyee Jakobo, ak ing'alaali, ee Israel, ile, Ung'aat ooreennyu eng' Kamuktaindet ne Toroor, ki kosiirto kirwoogennyu ama mage kiy Kamuktaindennyu?

²⁸ Tos tomo inai? Tos tomo igas? Manyaluli, ama ng'etei Kamuktaindet ne po koigeny, ineendet Kamuktaindet ne Toroor, Yaindetap ng'wony komugul; ma isyachaksei naennyi.

²⁹ Igoochin kimnateet ne nyaluli; ak tesyin kimnateet ineendet ne ma tinyei kamuget.

³⁰ Nyaluldos ak kong'etos agot neranik, ak kobutyo murenik:

³¹ ago nyooru kimnateet ne leel icheeget che igeni Kamuktaindet ne Toroor; togostoi kotirirendos ko uu kipsichinik; rwaei, ama ng'etos; pendoti, ama nyaluldos.