ISAIAH 39 - Bukuit Ne Tilil

Piik che ki punu Babilon

¹ Ki iyookyi eng' peetuusyechooto Merodak-baladan weeriitap Baladen laitoryatap Babilon paronok ak kagoochinet, Hezekiah: amu ki kas kole kiga komyan, ak kigosap.

² Ak ki paibait Hezekiah agobo tuguuchooto, ak ki iboorchi icheek kootap tuguukyik che po kamanuutyet ne oo, fedha, ak thahabu, ak nyamdutik, ak mwanik che korooron miising', ak koot tugul ne po kariikyik, kobooto tuguukyik tugul che konorotiin: ma ng'et kiy eng' koonnyi, anan eng' pounatennyi, ne ma iboorchi Hezekiah pichooto.

³ Ki nyo anyun `maotyot Isaiah kaplaitoryat Hezekiah, ak koteebe koleenji, kale nee pichu? Kobunu ano kobwanei oling'ung'? Ak ki le Hezekiah, Kabwa olinnyu kobunu emet ne loo, emetap Babilon.

⁴ Koleenji anyun, Kageer nee eng' koong'ung'? Ak ki wol Hezekiah kole, kageer tuguuk tugul che mi koonnyu: ma mi kiy eng' konoraikyuk ne ma aboorchi icheek.

⁵ Koleenji anyun `Isaiah Hezekiah, Kas anyun ng'olyootap Kamuktaindet ne Toroor ne po lugoosyek.

⁶ Keero, pwoonei peetuusyek che tuun ki ibei tuguuk tugul che mi koong'ung' koba Babilon, kobooto che ki konor kwanisyeguk agoi ra: ma mi kiy ne ng'etu, mwaei Kamuktaindet ne Toroor.

⁷ Ak komuti alak eng' weeriiguk che mong'unenen, che isiche; ak koba koek icheek kiptainik eng' kootap laitoryatap Babilon.

⁸ Koleenji anyun Hezekiah Isaiah, Myee ng'olyootap Kamuktaindet ne Toroor ne kemwa. Ki mwa kogeny kole, amu mi kaalyeet ak imanit eng' peetuusyekyuk.