ISAIAH 37 - Bukuit Ne Tilil

Koteebse `Hezekiah Isaiah

¹ Ak kingo kas Laitoryat Hezekiah, kogereer ngoroikyik, ak kotugegei kuniok, ak kwo kootap Kamuktaindet ne Toroor.

² Ak koyookto Eliakim ne ki pou koot, ak Sebna siriindet, ak poisyegap tisiik, kotugotegei kuniok, koba ole mi Isaiah maotyot, weeriitap Amos.

³ Ak ki leenji ineendet, Kamwa Hezekiah kole, peetuuni ko peetuutap nyalilda, ak kereetap kong', ak chubisyet: amu kait kesich lagok, ama mi kimnateet ne kesige.

⁴ Abeere imuuchi kogas Kamuktaindet ne Toroor Kamuktaindeng'ung' ng'aleegap Rabsake, ne kagoyok laitoryatap Assyria kiptaiyandennyi, konyo kochot kamuktaindet ne sabei, ak koger kong' ng'aleek che kagas Kamuktaindet ne Toroor Kamuktaindeng'ung': ara anyun saa agobo piik che ng'etunotiin.

⁵ Kobwa anyun otwogigap Laitoryat Hezekiah ole mi Isaiah.

⁶ Ak ki leenji Isaiah icheek, Omwachini kiptaiyandeng'wong' ko uu ni, oleenjini, Kamwa Kamuktaindet ne Toroor kole, meiywei ng'aleek che kegas, che kachubena otwogigap laitoryatap Assyria.

⁷ Keero, ayaei ineendet ko kas ng'aleegap piik, ak koweek kwo emennyi; ak agoite kebar eng' rotwetap chok eng' emennyi.

Kogoonu kogeny ng'aleegap kabookyinet piigap Assyria

⁸ Koweek anyun Rabsake, ak koitita kobaregei laitoryatap Assyria ak Libna: amu kiga kas kole kikwa eng' Lakish.

⁹ Ak ki kas kemwaei agobo Tiraka laitoryatap Kush, keele, Kogonyo obargei. Ak kingo kas koyookto piik koba kap Hezekiah, koleenji,

¹⁰ omwachini Hezekiah, laitoryatap Judah, oleenjini, Amengoberberin Kamuktaindeng'ung' ne imang'u, koleenjin, Ma kigoitoi Jerusalem kwo eutap laitoryatap Assyria.

¹¹ Keero, ki igas kiit ne ki yachi laitorinigap Assyria emotinwek tugul, eng' ng'emet ne king'em icheek kogees: kesaruun inyee?

¹² Tos ki sar icheek kamuktaigap pororyosyek, che ki par kwanisyekyuk, Gosan, ak Haran, ak Resep, ak lagogap Eden che ki mi Telasar?

¹³ Mi ano laitoryatap Hamath, ak laitoryatap Arpad, ak laitoryatap nganaseetap Separbaim, ne po Hena, ak Iba?

¹⁴ Ak ki nam Hezekiah parweet eng' eutap piik che kiga kiyok, ak kosoman: ak kitogosta Hezekiah kwo kootap Kamuktaindet ne Toroor, ak koiito parwaanooto eng' taitap Kamuktaindet ne Toroor.

¹⁵ Ak ki sa Hezekiah Kamuktaindet ne Toroor kole,

¹⁶ Ee Kamuktaindet ne Toroor ne po lugoosyek, Kamuktaindetap Israel, ne tebee kerubisyek, ii Kamuktaindet, inyee inyegei, ne po laitornatosyek tugul che po ng'wony; ki iyai kipsengwet ak ng'wony.

¹⁷ Ep iit, ee Kamuktaindet ne Toroor, ak igeer; ak kas ng'aleek tugul che po Sennacherib, che kagoyok kochote Kamuktaindet ne sabei.

¹⁸ Iman, Kamuktaindet ne Toroor, ki kobar laitorinigap Assyria, emotinwek tugul, ak emennywa,

¹⁹ ak ki kowiirchi ma kanamonikwak: amu ki ma ko kamuktaik, ago kiboisyetap eunegap piik, keetit ak koik; king'em anyun icheek tuguuchooto amu nooto.

²⁰ Ara anyun, ee Kamuktaindet ne Toroor, Kamuktaindennyo, sarwech eng' eunnyi, si konai laitornatosyek tugul che po ng'wony kole ii Kamuktaindet ne Toroor, inyee inyegei.

Koyokyin ng'olyoo `Isaiah laitoryat

²¹ Koyookto anyun Isaiah weeriitap Amos chiito kwo kap Hezekiah, koleenji, kamwa Kamuktaindet ne Toroor, Kamuktaindetap Israel, kole, Ko uu ye kaisaa agobo Sennacherib laitoryatap Assyria,

²² ni ng'olyoot ne kagomwa Kamuktaindet ne Toroor agobo ineendet: Kasasin pergeiyat cheptap Zion, ak kororechin kochotin; kagolelech metinnyi cheptap Jerusalem eng' inyee.

²³ Ak ng'oo ne ki ichot ak ichup? Ak ng'oo ne ki ibolji ak injurur? Nooto ko Ineendet ne Tiliil ne po Israel.

²⁴ Koichot Kiptaiyat eng' otwogiguk, ak koile, Anyoone kot aitu paragutap tuloonook kobooto chaang'indap kariisyekyuk, kot aitu oriit eng' Lebanon; ak aluul taragonikyik che kooen, ak piribirinikyik che korooron: ak achute komosta Ne Toroor Miising', timdap mbareennyi ne rurei.

²⁵ Ki abal ak aee peek, ak ateeny ainoosyek tugul che po Misiri eng' keldebesaigap keelyekyuk.

²⁶ Tom igas ole ki ayaite ko uu nooto keny, ak ayai eng' peetuusyek che po keny? Ara kaasulde nguno, si kobiit ibut nganasook che ng'ootaatiin koek karurugutik che ki king'em.

²⁷ Ki ek anyun piik che ki menyei nganasochooto, che tinyei kimnateet ne ming'in, kimeiyo mugulelwekwak ak kokwong'yo; ki igei susweegap keeweet, ak koigei sogeek che ng'orng'or, ak koigei susweek che mi kooriik parak, ak ko uu mbareetap peek kotomo koeegitu.

²⁸ Ago angen kabuureng'ung', ak mandaeng'ung', ak nyonuneng'ung' ne inyone ko, ak nereegeguk che koroomen agobo anee.

²⁹ Amu nereegeguk che koroomen agobo anee, ak amu kogoit itiikyuk loseng'ung' pogei, andoi anyun kombet serung'ung', ak ande karnennyu kuting'ung', ak aweechin ibun ooreet ne kebunu.

³⁰ Ak egu ni kaboorunet ne kiboorun: oame eng' kenyini che piitos icheegei, ak oam eng' kenyiitap aeng' che syegune chooto; ak eng' kenyiitap somok, ogol, ak oges, ak omin keetiigap sabibuk, ak oam logoekwak.

³¹ Ak piitos kogeny kobendi ng'wony tigitigap che ng'etu che chilildos che po kootap Judah, ak koiiyo logoek eng' parak.

³² Amu mandoi eng' Jerusalem che kang'et, ak chilildos eng' tulweetap Zion: yaei niito kagiiletapkei ne po Kamuktaindet ne Toroor ne po lugoosyek.

³³ Mwaei anyun Kamuktaindet ne Toroor agobo laitoryatap Assyria, kole, ma itu ineendet nganasani, ama mwogei yooto eng' kipchabet, ama nyoonei tainnyi kotinyei long'eet, ama wasyin ng'ung'unyek.

³⁴ Weegegei ooreet ne kibunu, ama itu nganasani, mwaei Kamuktaindet ne Toroor.

³⁵ Amu ariibe nganasani, asaru, agobo anee, ak agobo Daudi otwogindennyu.

³⁶ Ak kimanda malaikaiyatap Kamuktaindet ne Toroor, ak kobar piik eliphuusyek pogol ak tamanwogik sisiit ak muut eng' nganaseetap piigap Assyria: ak kingo ng'eetyo piik karon, ogeero, kimuuswek tugul, che kogobek.

³⁷ Kwo anyun Sennacherib laitoryatap Assyria, koweek ak kwo komeny Nineveh.

³⁸ Ak ye kita kosaaei eng' kootap Nisrok kanamwennyi, kobar ineendet weeriikyik Adramelek ak Sareser eng' rotwetap chok: ak komwei koba emetap Ararat. Ak ki laitoran Esarhaddon weeriinnyi kogeer ineendet.