ISAIAH 35 - Bukuit Ne Tilil

Poiboiyetap che saruunotin

¹ Ingogaskei surkwen ak melewet, ak kobaibait emet ne ong'ateet, ak koiye ko uu taapteet.

² Yiei miising', ak kobaibait eng' poiboiyet ak eng' tyendo; kigoochin toroornatetap Lebanon, telunatetap Karmel ak Saron. Keerei icheek toroornatetap Kamuktaindet ne Toroor, telunatetap Kamuktaindennyo.

³ Ogimiit eunek che nyalulyotin, ogiil kutung'oik che ma kiimeen.

⁴ Oleenji icheek che aragendos, “Ogimegitu, amoiyweisye! Keero nyoonei anyun Kamuktaindeng'wong' ak yaaktaetap mugetuut, kobooto kageeretap Kamuktaindet; nyoonei kosarwok.”

⁵ Ak koit koyatagis anyun konyegap che koryotiin, ak koyatagis itiik che timotin.

⁶ Yeityo kotoromben chiito ne ing'wali ko uu cheptirgichet, ak kotyen ng'elyeptap ne namaat kuut. Amu kuutu peek eng' surkwen, ak kobiit kereruusyek eng' surkwen.

⁷ Ak koek `ng'aniek che ilyeldos tamboiyot ak koek `emet ne yaamaat kong'igap peek. Ak eng' ole ki menyei lelwek, ko egu `susweek saoset ak mutweek.

⁸ Ak kobiit ooreet ne oo eng' olooto, ak kiguure oranooto Ooreetap Tiliilindo. Ma punei oranooto che ma tiliileen ama tyechei oranooto agot che perber.

⁹ Ma piitu ng'etundo eng' olooto, ama punei oranooto tyondo age tugul ne koroom, ma kinyoorchin olooto; ago punei olooto che ki kityaach.

¹⁰ Ak koweek piigap Kamuktaindet ne Toroor che ki kityaach, ak kobwa Zion kotyenonu. Ak kotebee paragunnywa poiboiyetap koigeny, nyooru kagasetapkei ak poiboiyet, ak komwei arageneet ak tigenoik.