ISAIAH 34 - Bukuit Ne Tilil

Kirwooget ne ityin Pororyosyek

¹ Oriigu okweek pororyosyek, si ogas; ak oep iit okweek piik! Ingogas emet, ak tuguuk che nyiitaat olooto; ng'wony ak tuguuk tugul che mang'une.

² Amu tinyei Kamuktaindet ne Toroor nyitatet agobo pororyosyek tugul, ak nereegek che laldos agobo lugosyekwak tugul; Ki kong'em icheek kogees, ki kogoito icheek kebar.

³ Ki wiirtoi piikwak che kigebar, ak puldos muuswekwak, ak kochootyo tuloonook amu korotiikwak.

⁴ Ak kochoot lugeet tugul ne po kipsengwet, ak kemaman kipsengwet ko uu kartasit. Ak kowandagei lugeennywa tugul, ko uu sogoot ne ibuti eng' keetitap sabibuk, ak ko uu sogoot ne ibuti eng' mogoywet.

⁵ Amu ki koee rotwennyu po chok eng' kipsengwet kot konyi, ogeero, choorchingei Edom, ak choorchingei piik che ki achup, kirwookyi.

⁶ Nyiitaat korotiik rotwetap chok ne po Kamuktaindet ne Toroor, kigo akwait eng' akwaindo, eng' korotiigap aaregap keechiir ak ng'oroorek, kobooto mwanigap soromok che po mengichik. Amu tinyei Kamuktaindet ne Toroor tiseiywot eng' Bosra, ak parisyet ne oo eng' emetap Edom.

⁷ Ak ki choorgei soenik kobooto icheek, kiruugik che mengeechen kobooto kiruugik che eecheen. Ak kobogite emennywa korotiik, ak ko akwaitu temburyekwak eng' akwaindo.

⁸ Amu peetuutap Kamuktaindet ne Toroor ne po yaaktaetap mugetuut, kenyiitap kageeret ne po toiyetap Zion.

⁹ Ak kewal kereruusyekyik koek manget, ak kewal temburyekyik koek koik che laldos, ak koek emennyi manget ne lalei.

¹⁰ Ma kimisi kemoi anan peet; togostoi iyetanyi koigeny. Egu karaatya kobooch ibinda age agoi ibinda age; ma punei chii yooto koigeny ak koigeny.

¹¹ Ago punjin chebo kibabaa ak chepswererit; ak komeny olooto sugurut ak chepkugit. Ak kochuul eng' paragunnyi porowetap toiyet, ak porowet ne po puch ne po kalititisyet.

¹² Kuurei icheek piik che taagunotiin kobwa laitornatet, ago ma piitu chii eng' olooto; egu puch pounikyik tugul.

¹³ Ak kobitye katok kooriikyik che po laitorinik, ak kobitye siwek ak katook che rutei piich irimoikyik. Ak koek meng'ootetap lelwek, ak seremutap tyong'igap songolik.

¹⁴ Ak kotuiyo tyong'igap surkwen ak suik, ak kowaach kwesta kowaakyi chorwennyi; ee, tebee olooto sugurut ne po kemoi, ak kosikyigei ole imuung'ee.

¹⁵ Ak koteekyigei eng' olooto sugurut ne oo keswennyi, ak kolok, ak kogeeny, ak koyumji aarekyik urwennyi; ee, iyumjigei olooto keerosyek, age tugul ak koget.

¹⁶ Ocheeng' ak osoman eng' bukuitap Kamuktaindet ne Toroor: Ma petei agot agenge eng' chuuto, ma mi ne rartae koget. Amu kang'at kutinnyu, ak kagoyum icheek kabuusennyi.

¹⁷ Kigoseer parbareek agobo icheek, ak kigopchechi icheek eunnyi eng' porowet; punjin icheek agoi, menyei olooto kobooch ibinda age agoi ibinda age.