ISAIAH 33 - Bukuit Ne Tilil

Maonateet agobo katyaknateet eng' puunik

¹ Pwo eng' inyee ne ing'emisyei, ama king'emin; ak ne iberberisyei, ama iberberin icheek! Ye ma ing'emisyei, keng'emin, ak ye ma iberberisyei, koberberin icheek.

² Ee Kamuktaindet ne Toroor, rirenech; ki kigenin. Egu kimnateennyo eunnyo karonet age tugul, ak iegu yetunennyo agine eng' peetuutap nyalilda.

³ Mweei piik ye kas polatetap wasetapkei; yestoi pororyosyek ye keng'eet.

⁴ Ak kiyumi parunenik ko uu ye iyumi kuutik; toroombenjin ko uu ye toroombeni chereng'enyinik.

⁵ Toroor Kamuktaindet ne Toroor; amu menyei parak, ki konyiit Zion kirwooget ak imanda.

⁶ Tuun piitu kimnateet eng' peetuusyeguk, ak ooindap yetunet, utaatyet, ak naet; kaiyweisyet ne kiywei Kamuktaindet ne Toroor ko konorwennyi.

⁷ Ogeero, waaktos eng' saang' piikwak che nyigoonen; riirtos miising' tononjinigap kaalyeet.

⁸ Kigelakta ortinwek che eecheen, ma korutoi kiprutoiyot. Ki kobut kayomisutik, Ki kogas nganasook, ma koiti chii.

⁹ Riirei emet ak konyaluli; ililani Lebanon ak koresei, uu Saron surkwen, ak poregei sok Bashan ak Karmel.

¹⁰ Mwaei Kamuktaindet ne Toroor kole; “Kang'eet anyun nguno, aeetu nguno; atororitu nguno.

¹¹ Omanachi meteteek, oiyie mobeek; kabuseng'wong' ko maat ne igeswok.

¹² Kergeitu piik ak taartaarik che kibeelei, ko uu katok che kiluuli, che kibeelei eng' ma.”

¹³ Ogas, okweek che oo looen, kiit ne kaayai; ak okweek che oo neegit, ong'aany kamugennyu.

¹⁴ Ki aragenso kiptengeginik che mi Zion; ki konam potanet che ma iywei Kamuktaindet. Mwaei icheek kole ng'oo eng' acheek ne imuuchi komeng'iis ak maat ne igeesu? Ng'oo eng' acheek ne imuuchi komeng'iis ak maat ne lalei koigeny?

¹⁵ Ineendet ne wendote imanda ak kong'alaali che lititen, ineendet ne sasei kelunetap sastaet, ne ma namei asoya, ne timei itiikyik si ma kas agobo korotiik, ak ne tuchei konyekyik si ma keer yaityet,

¹⁶ menyei ineendet ole toroor; oldanyi ole teegu ko irimoigap rwandosyek; kigoochin amitwogikyik, ma rarchin peekyik.

¹⁷ Keerei konyeguk karaaranindap laitoryat; keerei icheek emet ne kiuiitogei.

¹⁸ Ibwaati muguleldang'ung' agobo kamuiset: “Mi ano ineendet ne iitisyei, mi ano ineendet ne kerei karagendoetap aisuruut? Mi ano ineendet ne iiti teeksosyek che kooen?”

¹⁹ Megeere piik che koroomen, piik che paroen mookwekwak che memuuchi iguiye, piik che ng'alaali kutit ne too ne memuuchi iguiye.

²⁰ Keer Zion, nganaseetap igoorwekyok che ki king'at! Tuun keerei konyeguk Jerusalem, meng'ootetap kamuung'et, emait ne ma kiutoi, ne ma kitutu tigongenikyik agoi, ama ng'etos poroonikyik.

²¹ Ago tuun tebyei Kamuktaindet ne Toroor kobootech eng' olooto eng' etunatennyi, ye mi ainoosyek che paroen ak kereruusyek, ole ma punei moingetap peek ne kekwerye eng' mugangok che kiwase peek, ama punei yooto meeliit ne karaaran.

²² Amu Kamuktaindet ne Toroor ko kirwoogindennyo, ne koonech ng'atuutik, Kamuktaindet ne Toroor ko laitoryandennyo; ineendet ne sarwech.

²³ Kagitustus porooniguk; ma imuuch kogimit kelutap toloitap melinnywa, ma imuuch koiito angeetap meeliit. Kipcheak anyun parunenigap tuguuk che chaang' che ki kiluul; ki nam che ing'waldos parunenik.

²⁴ Ak ma tuun mwaei ne meng'iisyei kole, “Amyani”; kinyochin kaat tengekwogigap piik che menyei olooto.