ISAIAH 31 - Bukuit Ne Tilil

Koyometapkei ak Misiri ko puch

¹ Pwo eng' icheek che choorchingei Misiri kocheeng'ei toreteet, ak kotiegei paraisisyek; ak komang'u kariisyek, amu chaang', ak komang'u piik che ketei paraisisyek amu kiimeen kot; ago ma inyali Ineendet ne Tiliil ne po Israel, ama cheeng'ei Kamuktaindet ne Toroor!

² Ago utaat ineendet agine ak ibu yaityet, ama walei ng'aleekyik; ago ng'eetei kogirindoi kootap yaigap yaityet, ak toretetap icheeget che yaei tengekto.

³ Ago piik Misiriik, ak ma Kamuktaindet; ak panyeek paraisisyekwak, ama kiy. Ye chuul Kamuktaindet ne Toroor eunnyi, keriichei ineendet ne toretisyei, ak ibuti ne ketoreti, ak kobutos tuwai.

⁴ Amu mwaei Kamuktaindet ne Toroor kole, ko uu ye pooriseni ng'etundo ak ng'etundo ne parnotyot, agobo tyondo ne kagobar, agot ngeguur mestoweek che chaang' koawenji ineendet, koma arageni eng' waagannywa, anan koming'injigei polatennywa. Chorugei ko uu nooto Kamuktaindet ne Toroor ne po lugoosyek koyai pooryeet eng' tulweetap Zion ak eng' tulweennyi ne ming'in.

⁵ Ko uu ye tirirendos toriitik, ko uu nooto riibei Kamuktaindet ne Toroor ne po lugoosyek Jerusalem; riibei ak kosaru, siirtoi kowendi koriibei.

⁶ Oweekyigei ineendet ne ki ongelelji miising', ee lagogap Israel.

⁷ Amu tuun wiirtoi chii age tugul eng' peetuunooto kanamonikyik che po fedha ak kanamonikyik che po thahabu, che kiyaiywok eunekwok koek tengekto.

⁸ “Ibuti anyun Assyrianindet eng' rotwetap chok, ma rotwetap chii; ak kobar ineendet rotwetap chok, ne ma po piik; ak komwee rotwetap chok, ak koek murenikyik otwogik.

⁹ Ak komwei rwandennyi amu kamuiset, ak kotoptobenso pounikyik amu songolyet ne kageer,” mwaei Kamuktaindet ne Toroor ne mi maannyi Zion, ak komi maannyi ne oo Jerusalem.