ISAIAH 30 - Bukuit Ne Tilil

Pwo eng' Pororyet ne ngelelyon

¹ Pwo eng' lagok che ngelel, mwaei Kamuktaindet ne Toroor, che tilei ng'aleek, ama eng' anee; ak che tuchegei, ama eng' kabuusennyu, si kobiit kotes tengekto eng' tengekto;

² che ng'eetos kochorchingei Misiri, ama teebena; che igimitegei kimnateetap Pharaoh, ak komong' urwetap Misiri.

³ Egu anyun kimnateetap Pharaoh kalilaneng'wong', ak koek kamang'unet ne omang'u urwetap Misiri, toiyeng'wong'.

⁴ Amu mi pounikyik Zoan, ak kagobwa tononjinikyik Hanes.

⁵ Ililandos tugul agobo piik che ma imuuchi konyoorunee kiy, che ma toreteet, anan ko kelunet, ago egu kalilanet ak chotisyet.

⁶ Maonateet agobo tyong'ik che po murot tai. Punei emetap nyalilda ak ng'wanindo, ole punu ng'etundo ne kotoy, ak ne kirgit, ereneet ak ereneet ne tirireni, ne uu maat, ibe mogornatosyekwak tigigoigap moegap sigirok, ak koibe konoraikwak ukwegap tambeesik, koipchin piik che ma nyoorunee kiy.

⁷ Amu puch toretetap Misiri, ma tilei kiy, ki aguure anyun ineendet Rahab ne tebyei kosiisei.

Piik che ngelelik

⁸ Ui anyun nguno, sirchi kiy ne kisire eng' tainnywa, ak isirchi bukuit, si kobunji peetuusyek che pwoonei koek paornateet ne po koigeny ak koigeny.

⁹ Amu icheeget ko piik che ngelel, lagok che po lembeita, lagok che ma chamei kogas ng'atuutyetap Kamuktaindet ne Toroor;

¹⁰ che mwachin keerik koleenji, “Amogeer”; ak koleenji maotik, Amomaotenwech tuguuk che po iman, omwaiwech tuguuk che tangus, omaoten kaberberisyosyek,

¹¹ oistegei eng' ooreet, omaste eng' ooreet, ogoochi Ineendet ne Tiliil ne po Israel kosiis eng' tainnyo.

¹² Mwaei anyun Ineendet ne Tiliil ne po Israel ko uu ni, kole, Amu osase ng'olyoondoni, ak omang'u sastaet ak kamaaset, ak otiegei chooto;

¹³ ko uu nooto anyun kergeitu tengegito eng' okweek ak ole kigong'eer ole neegit kobutok, ne kogotoorgei eng' inaatut ne kooi, ne luulei kochokyin.

¹⁴ Ak kotui ko uu ye kituei tereetap cheptereniot, ne tuatui koma riiree; kot koma kenyooru rokyet ne ki ibe maat eng' kapkoima, anan kerame peek eng' keriinget.

¹⁵ Amu komwa Kiptaiyat Kamuktaindet ne Toroor, Ineendet ne Tiliil ne po Israel, kole, “Kisarwok ye oweege ak omuuny; egu kimnateeng'wong' siisek ak kamang'unet.” Ago ma ocham,

¹⁶ ak ki omwa ole, “Achicha! Ki mwee paraisisyek;” ko uu nooto omweei anyun; ak ki ole, “Kilaanye che chepchep;” chepchebitu anyun ak icheek che onok.

¹⁷ Mwee eliphuut agenge kereetap kong' ne po agenge; omwee ngo keraak kong' muutu, agoi kebagaaktak oige keetit ne kooi ne mi tulweet parak, oige penderet ne mi tulweet parak.

¹⁸ Igenok anyun Kamuktaindet ne Toroor, si kobiit koboorwok myeeindo, ak koek anyun ineendet ne itoroorot, si kobiit koriirenak. Amu Kamuktaindet ne Toroor ko Kamuktaindetap kirwooget; iberuurotin tugul che igeni ineendet.

¹⁹ Amu menyei `piik Zion eng' Jerusalem, ma iriiree kogeny. Iboorun iman myeeindo ye kas riireguk; ye kas kowolun.

²⁰ Nganda koonok Kiptaiyat amitwogigap nyalilda ak peegap usiisyet, koma keunyei Kanetindeng'ung' agoi, ago keerei konyeguk Kanetindeng'ung'.

²¹ Ak ye komaste obe eutap tai, anan ye komaste obe murot kaataam, ogas anyun ng'olyoot ne mi let eng' okweek, ne mwaei kole, “Ooreet ni, oba orani.”

²² Ak omurwon kiit ne ki kiliige kanamoniguk che po fedha che ki kiwai, kobooto che ki kiliige kanamoniguk che po thahabu che ki kitany. Iwirtoi ko uu kiit ne mi simdo; ileenjini, “Istegei eng' yu!”

²³ Ak koyook ineendet ropta ne po kesweguk, si kobiit igolse; ak kogoonok amitwogik che punu ruroteetap emet, ak koneryo ak kochang'a. Tuun agete kiyagiik ole paraa eng' peetuunooto.

²⁴ Amei eiik ak icheek ak moegap sigirok che ibatisyei, amitwogik che ki kichop ak kegonor koanyinyitu.

²⁵ Ak kobiitu ainoosyek ak kereruusyek che mi peek eng' tulweet age tugul ne oo ne kooi, ak eng' tulweet age tugul ne ming'in ak ko toroor, eng' peetuutap parisyet ne oo, ye ibutos teeksosyek che kooen.

²⁶ Kogeny, kogergeitu lapkeiyetap arawet ak ne po asiista, ak kotesak lapkeiyetap asiista konyil tisap, koigei lapkeiyetap peetuusyek tisap, eng' peetuut ne inyai Kamuktaindet ne Toroor moogap piikyik, ak kosoop pirutigap kaguotenennywa.

Ng'emisyet ne nyoonjin Assyria

²⁷ Ogeero, punu kainetap Kamuktaindet ne Toroor ole loo, lalei eng' nereegekyik, ak eng' iyeto ne oo ne togostoi; nyiitaat kutinnyi nyitatet, ak uu ng'elyeptanyi maat ne peelsei;

²⁸ ak uu kabusennyi kereruut ne mi peek che ing'irtogei, che itei kaatit, si kobiit kochuchugan pororyosyek eng' kipchuchugetap ng'emisyet, ak kirate kutusweegap piik karnet ne imaasi.

²⁹ Onyooru tyendo ko uu eng' kemout ye kiyaei igoorto ne tiliil; ak kagasetapkei ne po muguleldo, ko uu ye ibei chiito ndurerut si kwo tulweetap Kamuktaindet ne Toroor, agoi Rwandetap Israel.

³⁰ Ak koyai Kamuktaindet ne Toroor kutinnyi ne po toroornatet kogasak, ak koboor kochoru eunnyi, eng' nyitatetap nereeknatennyi ak liplibenetap maat ne peelsei, kobooto cheet ak usoonet ne oo ak koigap ropta.

³¹ Amu kitonatoni piigap Syria eng' tweguunetap Kamuktaindet ne Toroor, ne pirei eng' kirokto.

³² Ak pireet age tugul ne ki king'at, ne pire Kamuktaindet ne Toroor ineendet, komi kobooto sugutisyek che mengech, ak ketubosyek. Ak koboryo kobooto icheek eng' lugoosyek che kitumdumi.

³³ Amu kigechop Topet kobooch keny; ee, kigechopchi laitoryat; ki koyai kolooit kwo ng'wony ak kotebeesit: karurugutyennyi ko maat ak kweenik che chaang'; inaami kabuusetap Kamuktaindet ne Toroor, ne kergei ak koik che laldos, che isururu.