ISAIAH 3 - Bukuit Ne Tilil

Konyonjin kirwooget Judah ak Jerusalem

¹ Ogeer anyuno, istoi Kiptaiyat, Kamuktaindet ne Toroor ne po lugoosyek, eng' Jerusalem ak Judah, tiyeiywot ak tuguuk che kimang'u, kobooto amitwogik tugul ak peek tugul,

² kobooto chiito ne kiim ak chiitap lugeet, kirwoogindet ak maotyot, chiito ne ng'oorsei ak poiyot,

³ kobooto kiptaiyatap piik konom, ak chiito ne konyitot, kirwoogindet, musogindet ne ng'oom ak chepsogeiyot ne ng'oom.

⁴ Agoochini lagok koek pounikwak, ak koboi icheek `manyurunik.

⁵ Ak tuun kiusei piik, usei `age age, ak kous age tugul chiitap kokwennyi. Sasei `lakwa poiyo, ak kosas `chiito ne nyeraat chiito ne konyitot.

⁶ Tuun namei `chii ng'eetap kamet eng' kootap kwandanyi, koleenji, “Ko uu ye itinye ngoroik, ii egu pounindennyo, ak kotebee ng'emisyoni eung'ung'!”

⁷ Ago mwaei ineendet eng' peetuunooto kole, “Ma egu kanyaindet; amu ma mi koonnyu amitwogik anan ngoroik. Moeeta aek pounindetap piik.”

⁸ Amu kogong'emak Jerusalem, ak kogobut Judah; amu ki ingelelji Kamuktaindet ne Toroor eng' ng'elyebwekwak ak eng' poisyonikwak, koesyoi kimni toroornatennyi.

⁹ Paoryanjin icheek togoochikwak; ak komwaitoi tengekwogikwak ko uu Sodom, ma unyei. Pwo eng' saboonwekwak! Amu kagoyaakyigei yaityet.

¹⁰ Omwachi ne po iman oleenji, myeeitu eng' ineendet, amu amei icheek logoegap poisyonikwak.

¹¹ Pwo eng' kiptengekyot! Yaitu eng' ineendet; amu kigoochin melektap poisyonigap eunekyik.

¹² Usei `lagok piikyuk, ak koboi `kwonyiik icheek. Ee piikyuk, koonin ichiliil piik che indoun, ak kong'em pandap ortinweguk.

¹³ Tononi Kamuktaindet ne Toroor kong'alaaldowok, ak kotonon korwookyi piik.

¹⁴ Chutei Kamuktaindet ne Toroor kirwooget, korwookyin poisyegap piikyik ak pounigap piikyik: koleenji, okweek che ki oam mbareetap sabibuk; mi kooriikwok parunenigap kibananook.

¹⁵ Lyon anyun, si osastoe piikyuk, ak otyech togoochigap kibananook? Mwaei Kiptaiyat Kamuktaindet ne Toroor ne po lugoosyek.

¹⁶ Ki mwa kogeny Kamuktaindet ne Toroor kole: “Amu menioti tiibiigap Zion, ak kobendoti ko chuulotin kaatwekwak, koberberisyote konyekwak, kobendi ak kokwaisoti, ak kocheiyoti keelyekwak,

¹⁷ piree anyun Kiptaiyat tiibiigap Zion pokpogenetap metowekwak, ak kong'aanyei `Kamuktaindet ne Toroor icheek koba aach ngor.”

¹⁸ Istoi Kiptaiyat eng' peetuunooto karaaranindap mugurekwak, ak kwambelelik, ak kariik che po kaatit,

¹⁹ munaok, kariigap eunek ak ngoroik che kitugegei,

²⁰ chepkuloik, sirimwek che po keelyek, angook che iuegei, sandugusyegap nyamdutik ak kariik che po itiik,

²¹ peteinik ak munaok che korooron che po serut,

²² ngoroik che korooron che po tuiyosyek, sumotik, angook che kitugegei, ratuutik,

²³ kioinik, katanit ne karaaran, chepkuloik ak angook alak.

²⁴ Ak tuun kigeeree nyamdutik che anyiny nunateet; ak kogeeree pireneet, rogoet; ak kogeeree suumeek che iletotin, poosto; ak kogeeree angeet ne karaaran, kuniet ne kigermenegei; ak kogeeree korooronindo, saremik.

²⁵ Kibare mureniguk rotwetap chok, ak kebar piiguk che kiimeen eng' lugeet.

²⁶ Ak koriiryo ormariichokyik ak koteiyo; ak koguber ak kotebee ng'wony.