ISAIAH 29 - Bukuit Ne Tilil

Kabookyinetap Jerusalem

¹ Pwo eng' Jerusalem, Jerusalem, nganaseet ne ki menyei Daudi! Otes kenyiit eng' kenyiit; ingorubatkei igoorwek.

² Ak aiim anyun Jerusalem, ak kobiit riirek ak kateiyet, ak koigeit ineendet eng' anee Ariel.

³ Amu amuutin komoswek tugul, ak ayiemenen teeksosyek che kooen, ak ateech irimoik si kebarge.

⁴ Ak kinyeratin, ak ing'alaal imi ng'ung'unyek, ak kinyerat ng'aleeguk komang'une temburyek; ak kogergeit tweguuneng'ung' ak chiito ne poisyee oik, ne mang'une ng'ung'unyek, ak ichaam ng'aleeguk eng' temburyek.

⁵ Ago kergeitu chaang'indap puuniguk ak ng'ung'unyek che pusbus, ak kogergeit chaang'indap che imuisei ak meteteek che arureni. Piitu, ee eng' cheiset,

⁶ nyoonjin Kamuktaindet ne Toroor ne po lugoosyek ineendet eng' tuleet, eng' potaneetap ng'wony ak polateet ne oo ak kipchurchuryet, kobooto usoonet ne oo, ak liplibenetap maat ne peelsei.

⁷ Ak kogergeit chaang'indap pororyosyek tugul che paregei ak Jerusalem, icheek tugul che paregei ak ineendet ak irimennyi, ak che inyalili ineendet, ak karwotitoet, ne ng'ang'utyet ne po kemoi.

⁸ Kergergeitu ak ye irwotitoi chiito ne amei rubeet, koleen amisyei; ago ye kosu, komi puch saboondanyi, anan korgergeit ak ye irwotitoi chiito ne amei melel, koleen eeisei; ago ye kosu, ko tanui, ak machei saboondanyi koee, uu nooto anyun chaang'indap pororyosyek tugul che paregei ak tulweetap Zion.

⁹ Ogenisye ak okwong'ye; oyai ko uu ye omache ak ogorie! Kabogityo, ago ma eng' divaik; terteryoti, ago ma eng' maiyek.

¹⁰ Amu kirong'jok Kamuktaindet ne Toroor rwondo ne nyigiis, ki kogeer konyekwok, okweek maotik, ak ki kotuch kandoikwok, chooto ko keerik.

¹¹ Ak kagergeit eng' okweek ng'ang'utyet tugul ak ng'aleegap bukuit ne ki king'ooch, ne igoochin piik chiito ne ineetat, koleenji, “Asoomin ale, soman bukuini,” ak kole, “Ma muuchi, amu ki king'ooch.”

¹² Yeityo kigoochi chiito ne ma ineetat, keleenji, “Asoomin ale, soman bukuini,” ak kole, “Ma aa chii ne ineetat.”

¹³ Ki le Kiptaiyat: Amu riikyino pichu kong'alaalwo, ak kogonyita eng' kutusweekwak, ago kigoisto mugulelwekwak kolooegitu eng' anee, ak kaiyweisyet ne iywea ko ng'atuutyet ne ki ineeti piik icheek;

¹⁴ Ara anyun, ayae poisyet ne kitang'aang'jin eng' kwenutap pichu, poisyet ne kitang'aang'jin ak kekwong'ee. Ak kobet utaatyetap piikwak che utaatiin, ak keuny kaguiyetap piikwak che ng'oomen.

¹⁵ Pwo eng' icheek che cheeng'ei miising' koung'e Kamuktaindet ne Toroor kirwoogennywa, ak mi poisyonikwak mesundeito, ak mwaei koleen, “Ng'oo ne keerech? Ng'oo ne ingenech?”

¹⁶ Ogabui tuguuk! Tos kiroge cheptereniot meneet? Imuuchi komwa kiit ne ki kiyaei agobo ineendet ne kiyaei, kole, “Ki ma koyaa,” anan komwa kiit ne ki kinamdos agobo ineendet ne ki inamdos, kole, “Ma tinyei ineendet kaguiyet”?

Waleet ne oo

¹⁷ Tos ma mi poroindo kitigin, si kewal Lebanon koek mbareet ne rurei kot, ak kiit mbareet ne rurei koek timiin?

¹⁸ Eng' peetuunooto ko tuun kasei ng'aleegap bukuit piik che ma kastoi, ak kogeerto eng' mesundeito ne oo ak eng' ole imen konyegap che koryotiin.

¹⁹ Tesei kogeny poiboiyennywa eng' Kamuktaindet ne Toroor, piik che iming'inegei, ak koboiboitune piik che ponoon, Ineendet ne Tiliil ne po Israel.

²⁰ Amu kiyaei ineendet ne imuisei koek puch, ak kosiis sasindet, ak keisto piik tugul che igeni yaityet;

²¹ che igoochin piik kochalwogense ng'aleekwak, ak koriich mesteet agobo ineendet ne itigonisyei eng' ormariichet, ak komaas chiito ne po iman eng' kiit ne po puch.

²² Mwaei ko uu ni anyun Kamuktaindet ne Toroor, ne ki ityaach Abraham, agobo kootap Jakobo, kole ma kolilani anyun Jakobo, ama koarageni kogeny.

²³ Ago ye keer ineendet lagokyik, nooto ko poisyetap eunekyuk, che mi kwenunnyi, kotabaan kainennyu; itabaani Ineendet ne Tiliil ne po Jakobo, ak koywei Kamuktaindetap Israel.

²⁴ Nyooru kaguiyet ak icheek icheeget che ichiliili eng' mugulel, ak koneetkei kaneetisyet icheek che ing'unyng'ung'dos.