ISAIAH 28 - Bukuit Ne Tilil

Kirwooget ne nyoonjin Samaria

¹ Pwo eng' chepkuletap menoteet ne po kibogitinigap Ephraim, ak eng' taapteet ne resei ne po karaaranindap laitornatennyi, ne mi metitap atebweet ne akwai ne po icheek che ki koterter divaik!

² Ogeero, tinyei `Kiptaiyat chiito age ne nyigan ak ko kiim; ko uu usoonetap roptap koik, usoonet ne ng'emisyei, ko uu usoonetap peek che kiimeen, che ing'irtogei, wiirchin ng'wony ko uu nooto eng' eunnyi.

³ Kityekyin ng'wony chepkuletap menoteet ne po kibogitinigap Ephraim;

⁴ kergeitu taapteet ne resei ne po karaaranindap toroornatennyi, ne miitei metitap atebweet ne akwai, kergeitu ak logoiyatap mogoywet ne sip korure ko tomo kobiit kemeut; ne ye keer chii koam anyun eng' yooto kota komi eunnyi.

⁵ Egu Kamuktaindet ne Toroor ne po lugoosyek eng' peetuunooto naaryeet ne po toroornatet, ak kuutweetap telunateet, eng' piikyik che ng'etu;

⁶ ak kondochi kirwoogik eng' kap kirwooget koyai imanda, ak koek kimnateetap riibiigap nganaseet.

Konyonjin kamuiset Jerusalem

⁷ Ago ki kochiliil chuuto ak icheek amu divaik, ak ki komaasta amu maiyek; ki kochiliil tisiindet ak maotyot amu maiyek, ki komaaluuch divaik icheek, ki komaasta amu maiyek; ichiliili eng' ng'ang'utyet, ibutos eng' kirwooget.

⁸ Amu kigonyi mesosyek tugul kang'ung'daik ak simwek, ma mi ole-tiliil.

⁹ “Ineeti ng'oo ineendet naet? Ak ng'oo ne igoochin koguiyo ng'aleek? Icheek che kigeluge, che kigeete kochuchun?

¹⁰ Amu kineeti ng'atuutyet kegetyingei ng'atuutyet, ng'atuutyet eng' ng'atuutyet; kineeti kaneetisyet kegetyingei kaneetisyet, kaneetisyet eng' kaneetisyet; kitigin eng' oli, kitigin eng' olo.”

¹¹ Ago ng'alaaljin iman pichu eng' kutusweegap toek ak eng' kutit age;

¹² che ki mwachi ineendet koleenji, “Kamuung'et niito, ogoochi kamuung'et ineendet ne ng'etat; ak kasoobet niito;” ago ma cham kogas.

¹³ Nooto anyun, egu ng'olyootap Kamuktaindet ne Toroor eng' icheek ng'atuutyet ne kineeti kegetyingei ng'atuutyet, ng'atuutyet eng' ng'atuutyet; kaneetisyet ne kineeti kegetyingei kaneetisyet, kaneetisyet eng' kaneetisyet; kitigin eng' oli, kitigin eng' olooto; si koba kobee patai kobutyo, ak koilyo, kenam eng' mesteet, ak kimut.

¹⁴ Ogas anyun ng'olyootap Kamuktaindet ne Toroor okweek piik saasiik, che obou pichu menyei Jerusalem.

¹⁵ Amu ki omwa ole, “Ki kiyomiske ak meet, ak ki kiyanjine ak ye mi meet; ye siirto pireet ne oo, koma ityinech; amu ki keyai lembechek koek ole kimwechini, ak ki kiung'egei lembeita;”

¹⁶ mwaei anyun Kiptaiyat Kamuktaindet ne Toroor kole, Ogeero, andoi Zion koita koek lumeiywot, koita ne kigetyem, koita ne po kamanuutyet ne oo ne po luuita, lumeiywot ne kiim; ma igirgiri ne iyani.

¹⁷ Ak ayai kirwooget koek kiit ne litit, ak ayai imanda koek porowet ne kilititisye. Ak kobukto koigap ropta ole mwechin ne po lembechek, ak komarane peek ole kiung'egei.

¹⁸ Yeityo kewal kayomiseng'wong' ne ki oyomiske ak meet koek puch, ama tononi kayanjineng'wong' ne ki oyanjine ak ye mi meet. Ye siirto pireet ne oo, ketyegatak anyun eng' yooto.

¹⁹ Ibok eng' peetuut age tugul ye siirtoi; amu siirtoi karonet age tugul peet ak kemoi; ak egu kamuiset kityo ye ogase ng'aleek.

²⁰ Amu nwagitu itoogut kosiir ne imuuchi koiitoegei chiito; ak kotendenit kiit ne ketugegei kot kosiir ne yamei kotugegei chiito.

²¹ Amu ng'eetei Kamuktaindet ne Toroor ko uu eng' tulweetap Perasim, nereechi ko uu eng' atebweetap Gibeon; si kobiit koyai poisyennyi, poisyennyi ne teer, ak kogees poisyennyi, poisyennyi ne teer.

²² Nooto anyun, amat oegu saasiik, si ma kigiich ratuutikwok amu ki agas kagesunet ne kigeng'at, ne punu Kiptaiyat Kamuktaindet ne Toroor ne po lugoosyek eng' ng'wony komugul.

²³ Oep iit, ogas kutinnyu; oep iit, ogas ng'aleekyuk.

²⁴ Tos ibatisyei chiito ne ibatisyei kotugul si kogool? Tos ibati ak kobirei mogooroonik kotugul che po mbareennyi?

²⁵ Ye kagobirok mbaranooto komyeeit, ko tos maletoi kesweegap ingweek ak kogool kamon, ak kogoolji nganuuk ortinwek, ak kogoolji baale ole ki kilewenji, ak peek alak che kiguure kusemet eng' tabanwekyik?

²⁶ Amu itigoni ineendet komyee, ak koneet Kamuktaindennyi.

²⁷ Amu ma kibore kesweegap ingweek kiit ne ng'atip, ama kimildoe keldap chepkichutit kamon; ago kibiree kirokto keswechooto, ak kibiree keetit kamon.

²⁸ King'oe nganuuk che kikwanyei; amu ma kiborei kotugul; agot ngo seer keldap chepkichutinnyi ak paraisisyekyik, ko mang'aei.

²⁹ Punu niito agine Kamuktaindet ne Toroor ne po lugoosyek, ne kikwong'ee kirwoogennyi, ak kogesunotkei eng' utaatyet.