ISAIAH 24 - Bukuit Ne Tilil

Kirwookyin ng'wony

¹ Ogeero, yaei `Kamuktaindet ne Toroor ng'wony koek ole ma mi kiy ak koek surkwen, ak kogabui, ak koseer piik che menyei olooto.

² Ak kiit ne uu eng' piik, ko uu nooto eng' tisiindet; kiit ne uu eng' otwogindet, ko uu nooto eng' kiptaiyandennyi; kiit ne uu eng' otwogindet ne chepto, ko uu nooto eng' chebyoset ne pou ineendet; kiit ne uu eng' alindet, ko uu nooto eng' aldaindet; kiit ne uu eng' chiito ne pesendoi, ko uu nooto eng' pesenindet; kiit ne uu eng' ne ibei keljinet ne siirei, ko uu nooto eng' ne igoochin ineendet.

³ Ki yai emet koek ne ma tinyei kiy ak keng'em; amu kagomwa Kamuktaindet ne Toroor ng'olyoondoniito.

⁴ Arageni ng'wony ak kowong'kei, nyaluli ng'wony ak kowong'kei, nyalildos piik che mendos che po ng'wony.

⁵ Ki kimurwon ng'wony amu piik che menyei; amu ki kobistoe ng'atuutik, ki kowal kirwoogutik, ki kobut kayomiset ne po koigeny.

⁶ Ki koam anyun chubisyet ng'wony, ak ki konam ng'oogisto che menyei. Ki kibeel piik che menyei ng'wony, ak ki ng'et che ng'ering'.

⁷ Riirtos divaik che leelach, restos keetiigap sabibuk, tigendos tugul che igasegei.

⁸ Siisei kagasetapkei ne po sugutit ne ming'in, igeesugei polatetap icheeget che poiboi, siisei poiboiyetap ketubet.

⁹ Ma koeei divaik kotyendos; ng'woneegitu maiyek eng' icheeget che eei.

¹⁰ Kigebut nganaseet ne mi chemargeet; kigerei koot age tugul, si ma nyo chii ko.

¹¹ Mi riirek ortinwek amu divaik; kagoimenit poiboiyet tugul, ki kobet poiboiyet eng' emet.

¹² Ng'etu kubernateet eng' nganaseet, ak kebare ormariichet ng'emisyet.

¹³ Amu egu ko uu nooto eng' ng'wony ak eng' pororyosyek, ko uu ye kitumdumi mseituni, ko uu turisyetap sabibuk ye kagogeskei kesisyet.

¹⁴ Waaktos chuuto, tyendos miising' eng' poiboiyet; tyendos amu etunatetap Kamuktaindet ne Toroor kobooch cherongo.

¹⁵ Otoroor anyun Kamuktaindet ne Toroor eng' kong'asiis, otoroor kainetap Kamuktaindet ne Toroor, Kamuktaindetap Israel, eng' ngeguusyegap nyanjet.

¹⁶ Kigegas tyenwogik che punu ole poochin ng'wony, koleen: po toroornatet Ineendet ne po imanda. Ago ki ale, asagiti, asagiti, pwo eng' anee! Ki koberberis kaberberik, ee, ki koberberis miising' kaberberik.

¹⁷ Kanyonjin kaiyweisyet ak keriinget ak mesteet, ee inyee ne imenye ng'wony.

¹⁸ Ineendet ne mwee polatetap kaiyweisyet kobutyi keriinget; ak ineendet ne togosune keriinget konamei mesteet. Amu yaatatin tirisyok eng' parak, ak potandos lumeiywegap ng'wony.

¹⁹ Ki kobutok ng'wony miising', ki kobetak ng'wony miising', kigo tumdumgei ng'wony miising'.

²⁰ Terteryoti ng'wony ko uu chiito ne kabogit, ak keistoot kwo komosi ak komosi ko uu koot; ak konyigiisityi pistoennyi, ak kobut, ama kong'eetei kogeny.

²¹ Ak tuun pirei Kamuktaindet ne Toroor eng' peetuunooto eng' parak lugeetap icheeget che torooreen, ak kobir laitorinigap ng'wony eng' ng'wony.

²² Kiyum icheek tugul, ko uu ye kiyumi kimonjororinik eng' keriinget, ak kegerchi korgoreet, ak ye kagobata peetuusyek che chaang', kebir.

²³ Ak kotoptoben arawet, ak kolilaan asiista; amu laitorani Kamuktaindet ne Toroor ne po lugoosyek eng' tulweetap Zion ak eng' Jerusalem, ak eng' taitap poisyekyik.