ISAIAH 21 - Bukuit Ne Tilil

Maonateet agobo ng'emisyetap Babilon

¹ Maonateet agobo ong'ateet ne po nyanjet. Ko uu ye ibuksei kipchurchuryet ne punu murot tai, kobunu kapookyinindet ko uu nooto surkwen, punu emetap kamuiset.

² Kagiboorwo ng'ang'utyet ne ng'waan; iberberisyei kaberberindet, ak kong'emisyei ng'emindet. Togoste, ee Elam, yiemisye ee Media! Kaawong'u tigenoikyik tugul.

³ Kanyi anyun arageneet suennyu; kanama ng'waninwek, ko uu ng'waninwegap kwondo ne machei kosigiis. Ama kot koma muuchi agasta, Aarageni kot koma muuchi ageerto.

⁴ Rukrugeni muguleldanyu, kagomua toptobenet; kawalak poiboiyennyu koek potanet.

⁵ Iitoi meset, indoi riibiik, amisyei, eeisei. Ong'eetyee, okweek pounik, oiil long'onik!

⁶ Amu kamwaiwo Kiptaiyat kole: “Ui, inde riibindet; si komwae ineendet kiit ne keerei.

⁷ Ye keer lugeet, piik che ketei paraisisyek kobwanune aeng', che laanyei sigirok, che laanyei tambeesik, koep iit komyee eng' kagiiletapkei.”

⁸ Yeityo kowaach ineendet ko uu ng'etundo kole, “Ee Kiptaiyat, atononi kotugul eng' teekseet ne kooi ne kiriipse peet, ak kindea ole ariipsee kemousyek tugul.

⁹ Keero, pwoonei piigap lugeet, piik che ketei paraisisyek che pwonune aeng'!” Ak ki wol ineendet kole, “Kagoluul Babilon, kagoluul! Kagoilyo itoonwek tugul che ki kiwai che po kanamonikyik koba ng'wony.”

¹⁰ Ee inyee, kesisyennyu ak peek che po ole kituisye, kaamwaiwok che ki agas eng' Kamuktaindet ne Toroor ne po lugoosyek, Kamuktaindetap Israel.

Maonateet agobo Edom

¹¹ Maonateet agobo Duma. Kuura age eng' Seir, kole, “Riibindoni, egu nee kemoi? Riibindoni, egu nee kemoi?”

¹² Mwaei riibindet kole, “Kagoeech, ak konyonei kogeny kemout. Ngot omache oteep, oteep; oweege, obwa.”

Maonateet agobo Arabia

¹³ Maonateet agobo Arabia. Omenye timiin eng' Arabia, ee okweek che rutoi che po Dedanik.

¹⁴ Oipchi peek icheek che amei melel; otorooktae amitwogik piik che kimweei, okweek piik che menyei emetap Tema.

¹⁵ Amu ki mwee icheek rotoogap chok, rotwetap chok ne kaging'us, kwanget ne kaging'i, ak eng' ng'wanindap lugeet.

¹⁶ Amu kagomwaiwo Kiptaiyat kole, “Kotom kogeskei kenyiit agenge, ko uu kenyiisyegap otwogindet ne kisirei, kowong'ugei toroornatet tugul ne po Kedar.

¹⁷ Ng'ering'itu anyun che ng'etu eng' mwogik ak murenik che kiimeen che po piigap Kedar.” Amu kagomwa niito Kamuktaindet ne Toroor, Kamuktaindetap Israel.