ISAIAH 20 - Bukuit Ne Tilil

Kaboorunetap agobo ng'emisyetap Misiri ak Kush

¹ Eng' kenyiit ne ki wo Tartan Ashdod, ye ki iyookto Sorgon laitoryatap Assyria, kogiwo kobargei ak Ashdod, ak koluul;

² ki ng'alaal Kamuktaindet ne Toroor eng' Isaiah weeriitap Amos, kole, “Ui ireegu kuniok che igermenegei, ak ireegu kweoniguk.” Ak ki yai ko uu nooto, kowendoot aach ngor ama tinyei kweonik.

³ Yeityo komwa Kamuktaindet ne Toroor kole, ko uu ye kogowendoot otwogindennyu Isaiah aach ngor ama tinyei kweonik kenyiisyek somok koek kaboorunet ak kwang'utyet eng' Misiri ak eng' Kush;

⁴ ara imuti ko uu nooto laitoryatap Assyria luulenik che po Misiri ak luulenigap Kush, che mengech ak che oosen, komi aach ngor ama tinyei kweonik, kotaagu ngorook, ne kalilanetap Misiri.

⁵ Koaragenso ak kolilaanso icheek, amu ki imang'u Kush, ak kitoroornatennywa Misiri.

⁶ Eng' peetuunooto ko tuun mwaei che menyei emoni po ngeguut, kole, “Ogeero, kamang'unennyo niito, ne ki kimwechi agobo toreteet si kobiit kesarwech eng' laitoryatap Assyria! Ak acheek anyun, kechilildoi ano?”