ISAIAH 16 - Bukuit Ne Tilil

¹ Okweri aaregap keechiir eng' Shelah ne tokyingei surkwen, che po pounindetap emet, koba tulweetap cheptap Zion.

² Igeitu toriitik che ombenioti, ak keswetap ne ki kobutok, tiibiigap Moab eng' ole kilandoe eng' Arnon.

³ “Orwooch, otil kirwooget; yai urweng'ung' koigei kemoi kween eng' peet uny che kigetimda, ameng'wekte che ombenioti.

⁴ Ingomeny kobooten che kigetimda che po Moab, egu inyee ole ung'egei icheek komwee luulindet.” Ye kagoek puch rebindet, kagogeskei luulset, kagiwong' usiik eng' emet.

⁵ Ki kimiiti ng'echereetap laitornatet eng' rireenet, eng' emaitap Daudi ak tebee chiito ng'echeranooto eng' iman; korwooch ak kocheeng'ei kirwooget, ak ko chepchep koyai imanda.

⁶ Kigegas menoteetap Moab, keele, menot ineendet miising'; eng' kachaunennyi pogei, ak menatennyi, ak nereegekyik; puch lasennyi pogei.

⁷ Iteechin anyun Moab, iteei age tugul agobo Moab, Oteeie amu kagebirok miising', oriirchini magatinigap sabibuk che po Kir-hareset.

⁸ Amu restos mbareenigap Hesbon, ak keetiigap sabibuk che po Sibma; kigoiri keetiikyik che korooron kiptainigap pororyosyek, kiit Jaser ak ki ombeniot agoi surkwen, kiwakta mooriikyik ak kisiir nyanjet.

⁹ Arire anyun eng' riiregap Jaser agobo keetiigap sabibuk che po Sibma; aisenen peekyuk po kong', ee Hesbon ak Eleale; amu waagaatap poiboiyet eng' peetuutap logoeguk che po kemei ak che po kesisyeng'ung' ko kagobet.

¹⁰ Kageisto kagasetapkei ak poiboiyet eng' mbareet ne rurei; ak ma piitu tyenwogik eng' mbareenik che po sabibuk, ama kigasei tweguunetap poiboiyet; ma mi chii ne tyechei divaik eng' ole kituisye; kaawong'u polatetap kesisyet.

¹¹ Morori anyun moennyu ko uu ketubetap Moab, ak morortos agutanikyuk ak icheek amu Kir-heres.

¹² Ye kagoborgei Moab, ye kabirtogei eng' oli toroor, ak konyoor oldanyi ne tiliil si kobiit kosa, koma iterteerisyei.

¹³ Niito ng'olyoot ne ki mwa Kamuktaindet ne Toroor agobo Moab eng' peetuusyek che ki kosiirto.

¹⁴ Ago kagomwa nguno Kamuktaindet ne Toroor kole, “Kotom kogeskei kenyiisyek somogu, ko uu kenyiisyegap otwogindet ne kisirei, kesasei toroornatetap Moab, kobooto tuiyennyi tugul ne oo; ak kong'ering'itu miising' piik, ak ma kotilei kiy che ng'etu.”