ISAIAH 13 - Bukuit Ne Tilil

Ng'olyoot agobo katereteretap Babilon

¹ Maotenet agobo Babilon, ne ki keer Isaiah weeriitap Amos.

² Olumde penderet eng' tulweet ne churat, owaakyi, onde parak eunekwok ye ong'usei koba komoswek tuwai, si kobiit komandae ormariichogap piik che taagunotiin.

³ Koang'at piikyuk che itabaanatiin, koaguur piikyuk che nyigoonen agobo nereegekyuk, chechuuget che igasegei etunatennyu.

⁴ Kas polatetap tuiyet eng' tuloonook, ne uu ne po pororyet ne oo! Polatetap wasetapkei ne po laitornatosyek, che po pororyosyek che kaiyumgei! Iyumi Kamuktaindet ne Toroor ne po lugoosyek lugeet agobo pooryeet.

⁵ Punu icheek emet ne loo, ole pooch tabandap kipsengwet, ineendet Kamuktaindet ne Toroor, ak kariigap nereegekyik, si kobiit kong'em emet komugul.

⁶ Oteiye, amu kagoriik peetuutap Kamuktaindet ne Toroor; nyoonei ko uu ng'emisyet ne punu Ineendet Ne po Kamuktaet.

⁷ Nyaluldos anyun eunek tugul, ak kochoot muguleldap chii age tugul,

⁸ ak kotoptobenso. Namei icheek ng'waninwek ak aragenosyek; nyooru ng'wanindo ko uu kwondo ne amei moet. Ak kokwong'ee `age age; ak koigei togoochikwak togoochigap liplibenetap maat.

⁹ Ogeero, nyoonei peetuutap Kamuktaindet ne Toroor, ne koroom, kobooto nereeknateet ak nereegek che ng'woneen, si kobiit koyai emet koguber, ak kong'em kiptengeginik kogees eng' yooto.

¹⁰ Amu kecheigap kipsengwet ak kecheikyik che iyumigei koma kogoonu lapkeiyennywa; imenitu asiista komachei kochor, ak ma kooluu arawet agine.

¹¹ Ak abir ng'wony amu yaityennyi, ak abir kiptengeginik amu tengektonywa; ak awong'u menoteetap che mendos, ak anyeroti menoteetap che imuisei.

¹² Ayae chiito koek ne ki cheeng'ei kosiir thahabu che korooron, chiito ne siirei thahabu che tiliileen che po Opir.

¹³ Ayae anyun kipsengwet kobotan, ak kitumdum ng'wony koistogei eng' komostanyi, eng' nereeknatetap Kamuktaindet ne Toroor ne po lugoosyek, ak eng' peetuutap nereegekyik che ng'woneen.

¹⁴ Ko uu kenyeleet ne ki oonei, anan ko uu keechiirek che ma iyumi chii, ko koweekyigei chii age tugul piikyik ak komwei chii age tugul kwo emennyi.

¹⁵ Kitoorei age tugul ne kinyooru, ak kibare rotwetap chok age tugul ne kinamei.

¹⁶ Kitonatoni lagokwak kogeerei; kiluulei kooriikwak, ak kesuup osotikwak.

¹⁷ Ogeero, ang'eeti Medik koba kobargei ak icheek, che ma iiti fedha kole kiy, ama poiboitune icheek thahabu.

¹⁸ Ak kotonaton kwangokwak murenik; ama tinyei riirge eng' che kisichei; ma riiree lagok.

¹⁹ Ak Babilon, ne ineendet ko toroornatetap laitornatosyek, ne karaaranindap menoteetap Kaldeik, koigeitu Sodom ak Gomorah ye ki igabui Kamuktaindet.

²⁰ Ma komenyei piik kogeny, ama menyei chii kong'etee ibinda agoi ibinda; ama teechei Arabuuk emaisyek eng' olooto; amaiyagisye olooto mestoweek.

²¹ Ago tebee olooto tyong'ik che po surkwen; ak konyi kooriikwak tyong'ik che irigendos; menyei olooto tyong'igap songolik, ak kourerense olooto kwesik.

²² Ak koteiyo suik eng' irimoikwak, ak koteiyo lelwek eng' kooriikwak che korooron che po laitorinik. Kagoriik peetuunnyi, ama ketesei peetuusyekyik.