ISAIAH 11 - Bukuit Ne Tilil

Laitornatet ne mi Kaalyeet

¹ Mang'une `mornet ooreetap Jesse, ak kooi logoek `mornanooto pitunee tigitikyik.

² Tebee ineendet `Kabuusetap Kamuktaindet ne Toroor, muguleldap utaatyet ak kaguiyet, muguleldap katigonet ak kimnateet, muguleldap naet ak kaiyweisyet ne kiywei Kamuktaindet ne Toroor.

³ Mi poiboiyennyi kaiyweisyet ne kiywei Kamuktaindet ne Toroor. Amairwoochi ko uu ye keerei, ama kerei kong' ko uu ye kasei;

⁴ ago irwooksechin kibananook eng' imanda, ak koger kong' che talaen che po ng'wony eng' imanda: ak kobir ng'wonyuni eng' kirokto ne po kutinnyi, ak kobare kiptengeginik kabusennyi.

⁵ Ak egu imanda pireneet ne rategei, ak koek kayaneet ne kiyani pireneet ne rategei.

⁶ Ak kotebi suiyot kobooto aarwetap keechiir, ak koruiyo cheplanget ak aarwetap ng'oroor, ak koruiyo moita ak ng'etundo parnotyot ak ne akwai, ak kokweri icheek `lakweet ne ming'in.

⁷ Ak koaget teta ak magalaluut, ruitos moekwak tugul; ak koam ng'etundo susweek ko uu teta.

⁸ Ak kourerene lakweet ne reryei keriingetap ndaret, ak konde lakweet ne kageluge eunnyi kebeneetap ereneet.

⁹ Ma itoi kiy chii anan kong'emis eng' tulweennyu tugul ne tiliil; amu nyiei ng'wony naetap Kamuktaindet ne Toroor ko uu ye nyiei peek nyanjet.

Koweeksei Israel ak Judah eng' ole kiga kiluulji

¹⁰ Cheeng'ei pororyosyek eng' peetuunooto tigityotap Jesse, ne tononi koegu songolyetap piik; ak egu toroornatet ole imuung'ee.

¹¹ Eng' peetuunooto koyogoito Kiptaiyat eunnyi kogeny ne po aeng', kosar piikyik che tuun ng'etu, eng' Assyria, eng' Misiri, eng' Patros, eng' Kush, eng' Elam, eng' Sinar, eng' Hamath, ak eng' emotinwek che mi ngeguusyek.

¹² Tuun lumdoi penderet agobo pororyosyek, ak koyum che ki kitimda che po Israel, ak koyum che kiyesta che po Judah eng' luukwek ang'wan che po ng'wony.

¹³ Ak koistogei ng'et kondap Ephraim kogeny, ak keisto icheek che inyalili Judah; ak ma amei ng'etkong' Ephraim agobo Judah, amainyalili `Judah Ephraim.

¹⁴ Ak kobookyi tigigoigap Philistiik eng' cherongo, ak koluul icheek tuwai piigap kong'asiis. Chuulei eunekwak kogirinda Edom ak Moab, ak kogas iit icheek lagogap Ammon.

¹⁵ Ak kong'em Kamuktaindet ne Toroor kowong' ng'elyeptap nyanjetap Misiri; ak kotwaitwai eunnyi kotokyi aineet eng' usoonennyi ne peelsei, ak kobir kobiitune ainoosyek tisabu, ak kogoochi piik kolanda kolaagoti kweonik.

¹⁶ Ak kobiit ooreet ne oo ne po piikyik che tuun ng'etu eng' Assyria, ko uu ye kimi agobo Israel eng' peetuut ne kitogosu komang'une emetap Misiri.