ISAIAH 1 - Bukuit Ne Tilil

¹ Ng'ang'utyet ne ki ityi Isaiah weeriitap Amos, ne ki keer agobo Judah ak Jerusalem, eng' peetuusyegap Uzziah, Jotham, Ahaz ak Hezekiah, laitorinigap Judah.

Tengektap Judah ak pirennyi

² Ogas, ee kipsengwet! Oep iit, inyee ng'wony! Amu kagotwek Kamuktaindet ne Toroor, kole: Ki aguu ak ki aneet lagok, ago ki kongelelja.

³ Ingen eito chiitap ko po, ak kongen sigiryet piutap kiptaiyandennyi; ago ma naei Israel, ama ibwaati piikyuk.

⁴ Pwo! Pororyet ne yaei tengekto, piik che laei yaityet, iyoteetap yaigap yaityet, lagok che yaei ng'emisyet! Ki kometo Kamuktaindet ne Toroor, Ki kogas Ineendet ne Tiliil ne po Israel, ki kotoiyegei kochuchuigei.

⁵ Amu nee si kota kebirok, kot obistoe miising' kosiir? Myani metit komugul, ki kotanui muguleldo komugul.

⁶ Ma mi ole sabei kobooch keldebesyet agoi metit; ago tinyei mook ak kaneerutik, ak mook che inenderi; ma kiuun, ama kirat, ama kinuur eng' mwaita.

⁷ Kigoguber emeng'wong', ki kebeel nganasookwok; ibookyin toek emeng'wong' ogeere, kogoguber, ko uu ne kogong'em toek.

⁸ Kigebagaakta cheptap Zion ko uu keryet eng' mbareetap sabibuk, ko uu keryet eng' mbareetap ingweek, ko uu nganaseet ne kiyiem puunik.

⁹ Nda ki ma pagaakwech Kamuktaindet ne Toroor ne po lugoosyek ng'etunenik che ng'ering' miising', ta kiga kiwoongwech ko uu Sodom ak Gomorah.

¹⁰ Ogas ng'olyootap Kamuktaindet ne Toroor, okweek pounigap Sodom! Oepchi iit ng'atuutyetap Kamuktaindennyo, okweek piigap Gomorah!

¹¹ Tilei nee eng' anee chaang'indap tiseiywekwok? Mwaei Kamuktaindet ne Toroor. Kigonyia kagoochinoik che po peelset che po mengichik, ak sunetigap tuuga che pootin; ama paibaitune korotiigap kiruugik, anan ko che po aaregap keechiir, anan ko che po kwesik.

¹² Ye obwa tainnyu osaa, ko ng'oo ne kimagenak kiito, si otyechatyech seremusyekyuk?

¹³ Amatata oibu kagoochinoik che ma tilei kiy; aweche nyamdutik che kibeelei. Ma amuuchi amuita agobo igoorwegap arawet ne kaleel ak sabato, ak kuursetap tuiyosyek - yaitwogichooto, kobooto tuiyetap kaming'inetapkei.

¹⁴ Wechei saboondanyu arawekwok che kaleel ak igoorwekwok che ki king'at. Inyalila tuguuchooto; kaang'et eng' laetap tuguuchooto.

¹⁵ Ye oiite eunekwok, aung'enok konyekyuk. Agot ye osaa eng' saautik che chaang', koma kase; nyiitaat eunekwok korotiik.

¹⁶ Ounge, otiliilgei; oiste yaityetap poisyonikwok eng' tainnyu; osisye, amatata oyai yaityet,

¹⁷ oneetkei oyai ne myee! Ocheeng' kirwooget, otoret che kisastoe, obesyechi ng'aleek ne ma tinyei sigiik, ong'alaaldochi mosoget.

¹⁸ “Obwa anyun, keng'alaal,” mwaei Kamuktaindet ne Toroor. “Agot ngo piriireen tengekwogikwok, koleelagitu ko uu pooldet ne leel; agot ngo piriireen miising', koigeitu koroorigap keechiirek.

¹⁹ Ngot ochame ak ogase iit, oame anyun akwaindap emet.

²⁰ Ago ngot oeesye ak ongelelse, kebarenok rotwetap chok.” Amu kagomwa niito kutitap Kamuktaindet ne Toroor.

²¹ Kaegundo ano chepkugoniot nganaseet ne ko po iman, ne kotinyei kirwooget ne po iman! Komenyei imanda nganasanooto, ago nguno komi rumiik.

²² Kigoigei silingisyeguk michikyigek che kigenendoe silingisyek, kigeburukto divaiguk peek.

²³ Ngelelik pouniguk, ak ko choronogap chooriik. Chamei age tugul asoya, ak kosuboti tuguuk che kigeerchin. Ma ibesyechin ne ma tinyei sigiik, ama ki ipchin icheek ng'aleegap mosoget.

²⁴ Mwaei anyun Kiptaiyat, Kamuktaindet ne Toroor ne po lugoosyek, Ineendet Ne po Kamuktaet ne po Israel, kole haa, aroong'jini nereegekyuk icheek che wecho, ak ayooktochigei mugetuut eng' puunikyuk.

²⁵ Atokyinin eunnyu, ak aunde simdang'ung', ak aiste murwoonindang'ung' tugul.

²⁶ Aweegu kirwoogiguk ko uu eng' tai, ak aweegu kotigoniguk ko uu eng' tai. Ye ibata nooto keguurenen Nganaseetap Imanda, nganaseet ne kiyani.

²⁷ Tuun kityaachi Zion eng' kirwooget, ak kityaache eng' imanda piikyik che sigu.

²⁸ Ago tuun king'emei tuwai, pistoik ak kiptengeginik eng' peetuut agenge, ak tuun kigeesu che metoi Kamuktaindet ne Toroor.

²⁹ Amu ililandos icheek amu keetiik che ki omache, ak kiteweerak agobo mbareenik che ki olewen.

³⁰ Amu oigeitu keetit ne yaamdos sogekyik, ak mbareet ne ma tinyei peek.

³¹ Ak koigei che kiimeen katanisyek che arurendos, ak koigei poisyennyi maat ne iteri; ak kolalyo tuwai, ama piitu ne imisi.