HOSEA 9 - Bukuit Ne Tilil

Pireet ne nyooru Israel

¹ Amat ibaibaitu, ee Israel, ko uu ye poiboitu pororyosyek; amu ki iyaate kugoinatet imete Kamuktaindeng'ung', ak ki icham tuguuk che kigoigoisye eng' rwanyut age tugul.

² Mabaei icheek rwanyut ne kiboorsee ak ole kitue sabibuk, ak kobetyi ineendet divaik che leelach.

³ Ma menyei icheek emetap Kamuktaindet ne Toroor; ago weekyingei Ephraim Misiri, ak koam amitwogik che ma tiliileen eng' Assyria.

⁴ Ma roong'jin Kamuktaindet ne Toroor kagoochinoigap divaik, ama iboiboi ineendet: uu tiseiywekwak eng' icheek amitwogigap piik che riirtos; king'waniti icheek tugul che amei: po amitwogikwak magennywa; ma ki ibu kobwa kootap Kamuktaindet ne Toroor.

⁵ Tos oyae nee eng' peetuutap tuiyet ne ki king'at, ak eng' peetuutap igoortap Kamuktaindet ne Toroor?

⁶ Ogeero, kigoistoegei ng'emisyet, ago iyumi Misiri icheek, ak tubei Mempis icheek: punjin siwek tuguukwak che korooron che po fedha: mi katook emaisyekwak.

⁷ Kagoit peetuusyek che kiitu pireet, kagoit peetuusyek che kiyaaktoisye; naei Israel nooto, “Perber maotyot, amei iywek chiito ne tinyei Kabuuset ne Tiliil” amu ooindap tengektong'ung', ko oo puunyoonding'ung'.

⁸ Ki riibindet Ephraim kobooto Kamuktaindennyu: ago ne uu maotyot, komi mesteetap toriitik ortinwekyik tugul, ak komi puunyoondit kootap Kamuktaindennyi.

⁹ Kigong'emgei miising', ko uu eng' peetuusyegap Gibea: ibwaati ineendet tengektonywa, iityin pireet amu tengekwogikwak.

¹⁰ Ki ageer ale uu Israel sabibuk eng' surkwen; ki ageer kwanisyekwok ale uu tongoaniatap mogoywet eng' kenyinnyi ne po tai: ago ki pwanji Baal-peor, kotabaanjigei kioto samis, ak koek icheek kiit ne kiwechei ko uu kioto ki chamei icheek.

¹¹ Tirireni toroornatetap Ephraim ko uu toriityon: ma piitu sigisyet, ama mi ne chiioo, anan ne manachi.

¹² Agot nganda igui lagokwak, agoochini kobegune lagok, si ma ng'et chii. Ee, pwo iman eng' icheek, ye amete icheek!

¹³ Ki kimiinji Ephraim komosta ne karaaran ko uu ye ki ageer Tyro; ago imutyin Ephraim lagokyik parindet.

¹⁴ Igoochi, ee Kamuktaindet ne Toroor, tos igoochini nee? Igoochi moet ne rorogu ak kinaik che yamyotiin.

¹⁵ Mi yaityennywa tugul Gilgal; amu ki awech icheek eng' olooto: aoone icheek koba eng' koonnyu amu yaityetap poisyonikwak: ma achame kogeny; pistoik pounikwak tugul.

¹⁶ Kogibir Ephraim, kogoyaam tigityonnywa, ma iyei logoek: ee, nganda iytos abare kora iyotennywa ne chamat.

¹⁷ Oone Kamuktaindennyu icheek, amu ki ma kas iit ineendet: ak koek piik che ombenioti eng' pororyosyek.