HOSEA 5 - Bukuit Ne Tilil

Kirwooget ne nyoonjin Israel

¹ Ogas niito, ee okweek tisiik! Oep iit, okweek kootap Israel! Ogas komyee, ee kootap laitoryat, amu nyoonjinok kirwooget; amu ki oegu mesteet eng' Mispa, ak mesteet ne uu regereiywot ne kiitoi eng' Tabor.

² Ki kotes miising' `pistoik parisyet; ago agere kong' icheek tugul.

³ Angen Ephraim, ama ung'aat Israel eng' anee. Amu koiyai kugoinatet inyee, ee, Ephraim, ki kong'wanit Israel.

⁴ Poisyonikwak koma chamjin icheek koweekyigei Kamuktaindennywa amu tinyei sabeetap kugoinatet, ama ingen Kamuktaindet ne Toroor.

⁵ Ak paoryani menoteetap Israel eng' tainnyi; ibutos anyun Israel ak Ephraim eng' tengektonywa; ibuti Judah agine kobooto icheek.

⁶ Pendi icheek kobooto akwotisyekwak che po keechiirek ak che po tuuga kocheeng'ei Kamuktaindet ne Toroor; ago ma nyooru ineendet, kigoistoegei `ineendet icheek.

⁷ Kigoberber `icheek Kamuktaindet ne Toroor; amu kigosich lagok che kipsagarek. Amei `arawet ne kaleel icheek kobooto mbareenikwak.

Judah ak Israel

⁸ Oguut igoondit eng' Gibea, ak oguut iryageet eng' Ramah. Owaach eng' Beth-aben; keer ole po let eng' inyee, ee Benjamin.

⁹ Egu karaatya Ephraim eng' peetuutap kereetap kong'; ki abooru eng' kwenutap pororyosyegap Israel kiit ne tuun piitu.

¹⁰ Uu pounigap Judah piik che inaktoe kiwoteet. Aroong'jini icheek nereegekyuk ko uu peek.

¹¹ Kisastoe Ephraim, kityekyin ng'wony eng' kirwooget; amu ki chamei koosup ng'atuutyet.

¹² Auu anyun eng' Ephraim kiptorotyot, ak auu nunateet eng' kootap Judah.

¹³ Kingo keer Ephraim myandanyi, ak kogeer Judah mookyik, ko ki wo anyun Ephraim Assyria, ak koyookto keguur laitoryat Jareb. Ago ma imuuchi kosoobok, amainyaiywok mookwok.

¹⁴ Amu aigeitu ng'etundo eng' Ephraim, ak aigeitu ng'etundo ne neran eng' kootap Judah. Agereeri aneendet ak awe; amuti ama piitu chii ne saru.

¹⁵ Aweekyinigei anyun oldanyu, agoi kong'aany chalwoktanywa ak kocheeng'a. Eng' nyalildanywa ko cheeng'a icheek eng' kagiiletapkei.