HOSEA 4 - Bukuit Ne Tilil

Ng'olyoot agobo Israel

¹ Ogas ng'olyootap Kamuktaindet ne Toroor, okweek piigap Israel; amu ting'ee Kamuktaindet ne Toroor ng'olyoot piik che menyei emet. Ma miitei imanit anan rireenet, ak ma mi naet ne po Kamuktaindet eng' emet.

² Ma mi kiit age kobatee chubisyet, lembechek ak rumisyet, choorseet ak ibeetapkei, tesoksei ak isubegei rumisyet.

³ Riirei anyun emet, ak nyaluli age tugul ne menyei olooto, kobooto tyong'igap timiin ak toriitigap parak, ee agot njireenigap nyanja ko pegu ak icheek.

Ng'olyoot agobo tisiik

⁴ Ago amat kotiiyo chii eng' chooto, anan koger kong', amu uu `piiguk icheek che ibeligei ak tisiindet.

⁵ Ibuti peet, ak obutosi kobooto maotyot kemoi, ak abar komet.

⁶ Ki keng'em piikyuk amu ma tinyei naet; amu ki ieesye naet, aesyoin agane si ma iegu tisiindet eng' anee. Ak amu ki iutye ng'atuutigap Kamuktaindeng'ung', autye agane lagoguk.

⁷ Ko uu ye kitesak, ko uu nooto kitesak koyaiywo tengekto; awale toroornatennywa koek teweernateet.

⁸ Paegei icheek tengektap piikyuk, ak koboiboitune yaityennywa.

⁹ Ak kiit ne uu eng' piik, ko uu nooto eng' tisiindet; ak abire icheek amu ortinwekwak, ak ayaakyi poisyonikwak.

¹⁰ Amisyei, ama piyang'dos; yaei kugoinatet ama tesoksei; amu ki kometa anee Kamuktaindet ne Toroor ak kobegechi

¹¹ kugoinatet. Divaik ak divaik che leelach, ko istoi kaguiyet.

¹² Soomei piikyuk kirwooget eng' keetiik, ak iboorchin icheek kiroktonywa. Amu ki imaas icheek `sabeetap kugoinatet, ak ki koba koyai kugoinatet, kometo Kamuktaindennywa.

¹³ Enyei tiseiywek eng' tuloonook parak, ak kobeelei nyamdutik eng' tuloonook, eng' kelutap keetiik, keetiik alak che uu siliboik, ak keetiigap alayet, amu myee urwennywa. Nooto anyun yaei tiibiikwok kugoinatet, ak koyai murerenikwok ibeetapkei.

¹⁴ Ma pirei tiibiikwok ye yaei kugoinatet, anan murerenikwok ye yaei ibeetapkei; amu mastoi icheeget kobooto che yaei kugoinatet, ak koenyei tiseiywek kobooto chepkugonik; ak kobutyo piik che ma iguitos.

¹⁵ Agot ngiyae inyee Israel kugoinatet, ko mat koyai Judah. Amobwa Gilgal, anan otogoste Beth-aben, anan oyosye ole, “Ko uu ye sabei Kamuktaindet ne Toroor.”

¹⁶ Ko uu rooryat ne uui met, ko ki kongelel Israel; paei Kamuktaindet ne Toroor anyun icheek ko uu aarwetap keechiir eng' ole paraa.

¹⁷ Ki konamgei Ephraim ak kanamonik; pagakte ineegei.

¹⁸ Ki komindililitu tuguukwak che eei, yaei kugoinatet kotugul; chamei pounikyik teweernateet miising'.

¹⁹ ki kotuch usoonet ineendet eng' kebebaikyik; ak ililandos amu tiseiywekwak.