HOSEA 10 - Bukuit Ne Tilil

Kirwooget ne nyoonjin Israel

¹ Israel ko keetitap sabibuk ne tuneni kot, ne yiei logoekyik: ki kotes ineendet kapkorosusyekyik ko uu ole tee chaang'indap logoekyik; ki koyai icheek tolochik che korooron ko uu ole tee karaaranindap emennyi.

² Pcheat muguleldanywa; tinyei ng'oogisto: putei Kamuktaindet ne Toroor kapkorosusyekwak, ng'emei tolochikwak.

³ Mwaei anyun icheek nguno kole ma ki tinyei laitoryat: amu ma kiywei Kamuktaindet ne Toroor; ak imuuchi laitoryat koyaiywech nee?

⁴ Mwaei icheek ng'aleek che po puch, iyastos eng' lembechek koyaei arorutik: piitei anyun kirwooget ko uu keetit ne ng'waan eng' mbareet ne ibatat.

⁵ Iyweisyei miising' piik che menyei Samaria amu kanamonigap moegap Beth-aben: amu riirchin piigap emonooto olooto, kobooto tisiikyik che kiboiboitune kanamwonooto po moita amu toroornatennyi ne kiga koistoegei.

⁶ Ki ibei moato kwo Assyria koek kagoochinet ne ki ipchin laitoryat Jareb: nyooru Ephraim teweernateet, ak ililanjin Israel kirwoogennyi ineegei.

⁷ Ki istoi laitoryatap Samaria, ko uu ye ki istoi pugat eng' peek.

⁸ King'emei kogeny komoswek che torooreen che po Aben, tengektap Israel: piitos katook che toorei piich ak che rutei piich eng' kapkorosusyekwak; ak koleenji icheek tuloonook, otuchech ak koleenji tuloonook che mengeechen, oluuljech.

Kesei Israel che kiga kool

⁹ Ee Israel, ki iyai tengekto kobooch peetuusyegap Gibea: kitononso eng' olooto: si ma nam icheek pooryeet eng' Gibea ne paregei ak lagogap tengekto.

¹⁰ Atigooni icheek ye kamach; ak koyumgei pororyosyek koborye, ye kagiratyi icheek pistaosyekwak aeng'.

¹¹ Ephraim ko rooryat ne ki kineet, ne chamei kobor peek; ago ki asiirte eng' kaatinnyi ne karaaran: aganapchini Ephraim chiito ne laanyei; ibatisyei Judah, pirei Jakobo tindinyekyik.

¹² Ogooljigei eng' imanda, oges eng' rireenet; obalu mbareeng'wong': amu kait peetuusyek che ki cheeng'ei Kamuktaindet ne Toroor, kot konyo ak korobonjok imanda.

¹³ Ki obat yaityet, oges tengekto; ki oam logoegap lembechek: amu ki imang'u oreng'ung', eng' chaang'indap piiguk che nyigoonen.

¹⁴ Piitu anyun wasetapkei eng' piiguk, ak keng'em irimoiguk tugul, ko uu ye king'em Salmon Bet-arbel eng' peetuutap pooryeet: ki kitonaton kamet kobooto lagokyik.

¹⁵ Yaiywok anyun Bethel ko uu nooto amu yaityeng'wong' ne oo: kibarei laitoryatap Israel ko kairir emet.