HEBRANIK 12 - Bukuit Ne Tilil

Jeso, kaboorunet ne po kayaneet

¹ Nooto anyun, amu kiyiemenech pooldet ne oo ne po paorinik eng' komoswek tugul, ongeiste nyigiisindo age tugul, ak tengekto ne isip konamech, ak ongerwai eng' muitaet eng' kabeletapkei ne ki kinde tainnyo,

² kegeere Jeso ne kandoindet ak ko kawong'unindet ne po kayaneet, ne kimuita eng' kimurtoiyot amu poiboiyet ne ki kinde tainnyi, ak kosas kalilanet, ak ki kotebee eutap tai ne po ng'echereetap laitornatet ne po Kamuktaindet.

³ Obwaat miising' ineendet ne kimuita eng' kirindaetapkei ne po kiptengeginik agobo ineendet, si mong'etye, otanuise eng' saboonwekwok.

⁴ Tom oyai lugeet kot kotumdagei korotiik, obaregei ak tengekto:

⁵ ak ki outye kateunet, ne ng'alaalwok ko uu ye ki ng'alaaljin weeriik, kole, Weeriinnyu, amesas kergong'yetap Kiptaiyat, Anan itanui ye kerin kong' ineendet;

⁶ Amu ineendet ne chamei Kiptaiyat, kotigoni, Ak kobirei weeriit age tugul ne taachei.

⁷ Omuite eng' kergong'yetne koonook yaiywok Kamuktaindet ko uu nooto ko uu ye yachin weeriikyik; ng'oo weeriit ne ma keregong' kwanda?

⁸ Ago ngot ko motinye katigonet, ne kigonyoorunee tugul yamdaet, oo po sarbuch anyun, ma oo weeriik.

⁹ Ak ki kitinyei kwanisyek che po poorwekyok che ki kereech kong', ago ki kigonyiti icheek: tos ma kaigai kiming'inityige Kwanda ne po saboon, ak kesapche?

¹⁰ Amu ki kerisye kong' icheek peetuusyek che ng'ering' ko uu ye kigeerei kole myee; ago ineendet, kogerei kong' agobo toreteet, si keegu che yamdoi tiliilindanyi.

¹¹ Ma taagu kereetap kong' tugul keele po poiboiyet eng' peetuunnyi; ago po arageneet: ago ye ibata koiichi icheeget che kinetegei nooto, logoegap kaalyeet, chooto ko logoegap imanda.

Katigonutik ak kateunoik

¹² Eng' nooto anyun onamji parak eunek che nyalulyotin, ak kutung'oik che meiyotiin;

¹³ ak oyachi keelyekwok ortinwek che lititen, si ma kimaas che king'waldos, ago si kisoop.

¹⁴ Ogiilgei otebi eng' kaalyeet kobooto piik tugul, ak tiliilinooto ne ngo ma tinyei chii koma imuuchi kogeer Kiptaiyat:

¹⁵ ogeer si ma rartae chii myeeindap Kamuktaindet; si ma piit tigityotap ng'wanindo ak konyalilis, ak komurwon che chaang';

¹⁶ si ma piit ne soksei, anan chiito ne ma iywei Kamuktaindet, ko uu Esau, ne ki alda etunatennyi ne po sigeet agobo amdit agenge.

¹⁷ Amu ongen ole kingo mach eng' let konam kaberuret, keesyo (amu ki ma sich poroindo ne po siguunet) nganda ki cheeng' miising' eng' peegap kong'.

¹⁸ Amu ma oit tulweet ne kimuuchi ketwa, ne kilalei, anan tuindo, ak mesundeito, ak kipchurchuryet,

¹⁹ ak cheetap iryageet, ak tweguunet ne po ng'aleek, ne ki soom icheek che kigasei kole si mata kemwachi icheek ng'olyoo age tugul:

²⁰ amu ki ma imuuch komuita eng' ng'olyoondonooto ki king'at keele, Agot ngo twa tyony tulweet, kelage koik;

²¹ ak nooto ki took, ko ki uu kiy ne imuisei, kot kole Musa, Aiywei miising' ak abotani:

²² ago kaoit okweek tulweetap Zion, ak nganaseet ne po Kamuktaindet ne sabei, Jerusalem ne po kipsengwet, ak tuiyosyek che po malaikaisyek che ma iitoksei,

²³ ak tuiyetap piik tugul ak kaniset ne po che po tai eng' sigeet che kigesir eng' kipsengwet, ak Kamuktaindet kirwoogindetap tugul, ak saboonwek che po piigap imanda che ki kiyai koek che ititaatiin,

²⁴ ak Jeso katuiyoindetap kayomiset ne leel, ak korotiigap iset, che ng'alaali ko myee kosiir che po Abel.

²⁵ Ogeer, amoeesye ineendet ne ng'alaali. Amu ngot ko ki ma chililyo icheek ye kingo eesyo ineendet ne kiga koteeita eng' ng'wony, kesiire ne tya anyun acheek ngot keistoegei ineendet ne iteu eng' kipsengwet:

²⁶ ne ki itumdum ng'wony kutinnyi peetuunooto: ago kagoaror anyun nguno, kole, “Ta atumdumi kogeny konyil agenge, ma ng'wony kityo, ago kipsengwet agine.”

²⁷ Ago ng'olyoondoniito, kamwa kole, “Ta konyilei agenge,” kobooru istoetap tuguuk che kimuuchi kitumdum, ko uu eng' tuguuk che ki keyai, si kobiit kong'et tuguuchooto che ma kitumdumi.

²⁸ Nooto anyun, amu kinyooru laitornatet ne ma kimuuchi kitumdum, ko ongeegu che tinyei myeeindo, ne kimuuchi keyae poisyet ne iboiboi Kamuktaindet miising', eng' teegisto ak kayweet:

²⁹ amu Kamuktaindet nenyo ko maat ne igeesu.