HEBRANIK 11 - Bukuit Ne Tilil

Kaguiyetap Kayaneet

¹ Nooto anyun kayaneet ko naetap tuguuk che kimang'u, ak kaboorunetap tuguuk che tomo kegeer.

² Amu ki kibaoryanjine nooto poisyek.

³ Kinae eng' kayaneet keele ki kiyai ng'wonyusyek eng' ng'olyootap Kamuktaindet, nooto anyun tuguuk che kigeerei ko ki ma kiyae tuguuk che taagu.

⁴ Ki igoochi Abel Kamuktaindet eng' kayaneet tiseiywot ne myee kosiir ne po Kain, ne ki kibaoryanjine ineendet keele ki po imanda, ak kibaoryan Kamuktaindet agobo kagoochinoikyik: ak eng' nooto, agot nganda ki kome kota kong'alaali.

⁵ Ki kimut Enok eng' kayaneet si ma keer meet; ak ki mata kogeer chii ineendet, amu ki imut Kamuktaindet: amu ye kitom kimut ko kiga kibaoryan agobo ineendet keele ki ibaibai Kamuktaindet;

⁶ ak ngo ma mi kayaneet koma imugaksei kibaibai ineendet: amu ineendet ne riikyin Kamuktaindet konyaaljin koyan kole mi ineendet, ak kole igoochin melekto icheeget che cheeng'ei ineendet.

⁷ Ki yai Noah moinget eng' kayaneet, kot kosar koonnyi, ye kingo kagiteechi agobo tuguuk che ki tomo kegeer, amu ki iywei Kamuktaindet; ki irwookyine anyun ng'wony nooto, ak ki ek ne ki nam imanda ne piitu eng' kayaneet.

⁸ Ki kas iit Abraham eng' kayaneet ye ki ngeguur, ak kimanda kwo koma ingen ole wendi, kwo komosta ne tuun taachei koek poroteet.

⁹ Ki ek eng' kayaneet kiprutoiyot eng' emetap arorutyet, ko uu emet ne ma nenyi, komeng'ooti emaisyek, kobooto Isak ak Jakobo, che ki che namei arorutyonooto kobooto ineendet:

¹⁰ amu ki igeni nganaseet ne tinyei lumeiywek, ne Kamuktaindet teegindet ak ko yaindet.

¹¹ Ki sich agot Sara agine kimnateet eng' kayaneet komanach ko kagosiirto kenyiisyekyik, amu kiit kole po iman ineendet ne ki iarorchi ineendet:

¹² nooto anyun ki kisich eng' agenge, ne kiga koigei ne ki kome, piik che chaang', ko uu kecheigap kipsengwet ak ng'aniek che mi ngeguutap nyanjet, che ma iitoksei.

¹³ Ki pek chuuto tugul eng' kayaneet, ama taach arorutichooto, ago kiga kogeer ak koboiboitu kota komi ole loo, ko kagong'aany kole ki toek ak ko kiprutoinik eng' ng'wony.

¹⁴ Amu icheek che mwaei tuguuk che uu chooto kobooru kole cheeng'ei emet ne nenywa.

¹⁵ Ak nda kiga ibwaat iman emoni ki mang'une, ta kinyooru poroindo koweektagei.

¹⁶ Ago machei kot nguno emet ne karaaran kosiir nooto, nooto ko, ne po kipsengwet: nooto anyun ma keerei Kamuktaindet kalilanet agobo icheek keguure Kamuktaindet nenywa: amu Ki kochopchi icheek nganaseet.

¹⁷ Kingo kagetyem Abraham, kogoito Isak eng' kayaneet: ee, ki igoitoi nenyi ne ki kisich ineegei, ineendet ne kiga taach arorutik eng' poiboiyet;

¹⁸ one kiga kemwachi keleenji, Tuun kimwaitae Isak iyoteng'ung':

¹⁹ koiit kole imuuchi Kamuktaindet kong'eet agot eng' che ki kobek, ak kitaach ineendet koweek eng' yooto koek karogutyet.

²⁰ Ki iberuur Isak eng' kayaneet Jakobo ak Esau, agot eng' tuguuk che pwoonei.

²¹ Ki iberuur Jakobo eng' kayaneet, weeriik tuwai che po Joseph, ye ki neegit kome; ak kosa kotiegei walitap kiroktonyi.

²² Ki mwa Joseph eng' kayaneet agobo mandaetap piigap Israel ye ki neegit kome; ak kogoon ng'atuutyet agobo kawekyik.

²³ Ki uny sigiikyik Musa eng' kayaneet eng' arawek somok kingo kagesich, amu kiga keer kole ki lakweet ne karaaran; ak ki ma iywei ng'atuutyetap laitoryat.

²⁴ Ki eesyo Musa eng' kayaneet, ye kingo kagoeet, keguure weeriitap che po Pharaoh;

²⁵ kolewen keyachi ne ya kobooto piigap Kamuktaindet, kosiir kobaibaegei poiboiosyegap tengekto che po peetuusyek che matya;

²⁶ koiit teweernateet ne kiteweeri Kristo kole mogornatosyek che eecheen kosiir konoraik che po Misiri: amu ki igeni melekto.

²⁷ Ki pagaakta Misiri eng' kayaneet, amaiywei nereegegap laitoryat: amu kimuita, ko uu ye keerei ineendet ne ma taagu.

²⁸ Ki yai paska eng' kayaneet, ak isisyetap korotiik, si matwa icheek ne kibarei weeriik che po tai.

²⁹ Kilandae “Araraita ne piriir” eng' kayaneet ko uu ye punei emet ne yaamaat; ak ye kileen kotyem Misiriik koyai ko uu nooto kelugui.

³⁰ Eng' kayaneet kogilulyo irimoigap Jeriko, kingo kageyiem peetuusyek tisap.

³¹ Eng' kayaneet koma me chepkugoniot Rahab kobooto icheek che kingelelik, amu kiga taach segeik eng' kaalyeet.

³² Ara nee anyun age neta amwae? Amu mayama poroindo ngot amwa agobo Gideon, Barak, Samson, Jephtha; ak agobo Daudi ak Samuel ak maotik:

³³ che ki iterteer laitornatosyek eng' kayaneet, koyai imanda, ki sich arorutik, kiger kutusweegap ng'etuunyik,

³⁴ ki imis kimnateet ne po maat, kichililye rotwetap chok, ki kigimit komong' eng' nyalulet, ki kimegitu eng' lugeet, ki oon lugosyegap puunik koweekta.

³⁵ Kitaach kwonyiik piikwak che kiga kobek, che ki king'eet: ak ki kibir alak kot kobek, koesyoi katyagennywa; si kobiit kosich ng'eetyeet ne myee kosiir:

³⁶ ak ki kityem alak eng' chombilet, ak eng' pirisyosyegap kipcharitisyek, ee, ak kogeny eng' ratisyosyek ak toorchinetap korgoreet:

³⁷ ki kilach eng' koik, ki kimurmure musumenosyek, ki kiyoom, ki kibare rotwetap chok: ki ilaagoti ngoroigap keechiirek, ak che po ng'oroorek, kobonondos, ki kinyalili, keyachin ne ya

³⁸ (che ki ma konyaaljin ng'wony icheek), koombenoti eng' ong'atosyek ak tuloonook ak kebenonik ak keriingonigap ng'wony.

³⁹ Ak kingo kagosich chuuto tugul paornateet ne ki kibaoryanji amu kayanennywa, koma kotaach icheek arorutyet,

⁴⁰ amu kisip kochobwech Kamuktaindet kiit ne myee kosiir, si ma ki yai koek che ititaatiin ama kimi.