HEBRANIK 10 - Bukuit Ne Tilil

¹ Amu tinyei Ng'atuutyet urwetap tuguuk che myachen che pwoonei, ma itoondap tuguuchooto, ma imuuchi koyai icheek che riikyin koek che ititaatiin, eng' tiseiywechooto igoitoi icheek kotugul eng' kenyiit age tugul.

² Nda ki uu nooto, ko tos, ki ma kebagaaktoi kigoito? Amu ye kingo kagitiliil saaik konyil agenge, ko kimatata kotinyei kabwaatetap tengekwogik kogeny.

³ Ago eng' tiseiywechooto komiitei kabwaatetap tengekwogik kenyiit age tugul.

⁴ Amu ma imugaksei eng' korotiigap kiruugik ak kwesik konem tengekwogik.

⁵ Eng' nooto anyun ye kingo nyo Kristo ng'wony, konyo komwa kole, Ki ma imach tiseiywek ak kagoochinoik, Ago ki ichobwa poorto;

⁶ Ki ma ibaibaitu eng' kagoochinoik che kibeelei komugul ak che po tengekwogik:

⁷ Amwa anyun ale, Keero, kaanyo (Ki kisir agobo anee eng' bukuit ne ki kimaman) Ayai mageng'ung', ee Kamuktaindet.

⁸ Mwaei ng'aleechu mi meto yu kole, “Ma imach anan ibaibaitu eng' tiseiywek ak kagoochinoik ak kagoochinoik che kibeelei komugul ak che po tengekwogik,” (eng' chooto che kigoitoi ko uu ye mwaei Ng'atuutyet),

⁹ yeityo komwa anyun ineendet kole, “Keero, kaanyo ayai mageng'ung'.” Istoi ne po tai, si kogimit ne po aeng'.

¹⁰ Ki kitiliilech anyun eng' ma ko nooto eng' kagoitoetap poortap Jeso Kristo konyil agenge ak koyam.

¹¹ Ak tononi iman tisiindet age tugul eng' peetuut age tugul koboisyei ak kogoitoi konyil che chaang' tiseiywechooto, che ma koi imuuch koisto tengekwogik;

¹² ago tisiindoni, ko ye kingo kagogoito tiseiywot agenge agobo tengekwogik agoi koigeny, kotebee anyun eutap tai ne po Kamuktaindet;

¹³ koogeni kobooch yooto agoi keyai puunikyik koek ng'echereetap keelyekyik.

¹⁴ Amu ki koyai koek che ititaatiin agoi koigeny eng' kagoitoet agenge icheek che ki kitiliil.

¹⁵ Ak paoryanjinech agine Kabuuset ne Tiliil: amu kingo pata komwa kole,

¹⁶ Ni kayomiset ne tuun kiyomisyinige ak icheek Ye ibata peetuusyechooto, mwaei Kiptaiyat; Andoi ng'atuutikyuk mugulelwekwak, Ak asirchi kabwaatutikwak;

¹⁷ Ama abwaati chalwogikwak ak tengekwogikwak kogeny.

¹⁸ Ye miitei anyun nyoetap kaat ne po chuuto, koma komiitei kogeny kagoitoet agobo tengekto.

Kagiilet ak kateunet

¹⁹ Ko uu nooto anyun, ki tinyei nyiganateet che kitupche kemong'ji ole-tiliil eng' korotiigap Jeso,

²⁰ eng' ooreet ne leel ak kosabei, ne ki yaatwech, ne chutei angeet ne ki kioiye, ne nooto ko poortanyi;

²¹ ak amu ki tinyei tisiindet ne oo ne pou kootap Kamuktaindet;

²² ongeriikte anyun eng' muguleldo ne po iman eng' nyiietap kayaneet, ko kageis mugulelwekyok kemete kabwaatet ne ya, ak kiuun poorwekyok eng' peek che tiliileen:

²³ ongenam miising' ng'ang'eetap kamang'unennyo si mawalak; amu iman ineendet ne ki iaroru:

²⁴ Ak ongibwaatkei acheegei eng' acheegei ki kimitkei eng' chamyet ak poisyosyek che myach;

²⁵ ama kibagaaktoi kituiyegei acheegei eng' acheegei, ko uu piteetap piik alak, ago kiteechinigei; ak ko uu nooto kosiir, ko uu ye ogeere ole riigu peetuut.

²⁶ Amu ngot kekwetyini keyae tengek ko kagetaach naetap imanit, koma kong'etu tiseiywot age kogeny, ne po tengekwogik,

²⁷ ago kagenet ne po kirwooget eng' kaiyweisyet, ak koroomnatetap maat ne igeesu puunik.

²⁸ Meei chiito ne kasas Ng'atuutyetap Musa koma mi rireenet, eng' paorinik aeng' anan ko somok:

²⁹ obwaatitoi ano okweek, ng'wanitu ne tya pireet ne tuun nyoljin kirwookyine ineendet ne ki kotyech Weeriitap Kamuktaindet, ak koiit korotiigap kayomiset, che ki kitiliile ineendet, koek tuguuk che ma tiliileen, ak kosas Kabuusetap myeeindo?

³⁰ Amu kingen ineendet ne ki komwa kole, “Nenyu yaaktaetap mugetuut, anee ne ayaaktoi.” Ak kogeny, “Tuun irwookyin `Kiptaiyat piikyik.”

³¹ Kiit ne pichiy kot kibutyi eunegap Kamuktaindet ne sabei.

³² Ago obwaat peetuusyek che po keny, ye kingo kagegoonok lapkeiyet; ye kinga omuite eng' pooryeet ne oo ne po nyalilwogik,

³³ ye ki oegu, eng' kebeber, che kitang'aang'jin eng' kateweerisyosyek ak kanyililosyek; ak eng' kebeber, ko ki otinye yamdaet kobooto icheek che ki cham keyachin ko uu nooto.

³⁴ Amu ki oriree icheek che ki ratotiin, ak ocham eng' poiboiyet kerebenak tuguukwok, amu ki ongen ole otinye mogornateet ne myee kosiir chooto ago ne tebyei koigeny.

³⁵ Amowiirte anyun nyiganateng'wong', ne tinyei melekto ne oo.

³⁶ Amu nyolu otinye muitaet, si ye kaoyai mageetap Kamuktaindet, omuuch otaach arorutyet.

³⁷ Amu ta komi kitigin miising', Si konyo ineendet ne nyoonei, ama igaigei.

³⁸ Ago sabei nenyu ne po imanda eng' kayaneet, Ak ngot kochuchuigei koma paibaitu muguleldanyu eng' ineendet.

³⁹ Ago acheek koma ki po icheek che ichuchuchegei kobendi luseet: ago ki po icheek che iyani kot koit saruunetap saboondo.