HEBRANIK 1 - Bukuit Ne Tilil

¹ Kamuktaindet, ne ki ng'alaalji kwanisyekyok keny eng' maotik, eng' kebeberwek che chaang' ak eng' ortinwek che chaang',

² ko ne kagong'alaalwech eng' peetuusyechu po let eng' Weeriinnyi, ne kigonde koek ne namei tuguuk tugul, ak ki yai ineendet ng'wony agine eng' ineendet;

³ ineendet ko kakweng'eetap liilindanyi, ak itoondo ne po indennyi, ak kotononi tuguuk tugul eng' ng'olyootap kamuktaennyi, kingo kagoyai kaundoetap tengekwogik, kwo kotebee eutap tai ne po etunateet eng' parak;

Oo Weeriitap Kamuktaindet kosiir malakaisyek

⁴ Ko kagoek ne karaaran kosiir malaikaisyek, ko uu ye konyitot kainet ne ki konam ineendet, kosiir kainennywa.

⁵ Amu ki mwachi malaikaisyek ngorcho koleenji, “Ii Weeriinnyu, kaasichin rani”? Ak kogeny, “Aegu Kwanda eng' ineendet ak koek ineendet Weeriit eng' anee”?

⁶ Ak ye imut kogeny taita konyo ng'wony komwa kole, “Ingolas ineendet malaikaisyek tugul che po Kamuktaindet.”

⁷ Ak ki mwa agobo malaikaisyek kole, “Ineendet ne yaei malaikaisyekyik koek usoonaik, ak koek kiboitiinikyik liplibenetap maat.”

⁸ Ago ki mwa agobo Weeriit kole, “Ee Kamuktaindet, tebyei koigeny ak koigeny ng'echereeng'ung' ne po laitornatet. Kirokto ne po pounateng'ung' ko kirokto ne po imanda.

⁹ Ichame imanda ak iweche tengekto; eng' nooto anyun, ki koiilin Kamuktaindet, ineendet Kamuktaindeng'ung' eng' mwaitap poiboiyet kosiir siritoiguk.”

¹⁰ Ak kogeny, “Eng' taunet, ee Kiptaiyat, ko ki ilum ole tonone ng'wony, ak kipsengwet ko poisyonigap euneguk;

¹¹ petos chooto, ago itebye inyee agoi; ak osegitu tugul ko uu ngoryeet;

¹² ak imamani ko uu ngoryeet ne tabanu parak, ak kiwalei ko uu ngoryeet. Ago iuu nooto inyee agoi, ama tinyei kenyisyeguk ole igeesunegei.”

¹³ Tos ki mwachi malaikaisyek ngorcho eng' peetuut age, koleenji, “Tebee eunnyu ne po tai, agoi ayai puuniguk koek ng'echereetap keelyeguk.”

¹⁴ Tos malakaisyek tugul koma saboonwek che mi poisyet, che kiyooktoi kobois agobo icheek che tuun nyooru yetunet?