HAGGAI 1 - Bukuit Ne Tilil

Teekseetap Kootap Kamuktaindet

¹ Ki nyoonji `ng'olyootap Kamuktaindet ne Toroor Zerubabel weeriitap Shealtiel pounindetap Judah, ak Joshua weeriitap Jehosadak tisiindet ne oo, eng' maotyot Haggai eng' kenyiit ne po aeng' kolaitorani Darius, eng' peetuut ne po tai ne po arawet ne po lo, koleenji,

² “Mwaei Kamuktaindet ne Toroor ne po lugoosyek kole: Mwaei pichu kole tomo koit peetuusyek che nyoljinech kebwa, peetuusyek che kiteege kogeny kootap Kamuktaindet ne Toroor.”

³ Ki nyo anyun ng'olyootap Kamuktaindet ne Toroor eng' maotyot Haggai kole,

⁴ “Tos myee omenye okweek kooriikwok che ki kitetee pagoinik ak kobutoot Hekaluunnyu?”

⁵ Mwaei anyun Kamuktaindet ne Toroor ne po lugoosyek kole, “Oriip atebosyekwok.

⁶ Ki ogol che chaang', ago ogese che ng'ering'; oamisyei, ago mobiyong'dosi; oeeisei, ago manyiiok; olaachi ngoroik, ago ma mi ne lalang'; ak ineendet ne nyooru melekto kondai lolet ne undurot.”

⁷ Mwaei Kamuktaindet ne Toroor ne po lugoosyek kole, “Oriip atebosyekwok.

⁸ Otogoste tulweet ak oibu keetiik, ak oteech koot si abaibaitune nooto ak kiloswa,” mwaei Kamuktaindet ne Toroor.

⁹ “Ki ocheeng' che chaang', ak ogeero, ki piit che ng'ering'; ak kingo ibu kobwa kaa, agutute. Amu nee?” Mwaei Kamuktaindet ne Toroor ne po lugoosyek. “Amu koonnyu ne putot, ago labati chii age tugul koboisyei agobo koonnyi.

¹⁰ Ki kirat kipsengwet anyun amu okweek si ma kon rewoot, ama yiei emet logoekyik.

¹¹ Ak ki ang'at kobiit kemeut eng' emet ak eng' tuloonook, eng' peek ak eng' divaik, eng' mwanik ak eng' tuguuk che piitos eng' ng'wony, eng' piik ak eng' tuuga, ak eng' poisyonik tugul che po eunek.”

Ketau teekseetap Koot

¹² Ki kas iit anyun Zerubabel weeriitap Shealtiel, ak Joshua weeriitap Jehosadak tisiindet ne oo kobooto piik tugul che ki ng'et; ki kas iit `icheek Kamuktaindet ne Toroor Kamuktaindennywa ak ng'aleegap maotyot Haggai, ko uu ye kiga koyook `Kamuktaindet ne Toroor Kamuktaindennywa ineendet. Ki iywei anyun `piik Kamuktaindet ne Toroor.

¹³ Ki ng'alaal anyun Haggai, ne ki iyooktoi Kamuktaindet ne Toroor, komwachi piik ng'aleegap Kamuktaindet ne Toroor koleenji: Mwaei Kamuktaindet ne Toroor kole “Ami kobootok.”

¹⁴ Ki ichirchir Kamuktaindet ne Toroor muguleldap Zerubabel weeriitap Shealtiel pounindetap Judah, kobooto muguleldap Joshua weeriitap Jehosadak tisiindet ne oo, kobooto mugulelwekap piik tugul che ki ng'et. Ki pwa icheek kobois eng' kootap Kamuktaindet ne Toroor ne po lugoosyek, Kamuktaindennywa,

¹⁵ eng' peetuutap tiptem ak ang'wan ne po arawetap lo, eng' kenyiit ne po aeng' ne po Laitoryat Darius.