HABAKUK 3 - Bukuit Ne Tilil

Saaetap Habakkuk

¹ Saaet ne ki sa maotyot Habakkuk, ko uu eng' Shigionoth.

² Ee Kamuktaindet ne Toroor, ki agas ng'aleeguk, aiyweisyei: Ee Kamuktaindet ne Toroor, ing'eet poisyeng'ung' eng' kasariitanyo; Yai kotook eng' kasarinyo; Ibwaat rireenet nginereechi.

³ Ki nyo Kamuktaindet eng' Teman, ki nyo Ineendet ne Tiliil eng' tulweetap Paran. Ki tuch `toroornatennyi kipsengwet, ak ki nyi ng'wony kalasunennyi.

⁴ Ki uu kakweng'ennyi lapkeiyet; Kimang'une eunnyi lapkeiyet ne uu ne po keelyegap asiista: Ak kimi yooto ole kiung'e kamuktaennyi.

⁵ Ki indoe ineendet koroito, Ak ki mang'une keelyekyik kalyeleet ne uu maat.

⁶ Ki tonon ak kokwa ng'wony; ki keer ak kotumdum pororyosyek: Ak ki iseerak tuloonook che po koigeny; ki ing'uruukso tuloonook che po koigeny; ki uu panwekyik peetuusyek che po keny.

⁷ Ki ageer emaisyegap Kushan komi nyalilda: Kibotanso tuguuk che kioiye emet che po Midian.

⁸ Tos ki nereekyi Kamuktaindet ne Toroor ainoosyek? Tos ki nyo nereeknateng'ung' agobo ainoosyek, anan agobo nyanjet, kot ilaany paraisisyeguk, ak ilaany karisyeguk che po lugeet che po yetunet?

⁹ Ki kityaach kwangeng'ung'; Ki po iman ng'olyootap kayasyosyek ne ki kiyasyechi pororyosyek. Ki ibete emet ainoosyek.

¹⁰ Ki iyweis tuloonook ye kigeerin; Kisiirto usoonetap nyanjet; Kitul rireet, ak konamji parak eunekyik.

¹¹ Kitononso asiista ak arawet eng' meng'ootennywa, eng' lapkeiyetap kipchaboniguk kobendi, eng' kaluunetap ng'oting'ung' ne ilyeli.

¹² Ki ibun emet inereegoti, eng' nereegek ko ki ityech pororyosyek.

¹³ Ki imong'u agobo yetunetap piiguk, agobo yetunetap ne iilaat neng'ung'; Ki iguoten kandoindetap kootap kiptengeginik, ing'aanye lumeiywot agoi kaatit.

¹⁴ Ki toore `kiplitokyik kandoindetap piikyik che po lugeet: Ki pwa ko uu kipchurchuryet kole koseera: Ki uu poiboindanywa che amei kibananook eng' ung'oot.

¹⁵ Ki ityegee inyee nyanjet paraisisyeguk, peek che irurugotin che kiimeen.

¹⁶ Ki agas, ak kitilgei moennyu, ki potan kutinnyu eng' cheonooto. Ki nunio kawekyuk ak ki abotan eng' ole ki ami: Ki agen eng' siisinetapkei agobo peetuutap nyalilda, ne nyoonei koityin piik che ki ibookyo.

¹⁷ Amu ngot koma yiei mogoywet, Anan koma ruryo keetiigap sabibuk; Koek puch poisyetap mseituni, Ama piitu amitwogik eng' mbareenik; Ak kebar akwotisyegap keechiirek eng' piusyek, Ama komi akwotisyegap tuuga eng' piusyek:

¹⁸ Aboiboitu kora eng' Kamuktaindet ne Toroor, Aboiboitu eng' Kiptaiyat Kamuktaindetap yetunennyu.

¹⁹ Kimnateennyu Kamuktaindet ne Toroor, Kiptaiyandennyu, ak yaei keelyekyuk koigei che po cheptirgichet, Ak komutata eng' oldinwekyuk che torooreen. Po ne oo eng' putiik che po kibugandetap inoik.