HABAKUK 2 - Bukuit Ne Tilil

Waluunetap Kamuktaindet ne Toroor

¹ Atonone oldanyu ole ariipsee, ak atebee paragutap teekseet ne kooi, ak atabende si ageer kiit ne mwaiwo ineendet ak kiit ne awoljini agobo riirekyuk.

² Ak ki wolwo Kamuktaindet ne Toroor, koleenjo, sir ng'ang'utyet ak iyai kotook eng' tuguuk che kisirei, si kobiit komuuch kosoman chiito ne labati.

³ Amu po ng'ang'utyet peetuusyek che ki king'at, ak kochoktoi kotokyingei kagesunet, ama mwaei lembech. Agot ngo kagei, igen inyee; amu nyoonei iman, ma igaegei.

⁴ Ogeero, kagomen muguleldanyi, ma litit ineendet, ago sabei ne po imanda eng' kayanennyi.

⁵ Ee, kaberberindet divaik, ak ko chiito ne ichaugei ne matebee kaa; ne ibaroi magennyi ko uu ye mi che ki kobek, ak uu meet ineendet ak ma piyonyi, ago iyumjigei pororyosyek tugul, ak kobasyigei piik tugul.

⁶ Tos ma mwaei pichuuto tugul karagutyet agobo chiichito, ak komwaei kalewenet ne sasisyei agobo ineendet, ak komwaei kole, Pwo! Ineendet ne tesyingei che ma chechiik! Tyanitu? Ak Pwo! Ineendet ne ipchingei tuguuk che kiname pesendo!

⁷ Tos mang'eetos eng' chokyinet icheeget che susin, ak kogos che iimin, ak iegu parunenikwak?

⁸ Amu ki iluul pororyosyek che chaang', luulin aginye piik tugul che ng'etunotiin; amu korotiigap piik, ak amu koroomnateet ne ki kiyachi emet, ak nganaseet ak piik tugul che menyei olooto.

⁹ Pwo ineendet ne taachei kelunet ne ya agobo koonnyi, si kobiit koteech keswennyi eng' ole toroor, si kobiit kesar eng' eutap yaityet!

¹⁰ Ki ichop teweernateet agobo koong'ung', ye kingi par che chaang', ak ki iyachi tengekto saboondang'ung'.

¹¹ Amu tuun waachei koita eng' inaatut, ak kowol pambaniat eng' keetiik.

¹² Pwo! Ineendet ne teege nganaseet korotiik, ak kogimite nganaseet tengekto!

¹³ Ogeero, tos ma punu Kamuktaindet ne Toroor ne po lugoosyek kole poisyechi piik maat ak koiimgei pororyosyek puch?

¹⁴ Amu nyiei ng'wony naetap toroornatetap Kamuktaindet ne Toroor, ko uu ye nyiei peek nyanjet.

¹⁵ Pwo! Ineendet ne igoochin chiitap kokwennyi maiyek, inyee ne itesyini ng'woneng'ung', ak igoochini kogeny kobogit, si kobiit igeer icheek komi aach ngor.

¹⁶ Kanyiin teweernateet ne kata toroornatet: ee aginye, si iige ne ma kimuratan: kiweekyinin kigombetap eutap tai ne po Kamuktaindet ne Toroor, ak kotebee teweernateet ne samis toroornateng'ung'.

¹⁷ Amu tuchin koroomnateet ne ki kiyachi Lebanon, kobooto parisyetap tyong'ik, ne ki igoochi icheek koiyweis; amu korotiigap piik, ak koroomnateet ne ki kiyachi emet, kobooto nganaseet ak piik tugul che menyei olooto.

¹⁸ Tilei nee kanamwet ne ki kiwai, kot koyai musogindet; ak tilei nee kanamwet ne kitanyi, ak kaneetindetap lembechek, kot koomang' kitang'indet ne yaei, kot kotany kanamonik che ma twegu?

¹⁹ Pwo ineendet ne leenjin keetit, “Kosu!” Ak ne leenjin koita ne ma twegu, “Ng'eet!” Tos ineetisyei niito? Ogeero, ki kiliigee thahabu ak fedha, ama tinyei kabuset eng' kwenunnyi agot kitigin.

²⁰ Ago mi Kamuktaindet ne Toroor hekalunnyi ne tiliil; ingosiis ng'wony komugul eng' tainnyi.