GALATYEK 6 - Bukuit Ne Tilil

Katigonutik che poisyei kotugul

¹ Che kitupche, agot ngenyoorchi chii lelutyet, ko okweek che otinye Kabuuset ne Tiliil, oweegu chiito ne uu nooto eng' muguleldo ne po mutyonet; ak iriipkei, si ma kiyomin aginye.

² Otoretkei eng' nyalilwogik, oyae kosulda ng'atuutigap Kristo.

³ Amu ngot kobwaategei chii kole aa kiy, ago kaagaa ma kiy, koberberegei ineegei.

⁴ Ago ingotyem chii age tugul poisyennyi, si konyoor anyun kiit ne ilasunegei ineegei, ak ma eng' chiito age.

⁵ Amu laei chii tugul milennyi ineegei.

⁶ Ago ingoyamda tuguuk tugul che myachen ineendet ne kineeti ng'olyoot, ak ineendet ne ineetisyei.

⁷ Amat kegenaak; ma kigengenie Kamuktaindet; amu kiit age tugul ne koolei chii, kotun kesei nooto agine.

⁸ Amu ineendet ne koljin poortanyi kotun kesei eng' poorto ng'emisyet; ago ineendet ne koljin Kabuuset ne Tiliil kotun kesei eng' Kabuuset ne Tiliil saboondo ne po koigeny.

⁹ Among' keng'etye ye kiyae poisyonik che myach: amu tuun kigese ko kait peetuunnyi ngo ma kitanuise.

¹⁰ Nooto anyun, ko uu ye ki tinyei poroindo, ko ongeyachi piik tugul ne myee, ago ne siirei ko icheeget che po kootap kayaneet.

Ng'aleek che po let

¹¹ Ogeer anyun siruutik che eecheen che kaasirunenak eng' eunnyu aneege.

¹² Tugul che tee che machei telunateet eng' poorto, kobirchinok kole kimuratanak; ago si ma kiusaus icheek agobo kimurtoiyotap Kristo.

¹³ Agot icheeget che kimuratani, ko ma riibei Ng'atuutyet; ago machei kole kimuratanak, si kolasunegei poorwekwok.

¹⁴ Ago ingolooit eng' anee aloskei, kobatee eng' kimurtoiyot ne po Kiptaiyandennyo Jeso Kristo, ne eng' nooto ko ki kigartaat ng'wony agobo anee, ak anee agobo ng'wony.

¹⁵ Amu ma kiy kamuratanet, anan ngo ma kimuratan, ago yautyet ne leel.

¹⁶ Ak ingotebee kaalyeet icheek tugul che pendoti eng' ng'atuutyoni, ak rireenetapkei, ak eng' Israel ne po Kamuktaindet.

¹⁷ Kobooch nguno ko matata konyalila chii: amu aiboti eng' poortanyu perutigap Jeso.

¹⁸ Che kitupche, ingotep kobooto saboonwekwok myeeindap Kiptaiyandennyo Jeso Kristo. Amen.