GALATYEK 5 - Bukuit Ne Tilil

Katyaknateet eng' Kristo

¹ Ki ityaachech Kristo eng' katyaget; otononse komyee anyun, amatata keratak kogeny eng' chogitap otwoknateet.

² Ogeero, amwaiwok anee Paulo, ale, ngimuratanak, ko motinye keluno eng' Kristo.

³ Ee, abaoryanjini kogeny chii age tugul ne kimuratani, ale, kiyaachei ineendet koyai Ng'atuutyet komugul.

⁴ Kaotoiye ak Kristo, okweek che omache kiityok imanda eng' Ng'atuutyet; kaobutye eng' myeeindo.

⁵ Amu kigeni kamang'unet ne po imanda eng' Kabuuset ne Tiliil eng' kayaneet.

⁶ Amu eng' Kristo Jeso koma tilei kiy kamuratanet, anan ngo ma kimuratan; ago kayaneet ne poisyei eng' chamyet.

⁷ Ki orwae komyee; ng'oo ne koraanyak si mogas iit imanit?

⁸ Ma punu kagaigaoni ineendet ne kiguurok.

⁹ Igutu mermereek tutigin kererutyet komugul.

¹⁰ Atinye kamang'unet eng' okweek eng' Kiptaiyat, ale amoegu che tinyei kabwaatutik che teer: ago ineendet ne inyalilok konyooru kirwoogennyi, agot ngo ng'oo.

¹¹ Ago anee anyun, che kitupche, ngot kota aamdooti kamuratanet, ko kalya si kota keusausa? Ko kaagaa kigeisto anyun kanagutyetap kimurtoiyot.

¹² Katamache anyun ale koistogei icheeget che iluiluchok.

¹³ Amu okweek che kitupche, ko ki kiguurchok katyaget; ago moboisyee katyageng'wong' koek poroindo ne po poorto, ago oboisyechigei okweegei eng' okweegei eng' chamyet.

¹⁴ Amu isuldoi Ng'atuutik tugul eng' ng'olyoot agenge, nooto ko ni; Cham chiitap kokweng'ung' ko uu ole ichamdoige.

¹⁵ Ago ngot osusegei ak oamegei okweegei, oriipkei si morumge.

Terchinet ne po sabeet eng' poorto ak eng' Kabuuset ne Tiliil

¹⁶ Amu amwae anyun ale, Obendoti eng' Kabuuset ne Tiliil, si moyai mageetap poorto.

¹⁷ Amu machei poorto miising' kogirinda Kabuuset ne Tiliil, ak machei Kabuuset ne Tiliil kogirinda poorto; amu kirindogei chuuto tuwai; si moyai tuguuk che omache.

¹⁸ Ago ngo ndoiywok Kabuuset ne Tiliil, ko momite pounatetap Ng'atuutyet.

¹⁹ Taagunotiin anyun poisyonik che po poorto, chooto ko chu: sokseet, simdo, mageet ne ya agobo tuguuk che yaach,

²⁰ saaetap kanamonik, ponisyet, punyondisyek, suryosyek, ng'etkonda, nereegek, taiyasyek, kabesyosyek, pcheutik,

²¹ kong' ne ya, pogitatosyek, keiyandisyek, ak alak che uu chooto: kasip ateiywok agobo chu, ko uu ye kisip ateiywok, ale icheeget che yaei tuguuk che uu chuuto koma nyooru laitornatetap Kamuktaindet.

²² Ago logoiyatap Kabuuset ne Tiliil ko chamyet, poiboiyet, kaalyeet, muitaet, talasyet, myeeindo, atepto ne kiyani,

²³ kaming'inetapkei, riibetapkei: ma mi ng'atuutyet ne eesyoi chuuto.

²⁴ Ak icheeget che po Kristo Jeso ko ki kogartaat poorto kobooto maguutikyik ak kasetap myat che po chooto.

²⁵ Ngot kesaptosi eng' Kabuuset ne Tiliil, ko ongebendoti anyun eng' Kabuuset ne Tiliil.

²⁶ Among' kilasuge puch, among' ketachatachge, among' koamjechge ng'etkong'.