GALATYEK 4 - Bukuit Ne Tilil

¹ Ago amwae ale ye ta ko lakwa ineendet ne tuun namei tuguuk, ko materchin ineendet ak otwogin, agot nganda ineendet ko kiptaiyatap tugul;

² ago mi eng' eutap ng'atik ak riibiik agoi koit peetuut ne king'atyi kwanda.

³ Ki uu nooto ak acheek, kingo ta ko ki lagok, ko kigiratotiin eng' kaneetisyosyek che po tai che po ng'wony:

⁴ ago ye kingo it peetuut ne kiyamgei, koyook Kamuktaindet Weeriinnyi, ne ki sich kobogoryot, kosich eng' Ng'atuutyet,

⁵ si kobiit kotyach icheek che kimi eng' Ng'atuutyet, si kobiit keyaech keegu weeriik.

⁶ Ak amu oo weeriik, ko ki iyookyi Kamuktaindet Kabuusetap weeriinnyi mugulelwekyok, ne riirei, kole, “Abba, Kwanda!”

⁷ Eng' nooto anyun ma ko ii otwogindet kogeny, ago ii weeriit; ak ngo ii weeriit ko ii namindet ne po tuguuk eng' Kamuktaindet.

Kolitiiti `Paulo piigap Galatia

⁸ Ago eng' peetuunooto, ki ma ongen Kamuktaindet, ko ki oo otwogigap icheeget che ki ma ko kamuktaik che ma po iman:

⁹ ago nguno ko kaonai Kamuktaindet, anan ko kagonaak okweek Kamuktaindet, amu nee anyun si oweektegei let kogeny oweekyigei kaneetisyosyek che po tai che nyalulyotin ak che po pananda, eng' chooto omache oweekyigei otwogindennywa kogeny?

¹⁰ Oriibe peetuusyek, ak arawek, ak ole teptoi peetuusyegap kenyiit, ak kenyiisyek.

¹¹ Aiyweisyei agobo okweek, si ma egu ne ki abirtegei puch eng' oor age tugul agobo okweek.

¹² Asoomok miising', che kitupche, ale otebi ko uu anee, amu anee auu okweek. Ki ma oyaiywo ne ya:

¹³ ago ongen ole ki aamwok logoiywek che myach eng' tai, amu nyalulnatetap poorto:

¹⁴ ak ki ma osas yoomseet ne ki otinye agobo poortanyu, ama oeesye; ago ki otaacha ko uu malaikaiyatap Kamuktaindet, ko uu Kristo Jeso.

¹⁵ Mi ano anyun poiboiyonootong'wong'? Amu abaoryanjinok, ale, nda ki imugaksei, ta ki obalu konyekwok ak ogoono.

¹⁶ Ara anyun tos kaaegu punyondeng'wong', amu kamwaiwok ne po iman?

¹⁷ Igiiljinogei kocheeng'ok eng' ooreet ne ma myee: ee, machei kole kogerchok saang', si kobiit ocheeng' icheek.

¹⁸ Ago myee oegu che kicheeng'ok eng' kagiiletapkei peetuusyek tugul agobo kiit ne myee, ak ma ye ami kobootok kityo.

¹⁹ Lagokyuk che mengech, che anyoorunenok ng'wanindo ne po sigeet kogeny agoi koyaak Kristo eng' okweek,

²⁰ ee, katamache ale nda kami kobootok nguno, ak awal kutinnyu; amu aiimigei agobo okweek.

Hagar ak Sara

²¹ Omwaiwo, okweek che omache otebee pounatetap ng'atuutik, tos mogase Ng'atuutyet?

²² Amu ki kisir keele, Ki tinyei Abraham weeriik aeng', age eng' chepto ne otwogin, ak age eng' kobogoryot ne ityagat.

²³ Ago ki kisich eng' poorto ineendet ne po chepto ne otwogin; ago ki kisich eng' arorutyet ineendet ne po kobogoryot ne ityagat.

²⁴ Tuguuchuuto ko kalewenet: amu chuuto ko arorutik aeng'; ki punu age tulweetap Sinai, ne sichei lagok eng' otwoknateet, nooto ko Hagar.

²⁵ Ak Hagar niito ko tulweetap Sinai eng' Arabia, ak ibooru Jerusalem ne po nguno: amu mi eng' otwoknateet kobooto lagokyik.

²⁶ Ago Jerusalem ne mi parak kotyagat, ne nooto ko kamennyo.

²⁷ Amu ki kisir keele, Paibaitu, inyee ne ii soon ne meyie; Yaas ak iwaach, inyee ne megase ng'wanindap sigisyet: Amu chaang' lagogap ineendet ne mi ineegei kosiir che po ineendet ne tinyei manong'otyot.

²⁸ Acheek anyun, che kitupche, ko ki lagogap arorutyet, ko uu Isak.

²⁹ Ago anyun, ko uu ineendet ne ki kisich eng' poorto, kogius ineendet ne ki kisich eng' Kabuuset ne Tiliil ko uu nooto anyun agot nguno.

³⁰ Ago mwaei nee siruutik? Oon kobogoryondoni otwogin ak weeriinnyi: amu ma namei tuguuk weeriitap kobogoryot ne otwogin kobooto weeriitap kobogoryot ne ityagat.

³¹ Nooto anyun, che kitupche, ma ki lagogap kobogoryot ne otwogin, ago ki po kobogoryot ne ityagat.