GALATYEK 2 - Bukuit Ne Tilil

Paulo ak che kiyooktoi alak

¹ Kingo pata anyun kenyiisyek tamanu ak ang'wan atogoste kogeny awe Jerusalem kobooto Barnaba, amuti Tito agine.

² Ak ki atogoste eng' ng'ang'utyet; ak ki atetyi icheek logoiywek che myach che aamdooti eng' kwenutap Pororyosyek, ago eng' ung'oot eng' icheeget che taagunotiin, si ma egu, eng' oor age tugul, ne alabati puch, anan ne kialabat puch.

³ Ago ma kibirchi Tito, ne Yunanindet, ne ki mi kobooto, keele kimuratan:

⁴ amu tupchosyek che po lembech che ki kimut kobwa oriit eng' ung'oot, che ki mong' eng' ung'oot kosegei katyagennyo ne ki tinyei eng' Kristo Jeso, si kobiit kondeech otwoknateet:

⁵ eng' icheeget che ki ma ki kas iit, agot eng' sait agenge; si kobiit kotebi imanitap logoiywek che myach kobootok.

⁶ Ago icheeget che ki kiiti keele taagunotiin (ngo uu ole teptoi icheek, koma kiy eng' anee: ma tiytiy Kamuktaindet chii) - amwae ale, ma teswa kiy icheeget cho taagunotiin.

⁷ Ago ye kingo keer icheek kole ki kigoono ariip logoiywek che myach agobo icheeget che ma kimuratani, ko uu Petero agine eng' che kimuratani

⁸ (amu ineendet ne ki imuktoochi Petero koek kayooktoindet eng' che kimuratani, ko ki imuktaiwa agane ko uu nooto agobo Pororyosyek);

⁹ ak ye kingo nai Jakobo ak Kepa ak Johana, icheeget che ki kiit keele tolochik, myeeindo ne ki kigoono, kogoono ak Barnaba eutap tai ne po yamdaet, si kobiit keebe ye mi Pororyosyek, koba icheek ye mi che kimuratani;

¹⁰ kobatee kimakwech icheek kibwaat kibananook; kioto ne ki ating'ee kagiiletapkei agane ale ayai.

Kogerei kong' `Paulo Petero eng' Antiok

¹¹ Ago ye kingo nyo Kepa Antiok, agirinde ineendet kimni, amu ki nyoljin ineendet kirwooget.

¹² Amu ye kitom kobwa alage che ki punu kap Jakobo, kogiamisyei ak Pororyosyek: ago ye kingo pwa, koweektagei let kotabaangei, koywei icheeget che po kamuratanet.

¹³ Ak ki iberberisyei Yahudik alage ak icheek kobooto ineendet; kot kotito Barnaba agine eng' kaberberisyennywa.

¹⁴ Ago ye kinga keer ale ma pendoti eng' lititindo ko uu imanitap logoiywek che myach, amwachi Kepa eng' tainnywa tugul aleenji, Ngot ko inyee, ne ii Yahudyot, itebye ko uu Pororyosyek, ak ma ko uu Yahudik, ibirchindoi ano Pororyosyek koigei Yahudik?

Kisaru Yahudik ak Pororyosyek eng' kayaneet

¹⁵ Acheek che ki Yahudik eng' sigeet, ama ki kiptengeginik che po Pororyosyek,

¹⁶ ago kingen keele ma kiityin chii imanda eng' poisyonigap ng'atuutik, ago eng' kayaneet eng' Jeso Kristo, ki kiyan agacheek eng' Kristo Jeso, si kobiit kiityech imanda eng' kayaneet eng' Kristo, ama eng' poisyonigap Ng'atuutyet: amu ma kiityin chii imanda eng' poisyonigap Ng'atuutyet.

¹⁷ Ago, ye kita kecheeng'e kiityech imanda eng' Kristo, kenyoorwech ak acheek keele ki kiptengeginik, tos Kristo kogiboityotap tengek? Achicha, ma uu nooto.

¹⁸ Amu ngot ateech kogeny tuguuchooto che kiga abut, ko kabartegei ale aa pistoindet.

¹⁹ Amu anee, ko ki amechi Ng'atuutyet eng' Ng'atuutyet, si kobiit asap eng' Kamuktaindet.

²⁰ Ki kigartata kobooto Kristo; ago asabe; ago ma ko anee, ago sabei Kristo eng' anee: ak saboondo ne asabe nguno eng' poorto asabe eng' kayaneet ne miitei eng' Weeriitap Kamuktaindet, ne ki chama, ak ki igoitogei agobo anee.

²¹ Ma wale myeeindap Kamuktaindet koek puch; amu nda punu imanda Ng'atuutyet, kogime Kristo puch.