EZRAH 8 - Bukuit Ne Tilil

Kandoik che ki week kobooto Ezrah

¹ Chu ko kandoigap kooriigap kwanisyekwak ak tetuutigap ibinwekwak che ki kosiirto che ki kitogosu tugul eng' Babilon eng' peetuusyegap laitornatetap Laitoryat Artaserses:

² Eng' weeriigap Phineas, ko Gershom; eng' weeriigap Ithamar, ko Daniel; eng' weeriigap Daudi, ko Hatus.

³ Eng' weeriigap Shekaneiah, eng' weeriigap Paros, ko Zekariah, ak ki kiitito ineendet murenik pogol ak konom eng' tetuutigap ibinwek che ki kosiirto.

⁴ Eng' weeriigap Pahat-moap, ko Eliehoenai weeriitap Seraiah, ak ki mi kobooto ineendet murenik pogolwogik aeng'u.

⁵ Eng' weeriigap Shekaneiah ko weeriitap Jahasyel, ak ki mi kobooto ineendet murenik pogolwogik somogu.

⁶ Eng' weeriigap Adin, ko Ebed weeriitap Jonathan, ak ki mi kobooto ineendet murenik konomu.

⁷ Eng' weeriigap Elam, ko Jesaia weeriitap Athaliah, ak ki mi kobooto ineendet murenik tamanwogik tisabu.

⁸ Eng' weeriigap Shepatiah, ko Sebadia weeriitap Mikael, ak ki mi kobooto ineendet murenik tamanwogik sisiitu.

⁹ Eng' weeriigap Joab, ko Obadiah weeriitap Jehiel, ak ki mi kobooto ineendet murenik pogolwogik aeng'u ak taman ak sisiit.

¹⁰ Eng' weeriigap Selomit, ko weeriitap Josipia, ak ki mi kobooto ineendet murenik pogolut agenge ak tamanwogik lo.

¹¹ Eng' weeriigap Bebai, ko Zekariah weeriitap Bebai; ak ki mi kobooto ineendet murenik tiptemu ak sisiit.

¹² Eng' weeriigap Askad, ko Johanan weeriitap Hakatan, ak ki mi kobooto ineendet murenik pogolut agenge ak taman.

¹³ Eng' weeriigap Adonikam, che po let, ak chu kainaikwak, Eliphelet, Jeuel ak Semaiah, ak ki mi kobooto icheek murenik tamanwogik lo.

¹⁴ Ak eng' weeriigap Bigbai, ko Utai ak Zabud. Ki mi kobooto icheek murenik tamanwogik tisabu.

Kocheeng'ei Ezrah Lawiik si kobois eng' Hekaluut

¹⁵ Ki ayumji icheek aineet ne rootyin Ahaba. Ki kitebee yooto peetuusyek somok ak ki ageerote piik ak tisiik ak ma anyooru weeriigap Lawi.

¹⁶ Ki ayookte anyun keguur Elieser, Ariel, Semaiah, Elnatan, Jarib, Elnatan, Nathan, Zekariah ak Mesulam, piik che eecheen, kobooto Joiarib ak Elnatan, che ki kaneetik,

¹⁷ ayookte icheek koba kap Ido ne ki oo eng' ole kiguure Kasipia. Ki amwachi kiit ne kanyool komwachi Ido ak tupchosyekyik otwogigap Hekaluut eng' komosato po Kasipia, si komutwech kiboitiinik che po kootap Kamuktaindennyo.

¹⁸ Amu kimi kobootech euut ne myee ne po Kamuktaindennyo, komutwech chiito ne tinyei naet, ne po weeriigap Mali, weeriitap Lawi, weeriitap Israel ak Serebia, kobooto weeriikyik ak tupchosyekyik taman ak sisiit,

¹⁹ ak Hasabia ak ki mi kobooto ineendet Jesaia ne po weeriigap Merari tupchosyekyik ak weeriikwak, tiptem.

²⁰ Eng' otwogigap Hekaluut che kiga konde Daudi ak pounik agobo otisyetap Lawiik, ko ki kiguur otwogik pogol aeng' ak tiptem, tugul eng' kainaikwak.

Kosaae ak korugutigei piik

²¹ Yeityo ang'at anyun karugutetapkei, eng' aineetap Ahaba, si kobiit kiming'inge eng' taitap Kamuktaindennyo, kecheeng' eng' ineendet ooreet ne litit, eng' acheek ak lagokyok ak ne po tuguukyok tugul.

²² Amu ki alilan asoom laitoryat kweanet ne po kiplugotinik ak piik che ketei paraisisyek si kotoretech kegirindee puunik che mi ooreet. Amu kiga kemwachi laitoryat keleenji, “Mi eutap Kamuktaindennyo kobooto icheek tugul che cheeng'ei ineendet, koyachi ne myee, ago kirindoi kimnateennyi ak nereeknatennyi piik tugul che metoi ineendet.”

²³ Ki kirugutkei anyun ak kesaa Kamuktaindennyo agobo niito ak kigaswech.

Kagoochinoigap Hekaluut

²⁴ Ki atabaan anyun taman ak aeng' che eecheen eng' tisiik, icheeget ko ki Serebia ak Hasabia ak ki mi kobooto icheek tamanu eng' tupchosyekwak,

²⁵ ak ki agerchi icheek fedha, thahabu, tereenik ak kagoochinetap kootap Kamuktaindennyo che kiga kogoon laitoryat ak kirwoogikyik, pounikyik ak Israel tugul che ki mi yooto.

²⁶ Ki agerchi icheek talendaisyek pogol lo ak konom che po fedha ak tuguuk che po fedha che yamei talendaisyek pogol ak thahabu che yamei talendaisyek pogol,

²⁷ ak taabook tiptem che po thahabu, che yamei keruutik sisiit ak kebeberyat, ak tereenik aeng' che po sugunonik, che myachen, che liilei piich che tinyei kamanuutyet ne uu ne po thahabu.

²⁸ Yeityo aleenji icheek, “Oo tiliileen eng' Kamuktaindet ne Toroor ak ko tiliileen tereenik ak fedha ak thahabu ko kagoochinoigap chamyet che kigoochin Kamuktaindet ne Toroor, Kamuktaindetap kwanisyekwok.

²⁹ Oriipse ak oriip tuguuchooto agoi obiman eng' kooriik che po oriit eng' kootap Kamuktaindet ne Toroor eng' taitap che eecheen eng' tisiik, Lawiik ak pounik che po kooriigap kwanisyekwok che po Israel eng' Jerusalem.”

³⁰ Kitaach anyun Tisiik ak Lawiik nyigiisindap fedha ak thahabu ak tereenik, si koip kobwa Jerusalem kootap Kamuktaindennyo.

³¹ Eng' peetuutap taman ak aeng' ne po arawet ne po tai, keng'etye anyun eng' aineetap Ahaba ak keebe Jerusalem. Ki mi kobootech eutap Kamuktaindennyo ak kisarwech eng' eutap puunyoot ak ne kisapchinech eng' ooreet.

³² Kingeitu Jerusalem, ketebee yooto peetuusyek somok.

³³ Eng' peetuut ne po ang'wan ko ki kiger fedha ak thahabu ak tereenik eng' kootap Kamuktaindennyo, ki kigoochi Meremot weeriitap Uriah tisiindet. Ki mi kobooto ineendet Eleazar weeriitap Phineas, ak ki mi kobooto icheek Josabad weeriitap Jeshua, ak Noahdia weeriitap Binui, Lawiik.

³⁴ Ki kiit tuguuk tugul ak keger, ak ki kisir ole kite nyigiisindo eng' peetuunooto.

³⁵ Ki igoito lagogap luulenik, che ki weeksei eng' ole ki kiluulji, kagoochinoik che kibeelei kogoochi Kiptaiyat Kamuktaindetap Israel; kiruugik taman ak aeng' agobo Israel tugul, mengichik tamanwogik sogool ak lo, aaregap kechir tamanwogik tisap ak tisap, kwesik taman ak aeng', koek kagoochinetap tengekto. Ki ek chuuto tugul kagoochinet ne kibeeljin Kamuktaindet ne Toroor.

³⁶ Ki igoochi kora ng'atuutigap laitoryat kandoik che po kaplaitoryat ak pounik che ki mi aineet pitoniin, ak kitoret piik ak kootap Kamuktaindet.