EZRAH 7 - Bukuit Ne Tilil

Kechamjin Ezrah Kwo Jerusalem

¹ Kingo pata tuguuchu eng' laitornatetap Artaserses laitoryatap Persia, ko ki mi Ezrah weeriitap Seraiah, weeriitap Azariah, weeriitap Hilkiah,

² weeriitap Shallum, weeriitap Zadok, weeriitap Ahitub,

³ weeriitap Amariah, weeriitap Azariah, weeriitap Meraiot,

⁴ weeriitap Seraiah, weeriitap Usi, weeriitap Buki,

⁵ weeriitap Abisua, weeriitap Phineas, weeriitap Eleazar, weeriitap Aron tisiindet ne oo.

⁶ Ki togosta anyun Ezrah niito eng' Babilon. Ki siriindet ne ng'oom eng' ng'atuutigap Musa che kiga kogoochi Kamuktaindet ne Toroor, Kamuktaindetap Israel. Ki chamji laitoryat soomennyi tugul, ko uu ye kimi eutap Kamuktaindet ne Toroor Kamuktaindennyi paragunnyi.

⁷ Ki togosta alak che po piigap Israel ak che po tisiik, Lawiik, tyeniik, kobooto riibiigap kurgotik ak otwogigap Hekaluut kobwa Jerusalem, eng' kenyiit ne po tisap ne po Laitoryat Artaserses.

⁸ Ki it `Ezra Jerusalem eng' arawet ne po muut ne ki kenyiit ne po tisap ne po laitoryat.

⁹ Ki katoi kotogos eng' Babilon eng' peetuut ne po tai ne po arawet ne po tai ak eng' peetuut ne po tai ne po arawetap muut, koit Jerusalem ko uu ye ki mi ak ineendet euut ne myee ne po Kamuktaindennyi.

¹⁰ Amu kiga kogiilgei eng' muguleldanyi Ezrah kocheeng' ng'atuutigap Kamuktaindet ne Toroor, koyai ak koneet kayomisutik ak kirwoogutik eng' Israel.

Parweet kobun Artaserses

¹¹ Chu ng'aleegap parweet ne ki igoochi `Laitoryat Artaserses Ezrah tisiindet, ne kora ko siriindetap ng'aleegap ng'atuutik che po Kamuktaindet ne Toroor, ak kayomisutik che ki igoochi Israel:

¹² Anee Artaserses, laitoryatap laitorinik, asirchini Ezrah tisiindet, siriindetap ng'atuutigap Kamuktaindetap kipsengwet ne ititaat; Taach chametapkei.

¹³ Kang'at ale, Oba tugul, piigap pororyetap Israel kobooto tisiikwak ak Lawiik che mi laitornatennyu, che chamei koba Jerusalem eng' magennywa.

¹⁴ Amu kagoyookten laitoryat ak kirwoogikyik tisap iwe iteep agobo Judah ak Jerusalem ko uu ng'atuutyetap Kamuktaindeng'ung' ne mi kobooten.

¹⁵ Ne siirei, iip fedha ak thahabu che ki igoochi eng' chamyet `laitoryat ak kirwoogikyik Kiptaiyat Kamuktaindetap Israel, ne mi meng'ootennyi Jerusalem.

¹⁶ Ip kobooto fedha tugul ak thahabu che inyoorchini emet tugul ne po Babilon, kobooto kagoochinet ne po chamyet ne po piik ak ne po tisiik, kogoitoi eng' chamyet agobo kootap Kamuktaindennywa ne mi Jerusalem.

¹⁷ Myee anyun iale fedhaisyechu, kiruugik, mengichik, aaregap keechiir, kobooto kagoochinoikwak che po peek ak kagoochinoikwak che kieei ak igoite chooto eng' kaptisisyetap kootap Kamuktaindeng'wong' ne mi Jerusalem.

¹⁸ Kiit age tugul ne ogeere inyee ak tupchosyeguk ole myee oyae fedhaisyek tugul che kang'et ak thahabu, oyae ko uu mageetap Kamuktaindeng'wong'.

¹⁹ Igoite eng' taitap Kiptaiyat Kamuktaindetap Jerusalem tereenik che kigoonin agobo otisyetap kootap Kamuktaindeng'ung'.

²⁰ Kiit age tugul neta kemakyin kootap Kamuktaindeng'ung' ne kanyool igoite, igoite eng' tuguuk che konorotiin che po kootap laitoryat.

²¹ Ang'ate anee, Laitoryat Artaserses konoriik tugul che po tuguuk che mi aineet pitoniin ale kiit age tugul neta komagenok Ezrah tisiindet, siriindetap ng'atuutigap Kamuktaindetap kipsengwet, keyai eng' kagiiletapkei,

²² kot koit talendaisyek pogol che po fedha, keruutik pogol che po nganuuk, divaik che yamegei ak debeisyek pogol aeng', mwanik che yamegei ak debeisyek pogol aeng', ak muunyuk che ma ki mwa ole tee.

²³ Kiit age tugul ne ng'atei Kamuktaindetap kipsengwet, koyaak ko uu nooto agobo kootap Kamuktaindetap kipsengwet ang' dabuch nyoonji nereeknateet pounatetap laitoryat ak weeriikyik.

²⁴ Kiboorwok kogeny keele, ma chamdaat eng' ng'atuutik kogoito kodi anan aisuruut anan ko aisuruut ne po tuguuk, age tugul eng' tisiik, Lawiik, tyeniik, riibiigap kurgotik ak otwogigap Hekaluut anan ko otwogigap kootap Kamuktaindet.

²⁵ Lewen inyee Ezrah ko uu utaatyetap Kamuktaindeng'ung' ne mi eung'ung', kirwoogik ak pounik che imuuchi koboi piik tugul che mi aineet pitoniin, icheek tugul che ingen ng'atuutigap Kamuktaindeng'ung' ak oneet ineendet ne ma ingen.

²⁶ Age tugul ne ma chamei koyai ng'atuutigap Kamuktaindeng'ung' ak ng'atuutigap laitoryat, kirwookyi iman ak konyoor pireet; ngo ne po meet anan ngo ne po kang'etoet, ngo kerebe tuguuk anan ngo ratisyet.

Kolasu `Ezra Kamuktaindet ne Toroor

²⁷ Iberuurot Kamuktaindet ne Toroor, Kamuktaindetap kwanisyekyok, ne ki inde ng'olyoot ne uu ni muguleldap laitoryat, si kochop kogararanit kootap Kamuktaindet ne Toroor ne mi Jerusalem,

²⁸ ne kigoiitwa ak anee rireenet eng' taitap laitoryat ak kirwoogikyik ak eng' taitap pounik tugul che kiimeen che po laitoryat. Ak ki anyiganitu amu ki mi kobooto eutap Kamuktaindet ne Toroor Kamuktaindennyu ak kiayum eng' Israel piik che taagunotiin ketogoste tugul.