EZRAH 1 - Bukuit Ne Tilil

Koweeksei `Yahudik Jerusalem

¹ Eng' kenyiit ne po tai ne po Cyrus laitoryatap Persia, si kobiit kosulda ng'olyootap Kamuktaindet ne Toroor ne ki mwa eng' kutitap Jeremiah, ko ki ichirchir `Kamuktaindet ne Toroor Cyrus laitoryatap Persia komwaita eng' laitornatennyi tugul ak kosiir kole:

² “Kamwa ko uu ni Cyrus laitoryatap Persia, ‘Ki koono Kamuktaindet ne Toroor, Kamuktaindetap kipsengwet laitornatosyek tugul che po ng'wony, ak kagong'ata ateekyi koot eng' Jerusalem ne mi Judah.

³ Ingotogosta Jerusalem ne mi Judah age tugul eng' okweek che oo piikyik, ak ingotep Kamuktaindennyi kobooto ineendet. Ingwo koteekyi koot Kamuktaindet ne Toroor, Kamuktaindetap Israel (ineendet ko Kamuktaindet) ne mi Jerusalem.

⁴ Ak chii age tugul ne kang'et eng' oldo tugul ole menyei, ko ingotoret piigap oldanyi chiichooto eng' fedha, thahabu, tuguuk ak tuuga kobooto kagoochinoik che po chamyet agobo kootap Kamuktaindet ne mi Jerusalem.’ ”

⁵ Ki ng'eetyo anyun che eecheen eng' kandoigap kooriigap kwanisyek che po Judah ak Benjamin ak tisiik, kobooto Lawiik, ak tugul che ki ing'eet Kamuktaindet saboonwekwak kotogosta koba koteech kootap Kamuktaindet ne Toroor ne mi Jerusalem.

⁶ Ki igoochi tugul che ki mi ak icheek tuguuk che po fedha, thahabu, kobooto tuguuk che toretegei, tuuga ak tuguuk che po kamanuutyet ne oo, kobooto kagoochinoik tugul che kiga kigoochi eng' chamyet.

⁷ Ne siirei ko ki inem Laitoryat Cyrus tuguuk che po kootap Kamuktaindet ne Toroor, che kiga koip Nebukadnezar eng' Jerusalem ipkonde kootap kanamonikyik.

⁸ Ki ip chooto Cyrus laitoryatap Persia eng' eutap Mitredat konorindet ak koiityi Sesbasar, pounindetap Judah.

⁹ Chu ko koitetap tuguuchooto: taabook sosom che po thahabu, taabook eliphuut che po fedha ak rotonik tiptem ak sogool;

¹⁰ taabook sosom che mengeechen che po thahabu, ak taabook alak che mengeechen pogol ang'wan ak taman che po fedha ak tereenik alak eliphuut agenge.

¹¹ Tereenik tugul che po thahabu ak fedha, ko ki ek eliphuusyek muut ak pogol ang'wan. Ki ip Sesbasar chuuto tugul kotogos, ye ki kimutu luulenik kotogos kobunu Babilon kobwa Jerusalem.