EZEKIEL 7 - Bukuit Ne Tilil

Rigunat ng'emisyet

¹ Ki nyoonjo kogeny ng'olyootap Kamuktaindet ne Toroor koleenjo,

² Ee inyee, weeriitap chii, mwaei Kiptaiyat Kamuktaindet ne Toroor komwachin emetap Israel, koleenjin, Kagesunet: kagonyonji kagesunet luukwek ang'wan che po emet.

³ Kaityin anyun kagesunet, ak ayoogun nereegekyuk, ak arwoogun ko uu ortinweguk; ak aibun tuguuguk tugul che kiwechei.

⁴ Amarirenen kondanyu, ama riira moo: ago aibu ortinweguk, ak kotebee kwenung'ung' tuguuguk che po wegeet: si onai ole aa Kamuktaindet ne Toroor.

⁵ Mwaei Kiptaiyat Kamuktaindet ne Toroor kole: Yaityet, yaityet kityo, keero, nyoonei.

⁶ Kagonyo kagesunet, ng'eetyinin; keero, nyoonei.

⁷ Kagonyonjin kagikyineng'ung', ee inyee ne imeng'iisyei eng' emet: kagoit peetuusyek, kagoriik peetuut; peetuutap wasetapkei eng' tuloonook, ma waagaat ne po poiboiyet.

⁸ Karik anyun si aroong'jin nereegekyuk che ng'woneen, ak ayai kosulda nereegekyuk eng' inyee, ak arwoogun ko uu ortinweguk; ak aibun tuguuguk tugul che kiwechei.

⁹ Amarirenen kondanyu, ama riira moo: aibun ko uu ortinweguk, ak kotebee kwenung'ung' tuguuguk che po wegeet; si onai ole aa Kamuktaindet ne Toroor ne abirisyei.

¹⁰ Keer peetuut o, keero, nyoonei: kagonyo kagikyineng'ung'; kagoyesyo taaptogap kirokto, kagong'at menoteet.

¹¹ Kang'eet koroomnateet koek kirokto ne po tengekto; ma mi ne ng'etu eng' icheek, anan ne po chaang'indonywa, anan ne po mogornatennywa: ama piitu kateeiyet eng' kwenunnywa.

¹² Kagoit peetuusyek, riigu peetuut: amat kobaibait alindet, anan koaragen aldaindet: amu miitei nereegek eng' chaang'indonywa tugul.

¹³ Amu ma weekyingei aldaindet kiit ne ki aldoi, agot ngo ta kosabei: amu po ng'ang'utyet tuiyet komugul, ma weechegei chii; ama igimitegei chii tengektap sabeennyi.

¹⁴ Kagoguut iryageet, ak kagochop tuguuk tugul; ago ma mi ne wendi pooryeet: amu mi nereegekyuk chaang'indonywa tugul.

¹⁵ Mi saang' rotwetap chok, komi oriit koroito, ak rubeet: ineendet ne mi mbar komeei eng' rotwetap chok; ak ineendet ne mi nganaseet, koamei rubeet ineendet ak koroito.

¹⁶ Ago chilildos icheeget che chilildos, ak koigei eng' tuloonook cheptugenigap atebwosyek, riirtos tugul, riirei chii age tugul eng' tengektanyi.

¹⁷ Nyaluldos eunek tugul, ak kochootyo kutung'oik tugul ko uu peek.

¹⁸ Kermenegei kogeny kuniok, ak kotuch icheek kamuiset; ak kolilaanso tugul, ak konam icheek tugul pooswek.

¹⁹ Wiirchin fedhaisyekwak ortinwek, ak koigei thahabusyekwak kiit ne murwoon; ma imuuchi kosar icheek fedhaisyekwak ak thahabusyekwak eng' peetuutap nereegegap Kamuktaindet ne Toroor; ma piyong'dos saboonwekwak, anan konyi mootinwekwak: amu kagoek kanagutyetap tengektonywa.

²⁰ Kigainde etunateet karaaranindap lelestanyi: ago ki yai kanamonigap tuguukwak che kiwechei kobooto tuguukwak che samis eng' olooto: koayai anyun kioto koek kiit ne murwoon eng' icheek.

²¹ Ak ande kioto eunegap toek koluul, ak ande eunegap kiptengeginigap ng'wony koluul; ak kong'wanit.

²² Ak atuktoochi patai, ak kong'wanit oldanyu ne po ung'oot: ak kochut olooto rebiik, ak kong'wanit.

²³ Itaany sirimdo: amu kanyi emet kirwoogutigap korotiik, ak kanyi nganaseet koroomnateet.

²⁴ Amutu anyun piik che yaach miising' eng' pororyosyek, ak konam kooriikwak kobunji: ak ageesu kogeny menoteetap che kiimeen; ak king'wanit komoswekwak che tiliileen.

²⁵ Nyoonei ng'emisyet; ak kocheeng' icheek kaalyeet, ama piitu.

²⁶ Nyoonei pichiindo kosubu pichiindo, ak pwoonei ng'aleegap piik koosup ng'aleegap piik; ak kocheeng' ng'ang'utyetap maotyot; ago petei ng'atuutyet eng' tisiindet, ak kobet kirwooget eng' poisyek.

²⁷ Riirei laitoryat, ak kilaakyi pounindet pananda, ak kinyalil eunegap piigap emet; ayachini icheek ko uu ooreenywa, ak arwookyini ko uu ye nyoljin; si konai icheek kole aa Kamuktaindet ne Toroor.