EZEKIEL 39 - Bukuit Ne Tilil

Ng'emisyet ne ki ityi asigarikap Gog

¹ Ee, inyee weeriitap chii, maoten agobo Gog, ak ileenji, mwaei Kiptaiyat Kamuktaindet ne Toroor kole: Keero, aboryenen inyee, ee Gog, pounindetap Rosh, Meshek, ak Tubal:

² ak awelelin, ak areun, ak amutun itogosu eng' tabanwek che looen che po murot kaataam; ak amutun inyoo tuloonoogap Israel:

³ ak akwer kwangeng'ung' ne mi eung'ung' ne po kaataam, kobut, ak agoochi kobutyo kipchaboniguk, eng' eung'ung' ne po tai.

⁴ Ibutyini tuloonoogap Israel, inyee ak lugosyeguk tugul, kobooto pororyosyek che mi kobooten: ak agoochin toriitik alak tugul che amei panyeek, kobooto tyong'igap timiin, koamin.

⁵ Imeechini kewanin: amu kaamwa ng'olyoondoniito, mwaei Kiptaiyat Kamuktaindet ne Toroor.

⁶ Ak ayookyi maat Magog, kobooto icheeget che meng'iisyei eng' chametapkei eng' ngeguusyek: si konai icheek kole aa Kamuktaindet ne Toroor.

⁷ Ak abarte kainennyu ne tiliil eng' piikyuk Israel; ama achamdoi kainennyu ne tiliil king'wanit kogeny: si konai pororyosyek kole aa Kamuktaindet ne Toroor, Ineendet ne Tiliil eng' Israel.

⁸ Keero, nyoonei, ak kiyaei ko uu nooto, mwaei Kiptaiyat Kamuktaindet ne Toroor; niito peetuut ne ki amwae.

⁹ Ak komanda icheek che menyei nganasoogap Israel, ak kolaale maat kariigap lugeet ak kobeel tuguuchooto, long'onik, ak long'onik che eecheen, kwangok, kipchabonik, ndirisyek, ak ng'otwek, ak kobeel karichooto eng' kenyiisyek tisap;

¹⁰ kot koma kobutei icheek kweenik anan koluul keet age tugul eng' osnosyek, amu tuun ilaale maat kariigap lugeet; ak koluul tuguugap piik che kiga koluulei icheek, ak korebe tuguuk piik che kiga korebe icheek, mwaei Kiptaiyat Kamuktaindet ne Toroor.

¹¹ Ak agoochini eng' peetuunooto Gog komosta ne kitupchin eng' Israel, atebweetap icheek che punei komostap kong'asiis ne po nyanjet: ak koger icheek che punei yooto: ak kotupchi olooto Gog ak piikyik che chaang' tugul: ak koguure yooto atebweetap Hamon-gog.

¹² Ak kotup kootap Israel icheek arawek tisap, si kobiit kotiliil emet.

¹³ Ee, tubei piik tugul che po emet icheek; ak koek kiit ne tagunoot eng' icheek, eng' peetuut ne tuun kitoroora, mwaei Kiptaiyat Kamuktaindet ne Toroor.

¹⁴ Ak kotabaan piik kobunoot emet peetuusyek tugul, ak kotubot che kiga ng'et eng' emet, si kotiliil emet: cheeng'oti ye kagogeskei arawechooto tisabu.

¹⁵ Ak ye punooti icheeget emet, ak kogeer chii age tugul kowa ne po chii, konde anyun kaboorunet yooto, agoi kotup piik che tubisyei eng' atebweetap Hamon-gog.

¹⁶ Ak koek kogeny Hamona kainetap nganaseet. Ianyinyi emet ko uu nooto.

¹⁷ Ee, weeriitap chii, mwaei Kiptaiyat Kamuktaindet ne Toroor kole: Mwachi toriitik alak tugul, ak tyony age tugul ne po timiin, ileenji oyumgei ak obwa; oyumgei eng' komosta age tugul si obwonji eng'sennyu ne aeng'wok, eng'seet ne oo eng' tuloonoogap Israel, si kobiit oam panyeek ak oee korotiik.

¹⁸ Oam panyeegap che kiimeen, ak oee korotiigap pounigap ng'wony, che po mengichik, ak che po aaregap keechiir, ak che po ng'oroorek, ak che po kiruugik, tugul che akwaen che po Bashan.

¹⁹ Ak koam mwanik kot obiyong'se, ak oee korotiik kot kobogitye, che po eng'sennyu ne kaaeng'wok.

²⁰ Ak obiyong'dosi eng' mesennyu eng' paraisisyek ak kariisyek che po lugeet, eng' piik che nyigoonen, kobooto piik tugul che po lugeet, mwaei Kiptaiyat Kamuktaindet ne Toroor.

²¹ Ak ande toroornatennyu kwenutap pororyosyek ak kogeer pororyosyek tugul kirwoogennyu ne kaayai, ak eunnyu ne ki agonoor icheek.

²² Konai anyun kootap Israel kole aa Kamuktaindet ne Toroor Kamuktaindennywa, kobooch peetuunooto ak kwo tai.

²³ Ak konai pororyosyek kole ki kiluul kootap Israel amu tengektonywa; amu ki ingelelja, ak ki aung'e icheek togeennyu: ki ande anyun icheek eutap puunikwak, ak kobek icheek tugul eng' rotwetap chok.

²⁴ Ki ayachi icheek ko uu murwoonindanywa ak ko uu pistaosyekwak; ak ki aung'e icheek togeennyu.

²⁵ Mwaei anyun Kiptaiyat Kamuktaindet ne Toroor kole: Amutu kogeny che ki kiluul che po Jakobo, ak ariiree koot komugul ne po Israel; ak koama ng'etkong' agobo kainennyu ne tiliil.

²⁶ Ak kogesen kalilanennywa, kobooto pistaosyekwak tugul che ki yaiywo, ye tuun meny emennywa eng' chametapkei, ama piitu chii ne imui icheek;

²⁷ ye tuun kaamutu icheek kogeny komong' eng' pororyosyek, ak ayumu icheek komong' eng' emotinwegap puunikwak, ak kitabaana eng' taitap pororyosyek che chaang'.

²⁸ Ak konai icheek kole aa Kamuktaindet ne Toroor Kamuktaindennywa, amu ki agoite icheek keluul koba pororyosyek, ak koayumji icheek emennywa: ama abagakyini agot agenge olooto kogeny;

²⁹ ama aung'e icheek togeennyu kogeny; amu kaaroong'ji Kabuusennyu kootap Israel, mwaei Kiptaiyat Kamuktaindet ne Toroor.