EZEKIEL 14 - Bukuit Ne Tilil

Kirwookyin che saae kanamonik

¹ Yeityo kobwanjo alak che po poisyegap Israel, ak kotep ng'wony eng' tainnyu.

² Ak konyoonjo ng'olyootap Kamuktaindet ne Toroor, koleenjo,

³ Ee weeriitap chii, kigogonorchigei pichu kanamonikwak eng' mugulelwekwak, ak konde kanagutyetap tengektonywa tainnywa: tos teebena icheek ng'olyoo age tugul?

⁴ Ng'alaalji anyun icheek, ileenji, mwaei Kiptaiyat Kamuktaindet ne Toroor ko uu ni kole: Chii age tugul ne po kootap Israel ne konorchingei kanamonikyik eng' muguleldanyi, ak konde kanagutyetap tengektanyi tainnyi, ak konyo ole mi maotyot; awoljini anee Kamuktaindet ne Toroor eng' tuguuchooto ko uu chaang'indap kanamonikyik;

⁵ si kobiit anam kootap Israel eng' mugulelwekwak icheeget, amu ki kotoiyenagei icheek tugul amu kanamonikwak.

⁶ Mwachi anyun kootap Israel ileenji, mwaei Kiptaiyat Kamuktaindet ne Toroor ko uu ni kole: Oweege, ak owalage omete kanamonikwok; ak otuktoochi patai tuguukwok tugul che kiwechei.

⁷ Amu chii age tugul ne po kootap Israel, anan ne po toek ne tebee Israel, ne istoenagei, ak kogonorchigei kanamonikyik eng' muguleldanyi, ak konde kanagutyetap tengektanyi tainnyi, yeityo konyo ole mi maotyot koteepchigei ng'olyoot eng' anee; awoljini aneendet Kamuktaindet ne Toroor chiichooto.

⁸ Ak auuiit togeennyu aborye chiichooto, ak ayai ineendet koek ne kikwong'ee, koek kaboorunet ak kalewenet, ak aistoe ineendet eng' piikyuk; si onai ole aa Kamuktaindet ne Toroor.

⁹ Ak ngot kiberber maotyot ak komwa ng'olyoo, ko anee Kamuktaindet ne Toroor ne kaberberi maotyondonooto, ak atokyi eunnyu, ak ang'em ineendet aiste eng' piikyuk Israel.

¹⁰ Ak koip icheek tengektonywa: tengektap maotyot ko uu tengektap chiito ne cheeng'ei ineendet;

¹¹ si ma ta koombenot kogeny kootap Israel kometaa, anan kong'wanitkei kogeny eng' pistaosyekwak tugul; ago si koek piikyuk, ak aegu Kamuktaindennywa, mwaei Kiptaiyat Kamuktaindet ne Toroor.

Noah, Daniel ak Job

¹² Ki nyoonjo kogeny ng'olyootap Kamuktaindet ne Toroor, koleenjo,

¹³ Ee weeriitap chii, ye yaiywo emet tengekto eng' pistoet, ak atokyi eunnyu emonooto, ak atil amitwogikyik, ak ayookyi rubeet, ak abar chii ak tyony;

¹⁴ agot nganda mi pichu somogu, Noah, Daniel, ak Job emonooto, ko kota saru saboonwekwak icheegei eng' imandanywa, mwaei Kiptaiyat Kamuktaindet ne Toroor.

¹⁵ Ngot agetu tyong'ik che yaacheen kobun emet, ak kong'em, kot koguber, ne ma komuuchi chii kobun amu tyong'ik;

¹⁶ ko agot nganda mi pichuuto somogu olooto, ko ko uu ye asabe, mwaei Kiptaiyat Kamuktaindet ne Toroor, koma saru icheek weeriik anan tiibiik; kisaru icheeget icheegei, ak koguber emet.

¹⁷ Anan ngot aipchi rotwetap chok emonooto, ak ale, Ee rotwoni po chok, ui pun emet; si abar chii ak tyony;

¹⁸ ko agot nganda mi pichuuto somogu olooto, ko ko uu ye asabe, mwaei Kiptaiyat Kamuktaindet ne Toroor, koma saru icheek weeriik anan tiibiik, ago kisaru icheeget icheegei.

¹⁹ Anan ngot ayookyi koroito emonooto, ak aroong'ji nereegekyuk che ng'woneen atumde korotiik, aiste chii ak tyony:

²⁰ ko agot nganda mi Noah, Daniel, ak Job olooto, ko ko uu ye asabe, mwaei Kiptaiyat Kamuktaindet ne Toroor, koma saru icheek weeriit anan chepto; ago saru saboonwekwak kityo eng' imandanywa.

²¹ Amu mwaei Kiptaiyat Kamuktaindet ne Toroor kole: Kotam nee anyun ye ayookyi Jerusalem kirwoogutikyuk ang'wan che ng'woneen; rotwetap chok, ak rubeet, ak tyong'ik che yaacheen, ak koroito, si kobar chii ak tyony?

²² Ago, ogeero, kituuchi piik che ng'etu che tuun kimuti, weeriik kobooto tiibiik: ogeero, mong'jinok, ak ogeer ortinwekwak ak poisyonikwak: ak kigaigaak agobo yaityet ne koaipchi Jerusalem, agobo tugul che koaipchi.

²³ Ak kogaigaak, ye ogeer ortinwekwak ak poisyonikwak: si kobiit onai ole ma ayai puch tuguuk tugul che koayai eng' olooto, mwaei Kiptaiyat Kamuktaindet ne Toroor.