EZEKIEL 1 - Bukuit Ne Tilil

Ng'ang'utyet agobo tuguuk ang'wan che saptos

¹ Ki ageer ng'ang'utigap Kamuktaindet eng' kenyiitap sosom, eng' arawet ne po ang'wan, eng' peetuutap muut ne po arawanooto ye kingo yaatak kipsengwet ami kobooto luulenik eng' ye neegitee aineetap Kebar.

² Eng' peetuut ne po muut ne po arawet, ne ki kenyiitap muut kong'etee ngeluul laitoryat Jehoiakin,

³ ko ki nyoonji `ng'olyootap Kamuktaindet ne Toroor Ezekiel tisiindet, weeriitap Buzi, eng' emetap Kaldeik, eng' ye neegitee aineetap Kebar; ak kimi eutap Kamuktaindet ne Toroor paragunnyi eng' olooto.

⁴ Ogeero! Ki ageer usoonetap ropta ne oo komang'une murot kaataam; pooldet ne oo, kobooto kalyeleet ne oo ne kiyiem kakweng'seet ne kiim. Eng' kwenunnyi ko kitogu kiit ne uu itoondap taet, komang'une kwenutap maat.

⁵ Ak ki mang'une kwenunnyi kergeindo ne po tuguuk ang'wan che saptos. Ki uu ni itoondanywa; ki tinyei itoonwek che uu che po chii.

⁶ Ki tinyei age tugul togoochik ang'wan, ak ki tinyei age tugul eng' icheek kebebaik ang'wan.

⁷ Ak ki chuulotin keelyekwak; ak ki uu keldebesaigap keelyekwak siyogap moita: ak ki ilildoi ko uu itoondap sugunwet ne sitaat.

⁸ Ki tinyei eng' kebebaikwak oriit che po komoswekwak ang'wan eunek che uu che po chiito. Ki tinyei icheeget ang'wanu togoochikwak ak kebebaikwak ko uu ni:

⁹ kiga namgei kebebaikwak; ki ma kogusegong' ye kibendi; kiwendi age tugul kogeerei tai.

¹⁰ Kergeindap togoochikwak ko ki uu ni: ki tinyei age tugul eng' icheek ko ang'wan togeet ne uu ne po chiito, togeet ne uu ne po ng'etundo eng' komostap tai, togeet ne uu ne po eito eng' komostap kaataam, ak togeet ne uu ne po kipsiichit.

¹¹ Kibesyotin togoochikwak ak kebebaikwak eng' ole po parak; kiga namgei kebebaik aeng' eng' age tugul, ak kotuch kebebaik aeng' poorwekwak.

¹² Ki wo tai age tugul: ki pa icheek ole kamach muguleldo; ki ma kogusegong' ye kibendi.

¹³ Kergeindap tuguuchooto saptos ko ki uu itoondanywa ng'etetyot, ko uu tagunetap kegenganik: kiwendate maata kwenutap tuguuchooto saptos: ak ki ikweng'sei miising' maata, ak ki mang'une kalyeleet maata.

¹⁴ Ak ki rwaei tuguuchooto saptos ak koweechegei ko uu kakweng'eetap kalyeleet.

¹⁵ Kingo ta ageere anyun tuguuchooto saptos, ogeero, ki tonone ng'wony tireet agenge eng' ye neegitee tuguuchooto saptos, kotinyei age tugul eng' togoochichooto ang'wan cheptirennyi.

¹⁶ Ki uu itoondap tiroochooto kobooto poisyennywa, itoondap berulo: ak ki tinyei icheek tugul ko ang'wan kergeindo agenge: ak ki uu itoondanywa ak poisyennywa tireet ne mi kwenutap tireet age.

¹⁷ Ye ki pendi kobunei komoswekwak ang'wan: ki ma kogusegong' ye ki pendi.

¹⁸ Ki torooreen kariik che tyektoe tiroochooto ak ki imuisei; ak ki nyiitootiin koonyek komoswek tugul eng' kariikwak che tyektoe, che ki tinyei icheek tugul ko ang'wan.

¹⁹ Ak ye kingo pa tuguuchooto saptos, koba tiroochooto ak icheek koboiyotyin: ak ki ngeganap tuguuchooto saptos eng' ng'wony, keganapta tiroochooto ak icheek.

²⁰ Ki pa ui tugul ole kamach kabuuset; kiwendi kabuuset olooto agine: ak ki kiganapta tiroochooto tuguuchooto; amu kimi kabuusetap kioto sabei, tirook.

²¹ Kingo pa chuun, koba chu ak icheek; ak kingo tononso chuun, kotononso chu ak icheek; ak ki ngeganap chuun eng' ng'wony, keganapta tirook ak icheek: amu kimi kabuusetap kioto sabei tirook.

²² Ak kimi paragutap metitap kioto sabei kergeindap sengwetyet, ne uu peek che kagau che imuisei, ne ki kiitoe paragutap metowekwak.

²³ Ak ki chuulotin kebebaikwak eng' kurereetap sengwetyet ko katokyigei `age age: ki tinyei age tugul kebebaik aeng' che tuchei komosi, ak ki tinyei age tugul kebebaik aeng' che tuchei komosin, che tuchei poorwekwak.

²⁴ Ak kingo pendi, agas kirgirenetap kebebaikwak ko uu cheetap peek che chaang', ko uu tweguunetap Ineendet Ne po Kamuktaet, ko uu cheet ne imuuti, ne kergei ak cheetap lugeet: kingo tononso kochoor kebebaikwak kobwa ng'wony.

²⁵ Ak ki piit cheet eng' paragutap sengwetyet ne ki mi paragutap metowekwak: kingo tononso, kochoor kebebaikwak kobwa ng'wony.

²⁶ Ak kimi paragutap sengwetyet, ne ki mi paragutap metowekwak, kergeindo ne po ng'echereetap laitornatet, ne uu itoondanyi koita ne kiguure sapphire: ak kimi paragutap kergeindo ne po ng'echeranooto po laitornatet, kergeindo ne po itoondap chiito eng' paragunnyi.

²⁷ Ak ki ageer kiit ne uu itoondap taet, ko uu itoondo ne po maat eng' ole po oriit eng' komoswek tugul, kong'etee itoondap suennyi ak kwo parak; ak kong'etee itoondap suennyi ak kwo ng'wony, ko ki ageer itoondo ne po maat, ak kigayiem ineendet kakweng'et.

²⁸ Ko uu ole teptoi itoondap chepkuinobor eng' poolik eng' peetuutap ropta, ko ki uu nooto itoondap kakweng'et eng' komoswek tugul. Ki niito itoondap kergeindo ne po liilindap Kamuktaindet ne Toroor. Ak kinga keer, abut kot kotiiny togeet, ak ki agas kutitap ineendet ne ki ng'alaali.